മലപ്പുറം:പ്രയാഗ് രാജില് നടന്ന കുംഭമേളയില് പങ്കെടുക്കാന് ബുക്ക് ചെയ്ത ഹോട്ടല് മുറി നിഷേധിച്ചതില് ഐആര്സിടിസിക്കും ഓണ്ലൈന് ബുക്കിംഗ് പോര്ട്ടലായ മേക്ക് മൈ ട്രിപ്പിനുമെതിരെ ജില്ലാ ഉപഭോക്തൃ കമ്മീഷന് ഉത്തരവ്.സേവനത്തില് വീഴ്ച വരുത്തിയ പരാതിക്കാര്ക്ക് 50,000 രൂപ നഷ്ടപരിഹാരവും 5,000 രൂപ കോടതി ചെലവും നല്കാന് കമ്മീഷന് ഉത്തരവിട്ടു.
പരാതിക്കാരില് നിന്ന് ഹോട്ടല് അധികമായി ഈടാക്കിയ 7,827 രൂപ തിരികെ നല്കാനും വിധിച്ചു.
മലപ്പുറം അങ്ങാടിപ്പുറം സ്വദേശി കെ.ബി. പരമേശ്വരന് , സഹോദരന് ബാലാജി ശങ്കര്, സുഹൃത്ത് മണികണ്ഠന് എന്നിവരുടെ പരാതിയിലാണ് ജില്ലാ ഉപഭോക്തൃ കമ്മീഷന് ഉത്തരവ്.കഴിഞ്ഞ കുംഭമേളയോടനുബന്ധിച്ച് പ്രയാഗ് രാജിലെ ‘അതിഥി സ്റ്റേ ലോഡ്ജ്’ എന്ന ഹോട്ടലില് മൂന്ന് ദിവസം താമസിക്കാനാണ് ഇവര് ഐആര്സിടിസി വഴി മേക്ക് മൈ ട്രിപ്പ് മുഖേന മുന്കൂട്ടി മുറി ബുക്ക് ചെയ്തത്.2024 ഒക്ടോബറില് തന്നെ 4,173 രൂപ അടച്ച് ബുക്കിംഗ് സ്ഥിരീകരിക്കുകയും ചെയ്തു.
എന്നാല്,2025 ഫെബ്രുവരി മൂന്നിന് ദീര്ഘദൂര യാത്രയ്ക്കൊടുവില് അസമയത്ത് ഹോട്ടലില് എത്തിയ പരാതിക്കാര്ക്ക് മുറി കിട്ടിയില്ല. ഐ.ആര്.സി.ടി.സി.യുമായോ മേക്ക് മൈ ട്രിപ്പുമായോ തങ്ങള്ക്ക് യാതൊരു ബന്ധവുമില്ലെന്ന നിലപാടിലായിരുന്നു ഹോട്ടല് അധികൃതര്.കുംഭമേളയുടെ തിരക്കും അപരിചിത സ്ഥലവുമായതിനാല് മറ്റ് താമസസൗകര്യങ്ങള് കണ്ടെത്താനാകാതെ അലഞ്ഞ പരാതിക്കാര്ക്ക് പിന്നീട് പ്രതിദിനം 4,000 രൂപ നിരക്കില് അധികത്തുക നല്കി ഇതേ ഹോട്ടലില് തന്നെ താമസിക്കേണ്ടി വന്നു. തുടര്ന്ന് അധികമായി നല്കേണ്ടി വന്ന തുകയും നഷ്ടപരിഹാരവും ആവശ്യപ്പെട്ടിട്ടും ട്രാവല് ഏജന്സികള് തയാറാകാത്തതിനെ തുടര്ന്നാണ് ഇവര് ഉപഭോക്തൃ കമ്മീഷനില് പരാതി നല്കിയത്.
