ന്യൂദല്‍ഹി: കേരളത്തിലെ കായിക മേഖലയിലെ അടിസ്ഥാന സൗകര്യ വികസനത്തിന് പിന്തുണ തേടി ഇന്ത്യന്‍ ഒളിമ്പിക് അസോസിയേഷന്‍ പ്രസിഡന്റ് ഡോ. പി.ടി. ഉഷ എംപി, കായിക വകുപ്പ് സെക്രട്ടറി ശ്രീഹരി രഞ്ജന്‍ റാവുവുമായി കൂടിക്കാഴ്ച നടത്തി. ഖേലോ ഇന്ത്യ പദ്ധതി വഴി കായിക മേഖലയിലെ അടിസ്ഥാന സൗകര്യ വികസനത്തിനായി കേന്ദ്രസര്‍ക്കാര്‍ വരും ദിവസങ്ങളില്‍ കേരളത്തിന് കൂടുതല്‍ പദ്ധതികള്‍ അനുവദിക്കുമെന്നും ഇതുവഴി കായികരംഗത്തെ വന്‍ വളര്‍ച്ചയ്‌ക്ക് സംസ്ഥാനം സാക്ഷ്യംവഹിക്കുമെന്നും കൂടിക്കാഴ്ചയ്‌ക്ക് ശേഷം പി.ടി. ഉഷ അറിയിച്ചു.
തൃശൂര്‍ കോര്‍പറേഷന്‍ സ്റ്റേഡിയത്തില്‍ ഖേലോ ഇന്ത്യ പദ്ധതിയുടെ ഭാഗമായി നിര്‍ദേശിച്ചിരിക്കുന്ന സിന്തറ്റിക് എട്ട് ലൈന്‍ 400 മീറ്റര്‍ അത്ലറ്റിക് ട്രാക്കും സിന്തറ്റിക് ഫുട്ബോള്‍ ടര്‍ഫും നിര്‍മിക്കുന്നതിനുള്ള അനുമതിയും സാമ്പത്തിക സഹായവും ഉടന്‍ നല്‍കണമെന്ന് ഉഷ ആവശ്യപ്പെട്ടു. നിലവിലുള്ള സൗകര്യങ്ങളും മൈതാനത്തിന്റെ അവസ്ഥയും വിലയിരുത്തിയ ശേഷമാണ് കേന്ദ്ര കായിക മന്ത്രാലയം പദ്ധതിക്ക് പിന്തുണ അറിയിച്ചതെന്ന് അവര്‍ വ്യക്തമാക്കി. പുതിയ ട്രാക്കും ഫുട്ബോള്‍ ടര്‍ഫും പരിശീലന ഗുണനിലവാരം ഉയര്‍ത്തുന്നതിനും പ്രതിഭകളെ കണ്ടെത്തുന്നതിനും സംസ്ഥാന- ദേശീയതല മത്സരങ്ങള്‍ സംഘടിപ്പിക്കുന്നതിനും വലിയ പിന്തുണയാകുമെന്ന് അവര്‍ ചൂണ്ടിക്കാട്ടി.
കേന്ദ്രസര്‍ക്കാര്‍ ഉടന്‍ അനുകൂല നടപടി സ്വീകരിക്കുമെന്ന് കേന്ദ്ര കായിക വകുപ്പ് സെക്രട്ടറി ഉറപ്പ് നല്‍കിയതായി ഉഷ അറിയിച്ചു. തൃശൂരിനൊപ്പം സംസ്ഥാനത്തെ മറ്റ് ജില്ലകളില്‍ നിന്ന് ലഭിച്ച കായിക സംബന്ധമായ വിഷയങ്ങളും കേന്ദ്രകായിക സെക്രട്ടറിയുടെ ശ്രദ്ധയില്‍പ്പെടുത്തിയതായും അവര്‍ കൂട്ടിച്ചേര്‍ത്തു.
