തൃശൂര്‍: എക്‌സ്പ്രസ് ദിനപത്രത്തിന്റെ ഉടമയും മുഖ്യപത്രാധിപരുമായിരുന്ന കെ. ബാലകൃഷ്ണന്‍ അന്തരിച്ചു. 87 വയസായിരുന്നു. കേരളത്തിലെ മാധ്യമരംഗത്ത് മായാത്ത മുദ്രപതിപ്പിച്ച എക്‌സ്പ്രസ് പത്രം 1944ല്‍ ബാലകൃഷ്ണന്റെ അച്ഛന്‍ കെ. കൃഷ്ണനാണ് സ്ഥാപിച്ചത്. ബാലാജി എന്ന പേരില്‍ സിനിമാ നിരൂപകനായി പത്രപ്രവര്‍ത്തനരംഗത്തേക്ക് കടന്നുവന്ന ബാലകൃഷ്ണന്‍ 1970 നവംബറില്‍ അച്ഛന്റെ മരണശേഷമാണ് മുഖ്യപത്രാധിപരായത്.
ധനലക്ഷ്മി ബാങ്ക്, അംബാള്‍ ചിട്ടീസ് എന്നിവയുടെ ഡയറക്ടറായിരുന്നു. നൃത്തകലാപരിശീലനത്തിനായി കെ. കൃഷ്ണന്‍ സ്ഥാപിച്ച നടനനികേതനത്തിനും നേതൃത്വം നല്‍കിയിരുന്നു. 1993ല്‍ സുബ്രഹ്‌മണ്യന്‍ സ്വാമി എക്‌സ്പ്രസ് ഏറ്റെടുത്തിന് ശേഷമാണ് പത്രാധിപരുടെ ചുമതല ഒഴിഞ്ഞത്.
ചന്ദ്രയാണ് ഭാര്യ. ബെംഗളുരുവില്‍ ടൈംസ് ഓഫ് ഇന്ത്യ വൈസ്പ്രസിഡണ്ടായ കൃഷ്ണന്‍, വിദ്യ എന്നിവര്‍ മക്കളും കാലിഫോര്‍ണിയയില്‍ ചാര്‍ട്ടേഡ് അക്കൗണ്ടന്റായ കുമാര്‍ മരുമകനുമാണ്. മൃതദേഹം ഷൊര്‍ണൂര്‍ റോഡ് കൊരണ്ടാട്ടില്‍ ലൈനിലെ മുരുകനിവാസില്‍ പൊതുദര്‍ശനത്തിന് ശേഷം പൂങ്കുന്നം ബ്രാഹ്‌മണസഭ ശ്മശാനത്തില്‍ സംസ്‌കരിച്ചു.
