ചേര്‍ത്തല: സാമൂഹ്യനീതി ഉറപ്പാക്കുകയെന്നത് പുതിയ സര്‍ക്കാരിന്റെ പ്രധാന ഉത്തരവാദിത്വമാണെന്നും സംഘടിത ശക്തികള്‍ക്ക് കീഴ്‌പെട്ടുള്ള ഭരണം ജനാധിപത്യത്തിന് അപമാനമാണെന്നും എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍.
എസ്എന്‍ഡിപി യോഗത്തിന്റെ 123-ാം ജന്മദിനാഘോഷം ഉദ്ഘാടനം ചെയ്യുകയായിരുന്നു അദ്ദേഹം. മന്ത്രിസഭാ രൂപീകരണത്തിലും ഭരണനടപടികളിലും പിന്നാക്ക സമുദായങ്ങളുടെ യഥാര്‍ത്ഥ പ്രാതിനിധ്യം ഉറപ്പാക്കണമെന്നും അദ്ദേഹം ആവശ്യപ്പെട്ടു.
പത്തുവര്‍ഷം അധികാരത്തിന്റെ പേരില്‍ ലഭിക്കാത്ത ആനുകൂല്യങ്ങള്‍ അനര്‍ഹമായി കൈക്കലാക്കാന്‍ ശ്രമിക്കുന്ന ഘടകകക്ഷികളെയും സ്വാര്‍ത്ഥ രാഷ്‌ട്രീയകക്ഷികളെയും നിയന്ത്രിക്കേണ്ടതു സര്‍ക്കാരിന്റെ കടമയാണ്. സാമൂഹിക ഐക്യവും മതേതരമൂല്യങ്ങളും സംരക്ഷിക്കുന്ന നിലപാടുകളുണ്ടാകണം. സാധാരണക്കാരുടെ ജീവിതപ്രശ്നങ്ങള്‍ പരിഹരിക്കുന്ന വികസന കാഴ്ചപ്പാടുകള്‍ സര്‍ക്കാരെടുക്കണമെന്നും വെള്ളാപ്പള്ളി പറഞ്ഞു.
യോഗം പ്രസിഡന്റ് ഡോ. എം.എന്‍. സോമന് അദ്ധ്യക്ഷനായി. ദേവസ്വം സെക്രട്ടറി അരയക്കണ്ടി സന്തോഷ്,കൗണ്‍സലര്‍മാരായ പി.സുന്ദരന്‍, പി.ടി.മന്മഥന്‍, ബേബിറാം, ഇ.എസ്.ഷീബ, പി.കെ.പ്രസന്നന്‍, പി.എസ്.എന്‍.ബാബു, വിപിന്‍രാജ്, സന്ദീപ് പച്ചയില്‍, എബിന്‍ അമ്പാടിയില്‍, ബാബു കടത്തുരുത്തി, യു.എ.ഇ കോഓര്‍ഡിനേറ്റര്‍ അഡ്വ.സിനില്‍ മുണ്ടപ്പള്ളി തുടങ്ങിയവര്‍ പങ്കെടുത്തു.
