തിരുവനന്തപുരം: സിസ്സ (സിഐഎസ്എസ്എ) യുടെ നേതൃത്വത്തില് പുത്തരിക്കണ്ടം മൈതാനിയിലെ ഇ.കെ നായനാര് പാര്ക്കില് നടന്നു വരുന്ന കൃഷി വൈഭവ് മേളയ്ക്ക് തിരക്കേറുന്നു. ഇന്നലെ ഞായറാഴ്ച ആയതിനാല് രാവിലെ മുതല് വന് തിരക്കാണ് മേളയ്ക്ക് അനുഭവപ്പെട്ടത്.
മേളയില് പ്രവര്ത്തിക്കുന്ന കിസാന് സര്വീസ് സൊസൈറ്റിയുടെ ഹൈടെക് മുട്ടഗ്രാമം പദ്ധതി മേള കാണാനെത്തുന്നവരെ ആകര്ഷിക്കുന്നു. ആരോഗ്യമുള്ള കര്ഷകര് സമ്പന്നമായ രാഷ്ട്രം എന്ന കാഴ്ചപ്പാടോടുകൂടി ആരോഗ്യവും വരുമാനവും ഇനി നിങ്ങളുടെ വീട്ടുമുറ്റത്ത് എന്ന മുദ്രാവാക്യവുമായാണ് മുട്ട ഗ്രാമം പദ്ധതി അവതരിപ്പിക്കുന്നത്. മുട്ടഗ്രാമം പദ്ധതിയിലൂടെ ബി.വി 380 ഇനത്തില്പ്പെടുന്ന രോഗപ്രതിരോധ ശേഷി കൂടുതലുള്ളതും വര്ഷത്തില് 300 മുട്ടകള് വരെ നല്കുന്നതുമായ 120 ദിവസം പ്രായമായ മികച്ച ഇനം 25 കോഴികളും ഫീഡര് സംവിധാനമുള്ളതും ഓട്ടോമാറ്റിക് വാട്ടര് സിസ്റ്റവും മുട്ടകള് കേടുപാടില്ലാതെ ശേഖരിക്കാനുള്ള സൗകര്യം ഉള്ളതുമായ ഹൈടെക് കോഴിക്കൂടും 50 കിലോ കോഴിത്തീറ്റയും ആവശ്യമായ മരുന്നുകളുടെ കിറ്റും അടങ്ങിയ പാക്കേജ് മേള സന്ദര്ശിക്കാനെത്തുന്നവര്ക്ക് ലഭ്യമാണ്. 25000 രൂപയാണ് പാക്കേജ് നിരക്ക്. പദ്ധതിയില് ചേരുന്നവര്ക്ക് പ്രത്യേക പരിശീലനവും സൊസൈറ്റി നല്കുന്നതാണ്. കണ്ണൂര് പള്ളിക്കുന്ന് കേന്ദ്രീകരിച്ചാണ് കിസാന് സര്വീസ് സൊസൈറ്റി പ്രവര്ത്തിക്കുന്നത്.
കൊല്ലം പട്ടാഴിയിലെ അമ്പാടി ഗോശാലയുടെ സ്റ്റാള് വൈഭവ് കൃഷിമേളയില് പ്രവര്ത്തിക്കുന്നത്. വിഷമില്ലാത്ത നല്ല പാലും നല്ല പഴങ്ങളും നല്ല ആഹാരവും. മലയാളിയുടെ ഭക്ഷണ സംസ്കാരത്തില് മാറ്റം വരുത്താന് പ്രയത്നിക്കുന്ന ദൃഢനിശ്ചയത്തിന്റെ പേരാണ് അമ്പാടി ഗോശാല. പൂര്ണ്ണമായും പ്രകൃതി ദത്തമായ ചേരുവകള് ചേര്ത്ത് നിര്മ്മിക്കുന്ന വസ്തുക്കളാണ് അമ്പാടി ഗോശാലയുടെ പ്രത്യേകത. പശുവിന്റെ പാലില് നിന്നും ചാണകത്തില് നിന്നും മൂത്രത്തില് നിന്നും രണ്ട് ഡസനോളം ഉല്പ്പന്നങ്ങളാണ് അമ്പാടി ഗോശാലയില് നിര്മ്മിക്കുന്നത്. കുളിക്കാനുള്ള സോപ്പ്, ഹെയര് ഓയില്, മൗത്ത് വാഷ്, ഫെയ്സ് ക്രീം, ഭസ്മം, കൊതുകുനാശിനി, ഡിഷ്വാഷ്, സാനിറ്റൈസര് കമ്പോസ്റ്റ് തുടങ്ങിയവയാണ് പ്രധാന ഉല്പ്പന്നങ്ങള്. അമ്പാടി ഗോശാലയുടെ പ്രത്യേകതകള് മനസ്സിലാക്കി നിരവധി ആളുകള് സ്റ്റാള് സന്ദര്ശിക്കുന്നുണ്ട്.
വാഴപ്പഴം, പച്ചക്കറികള് മരച്ചീനി, ചേന തുടങ്ങിയ രാസവളം ഉപയോഗിക്കാത്ത കാര്ഷികവിളകള് മേളയില് പ്രദര്ശിപ്പിച്ച് കോയിക്കല്നാട് ഫാര്മര് പ്രൊഡ്യൂസര് കമ്പനി. ഇതെല്ലാം കോയിക്കല്നാട് എഫ്പിഒയുടെ സ്വന്തം ഉല്പ്പന്നങ്ങളാണ്. മേളയില് പ്രദര്ശിപ്പിച്ചിരിക്കുന്ന വലിയ മരച്ചീനിയും നീളമേറിയ പടറ്റി കുലകളും കാണാന് നിരവധി പേരാണ് സ്റ്റാള് സന്ദര്ശിക്കുന്നത്. നെടുമങ്ങാട് ആണ് കമ്പനിയുടെ ആസ്ഥാനം. തേയിലയും കോഴിക്കാരവും ആണ് വാഴകൃഷിക്ക് വളമായി ഉപയോഗിക്കുന്നത്. നാടന് കോട്ടുക്കോണം മാങ്ങ, ചീര, നെയ്ക്കുമ്പളങ്ങ തുടങ്ങിയവും കൃഷി ചെയ്യുന്നുണ്ട്. ഇവയുടെയെല്ലാം പ്രദര്ശനവും വില്പ്പനയും മേളയിലുണ്ട്.
രാവിലെ 10 മുതല് രാത്രി 7 വരെയാണ് പ്രദര്ശന വില്പ്പന മേള നടക്കുന്നത്. കാര്ഷിക മേള, മാമ്പഴോത്സവം, സസ്യഫലപ്രദര്ശനങ്ങള്, സെമിനാറുകള് എന്നിവയും മേളയില് ഉണ്ട്. 19ന് പ്രദര്ശനം സമാപിക്കും. പ്രവേശനം സൗജന്യമാണ്.
