കൊല്‍ക്കൊത്ത :മമതാ ബാനര്‍ജിയെ വീണ്ടും വെട്ടിലാക്കി മുഖ്യമന്ത്രി സുവേന്ദു അധികാരി. മമതയുടെ കോട്ടയായ ഭവാനിപൂരില്‍ വിജയിച്ച സുവേന്ദു അധികാരി ഭവാനിപൂര്‍ മണ്ഡലം ഒഴിയേണ്ടെന്ന് തീരുമാനിച്ചു. ഇതോടെ എംഎല്‍എ ആകാനുള്ള മമതയുടെ സ്വപ്നം തകര്‍ന്ന മട്ടാണ്.
സുവേന്ദു അധികാരി ഇക്കുറി രണ്ട് മണ്ഡലങ്ങളില്‍ മത്സരിച്ചിരുന്നു. ഭവാനിപൂരിലും നന്ദിഗ്രാമിലും. ഇതില്‍ ഒരു സീറ്റ് ഒഴിയണം. അവിടെ ഉപതെരഞ്ഞെടുപ്പ് നടക്കും. ഇപ്പോള്‍ നന്ദിഗ്രാം സീറ്റ് ഒഴിയാനാണ് സുവേന്ദു അധികാരി തീരുമാനിച്ചിരിക്കുന്നത് നന്ദിഗ്രാം സുവേന്ദു അധികാരിയുടെ കോട്ടയാണ്.
മമത ബാനര്‍ജി ആകെ ഒരു മണ്ഡലത്തിലേ മത്സരിച്ചിരുന്നുള്ളൂ. അത് സ്വന്തം കോട്ടയായ ഭവാനിപൂരിലായിരുന്നു. ഇവിടെ 15000 വോട്ടുകള്‍ക്കാണ് സുവേന്ദു അധികാരി മമതയെ തോല്പിച്ചത്. ഇതോടെ മമത എംഎല്‍എ പോലും അല്ലാതായി. ഇത് കാരണം മമതയ്‌ക്ക് ബംഗാള്‍ നിയമസഭയിലേക്ക് പ്രവേശനം ഇല്ല. ഭവാനിപൂര്‍ സീറ്റാണ് സുവേന്ദു അധികാരി ഒഴിയുന്നതെങ്കില്‍ അവിടെ മമതയ്‌ക്ക് വീണ്ടും മത്സരിച്ച് ജയിക്കാമായിരുന്നു. കാരണം സുവേന്ദു അധികാരിയല്ലാതെ മറ്റൊരാള്‍ക്ക് മമതയെ തോല‍്പിക്കാന്‍ എളുപ്പമല്ല. പക്ഷെ സുവേന്ദു അധികാരി ഭവാനിപൂര്‍ ഒഴിയില്ല എന്നത് മമതയ്‌ക്ക് വലിയ തിരിച്ചടിയായിരിക്കുകയാണ്.
നന്ദിഗ്രാം എന്നത് സുവേന്ദു അധികാരിയുടെ കോട്ടയാണ്. മറ്റൊരര്‍ത്ഥത്തില്‍ പറഞ്ഞാല്‍ ബിജെപി കോട്ടയാണ്. ഇവിടെ ഉപതെരഞ്ഞെടുപ്പില്‍ മമത മത്സരിച്ചാലും ജയിക്കാന്‍ സാധ്യത കുറവാണ്. ബംഗാള്‍ കയ്യില്‍നിന്നു പോവുകയും ഭവാനിപൂരില്‍ തോല‍്ക്കുകയും ചെയ്യുക വഴി ഇരട്ട ആഘാതം കിട്ടിയ മമതയ്‌ക്ക് ഇനി ഒരു തോല്‍വി കൂടി താങ്ങാന്‍ പറ്റില്ല. എന്തായാലും നന്ദിഗ്രാമില്‍ മത്സരിക്കണമോ വേണ്ടയോ എന്നത് ആലോചിച്ച് തന്നെ മമതയുടെ ഉറക്കം നഷ്പ്പെടുന്ന സ്ഥിതിവിശേഷമാണ് സുവേന്ദു അധികാരി സൃഷ്ടിച്ചിരിക്കുന്നത്.
