തിരുവനന്തപുരം: മുഖ്യമന്ത്രി ചര്‍ച്ചകളിലെ മുസ്ലീം ലീഗ് ഇടപെടലില്‍ അതൃപ്തിയുമായി ക്രൈസ്തവ സഭകള്‍. വി ഡി സതീശനെ മുഖ്യമന്ത്രിയാക്കാന്‍ തീവ്ര നിലപാടുള്ള സംഘടനകള്‍ക്കായി ലീഗ് വഴിവിട്ട ഇടപെടല്‍ നടത്തുന്നതായാണ് ചില ക്രൈസ്തവ സഭകള്‍ പറയുന്നത്.
നിയുക്ത എംഎല്‍എമാരെ ഭീഷണിപ്പെടുത്തി വിഡിയോ പ്രചരിപ്പിക്കുന്നുവെന്ന് ആരോപണമുണ്ട്.ഇതിന് പിന്നില്‍ ജമാഅത്തെ ഇസ്ലാമിയും എസ്ഡിപിഐയും അടക്കമുള്ള വര്‍ഗീയ സംഘടനകളാണെന്നാണ് സഭകള്‍ കരുതുന്നത്. ഇക്കാര്യത്തില്‍ ചിലര്‍ക്ക് വ്യക്തമായ അജണ്ട ഉണ്ട്. ഇതിന് കോണ്‍ഗ്രസ് നേതൃത്വം തടയിടണമെന്നാണ് ആവശ്യം.
‘നീതിയും നിയമവാഴ്ചയും നടക്കണം.കേരളം യുഡിഎഫ് ഭരിക്കണമെന്ന ആഗ്രഹമാണ് ജനം തെരഞ്ഞെടുപ്പിലൂടെ പ്രകടിപ്പിച്ചത്. യുഡിഎഫിനെ നയിക്കുന്ന കോണ്‍ഗ്രസിനാണ് മുഖ്യമന്ത്രിയെ തീരുമാനിക്കാന്‍ ആത്യന്തികമായ അവകാശം. കോണ്‍ഗ്രസില്‍ മുഖ്യമന്ത്രിയെ തീരുമാനിക്കുന്നത് വൈകുന്നുണ്ടെങ്കിലും എല്ലാവരുമായി ചര്‍ച്ച നടത്തി തീരുമാനമെടുക്കുന്നത് നല്ലത് തന്നെ.പെട്ടെന്ന് ഒരു തീരുമാനമെടുത്ത് പ്രകോപനപരമായ സ്ഥിതി ഉണ്ടാകുന്നതിനേക്കാള്‍ നല്ലത് ആലോചിച്ചെടുക്കുന്ന തീരുമാനമാണെന്ന് സഭാ നേതൃത്വങ്ങള്‍ പറയുന്നു.
ഹൈക്കമാന്‍ഡ് തീരുമാനം ഇന്നോ നാളെയോ വരും എന്ന് പറയുമ്പോള്‍ അതിനെ അംഗീകരിക്കണം. ആരെ തെരഞ്ഞെടുക്കുന്നു എന്നത് ഹൈക്കമാന്‍ഡ് തീരുമാനമാണ്.
