തിരുവനന്തപുരം:സത്യപ്രതിജ്ഞ തിങ്കളാഴ്ച നടക്കാനിരിക്കെ കോണ്‍ഗ്രസ് മന്ത്രി പട്ടിക മാറി മറിയുന്നു.മന്ത്രി സ്ഥാനം ഉറപ്പിച്ചിരുന്ന ചാണ്ടി ഉമ്മന്റെ സാധ്യത മങ്ങി. വി ടി ബല്‍റാം സ്പീക്കറായേക്കുമെന്നാണ് ഒടുവിലെ വിവരം. കോട്ടയത്ത് നിന്ന് തിരുവഞ്ചൂര്‍ രാധാകൃഷ്ണന്‍ മന്ത്രിയാകും. ഏത് സ്ഥാനം കിട്ടിയാലും പാര്‍ട്ടി പറയുന്നത് പോലെ ചെയ്യുമെന്ന് പറഞ്ഞ അദ്ദേഹം മന്ത്രി സ്ഥാനത്തിനായി പാര്‍ട്ടിക്കുള്ളില്‍ സമ്മര്‍ദം ശക്തമാക്കിയിരുന്നു.
തിരുവഞ്ചൂര്‍ രാധാകൃഷ്ണന്‍ മന്ത്രിസഭയില്‍ എത്തിയാല്‍ ഏത് വകുപ്പായിരിക്കും എന്നതില്‍ ആശങ്ക തുടരുകയാണ്. മന്ത്രിസഭാ പ്രവേശനസാധ്യത മങ്ങുന്നതിനിടെ ടി സിദ്ദിഖ് മുതിര്‍ന്ന നേതാവ് എ .കെ ആന്റണിയുമായി കൂടിക്കാഴ്ച നടത്തി.
അവകാശവാദങ്ങളുമായി കൂടുതല്‍ നേതാക്കള്‍ രംഗത്തെത്തിയതോടെ തിരക്കിട്ട കൂടിയാലോചനകള്‍ തുടരുകയാണ്.മന്ത്രിയാക്കണമെന്ന ആവശ്യം ഐ സി ബാലകൃഷ്ണന്‍ ആവര്‍ത്തിക്കുകയാണ്. പട്ടികവര്‍ഗ വിഭാഗത്തോട് മുഖ്യമന്ത്രിയും കോണ്‍ഗ്രസും നീതി കാണിക്കുമെന്ന പ്രതീക്ഷയുണ്ടെന്ന് ഐ സി ബാലകൃഷ്ണന്‍ മാധ്യമങ്ങളോട് പറഞ്ഞു.
