റായ്പൂർ : ഛത്തീസ്ഗഡിൽ തണ്ണിമത്തൻ കഴിച്ച 15 കാരൻ മരിച്ചു . മൂന്നു കുട്ടികളെ ആശുപത്രിയിൽ പ്രവേശിപ്പിച്ചു. ഛത്തീസ്ഗഡിലെ ജഞ്ച്ഗീർ-ചമ്പ ജില്ലയിലെ പൊടി ദൽഹ സ്വദേശി അഖിലേഷ് ധീവറാണ് മരിച്ചത്. 12, 13, 4 വയസുള്ള മൂന്ന് കുട്ടികൾ ചികിത്സയിലാണ്.
ഞായറാഴ്ച വൈകുന്നേരമാണ് സംഭവം. ബന്ധുക്കൾക്കൊപ്പം അമ്മവീട്ടിൽ എത്തിയതായിരുന്നു കുട്ടികൾ. അവിടെ നിന്ന് മുറിച്ചുവെച്ചിരുന്ന തണ്ണിമത്തൻ കഴിച്ചിരുന്നു. ഏതാനും മണിക്കൂറുകൾക്ക് ശേഷം അഖിലേഷിന് ഛർദ്ദിയും വയറിളക്കവും ശ്വാസതടസവും അനുഭവപ്പെട്ടു. പിന്നീട് മറ്റ് മൂന്ന് കുട്ടികളിലും സമാനമായ ലക്ഷണങ്ങൾ കണ്ടു . ആശുപത്രിയിൽ എത്തിക്കുമ്പോഴേക്കും അഖിലേഷ് മരിച്ചിരുന്നു.
മുറിച്ചുവെച്ച തണ്ണിമത്തൻ മണിക്കൂറുകൾക്ക് ശേഷമാണ് കഴിച്ചതെന്നും ഇത് ഭക്ഷ്യ വിഷബാധയ്ക്ക് കാരണമായേക്കാമെന്നും ഡോക്ടർമാർ പറയുന്നു. വീട്ടിൽ ഉണ്ടായിരുന്ന മറ്റൊരു തണ്ണിമത്തൻ ഭക്ഷ്യസുരക്ഷാ വിഭാഗം ലബോറട്ടറി പരിശോധനയ്ക്കായി അയച്ചു. 15കാരന്റെ ശരീര സാംപിൾ ഫൊറൻസിക് പരിശോധനയ്ക്ക് വിധേയമാക്കും. മൃതദേഹം പോസ്റ്റ്മോർട്ടത്തിനായി അയച്ചു
