മലപ്പുറം: കോണ്ഗ്രസിലെ മുഖ്യമന്ത്രി ചര്ച്ച നീണ്ടു പോകവെ സാഹചര്യം ചര്ച്ച ചെയ്യാന് പാണക്കാട്ട് അടിയന്തര യോഗം വിളിച്ച് മുസ്ലിം ലീഗ്. ബുധനാഴ്ച രാവിലെ പത്ത് പണിക്ക് ആണ് യോഗം.
മുഖ്യമന്ത്രി പ്രഖ്യാപനം വൈകുന്നതിനിടെയാണ് ലീഗിന്റെ നേതൃയോഗമെന്നത് ശ്രദ്ധേയം.102 സീറ്റുകളുമായി വലിയ വിജയം നേടിയിട്ടും മുഖ്യമന്ത്രിയെ തീരുമാനിക്കാന് വൈകുന്നതില് മുസ്ലീം ലീഗിന് കടുത്ത അതൃപ്തിയുണ്ട്.ജനവികാരം കണക്കിലെടുക്കാതെ മുഖ്യമന്ത്രി ചര്ച്ചകളില് കോണ്ഗ്രസിന്റെ ഗ്രൂപ്പ് സമവാക്യങ്ങള്ക്ക് വലിയ പ്രാധാന്യം നല്കുന്നതില് ലീഗില് അതൃപ്തിയുണ്ടെന്നാണ് വിവരം.
മുഖ്യമന്ത്രി ആരാണെന്നതില് ലീഗിന്റെ അഭിപ്രായം തേടിയില്ലെങ്കിലും തീരുമാനമെടുത്താല് മാധ്യമങ്ങളെ അറിയിക്കും മുമ്പ് ലീഗ് നേതൃത്വത്തെ അറിയിക്കുമെന്നാണ് പാര്ട്ടിയുടെ പ്രതീക്ഷ. ഇന്ന് തന്നെ മുഖ്യമന്ത്രിയെ തീരുമാനിക്കാനും സാധ്യത ഉണ്ടെന്നും ലീഗ് കരുതുന്നു.
അതേസമയം, ബുധനാഴ്ച ചേരുന്ന യോഗത്തില് മന്ത്രിമാര് ആരൊക്കെയെന്ന കാര്യത്തില് തീരുമാനത്തിലെത്തിയേക്കും. പികെ കുഞ്ഞാലിക്കുട്ടി, പികെ ബഷീര്, കെഎം ഷാജി, എന് ഷംസുദ്ദീന് എന്നിവര്ക്കാണ് സാധ്യത എന്നാണ് സൂചന. അഞ്ചാം മന്ത്രിസ്ഥാനം ലഭിച്ചാല് മഞ്ചേശ്വരം എം എല് എ എകെഎം അഷറഫിന് നല്കിയേക്കും.
ഒരു മന്ത്രിസ്ഥാനംകൂടി ലഭിച്ചില്ലെങ്കില് സ്പീക്കര്, ഡെപ്യൂട്ടി സ്പീക്കര്, ചീഫ് വിപ്പ് സ്ഥാനങ്ങളിലൊന്ന് വേണമെന്നാണ് ലീഗ് താതപര്യം. എംകെ. മുനീറിനും കെപിഎ മജീദിനും ഔദ്യോഗിക പദവികളെന്തെങ്കിലും ഉറപ്പാക്കുന്നതിലും ബുധനാഴ്ചത്തെ യോഗത്തില് തീരുമാനമാകും. ഭരണപരിഷ്കാര കമ്മിഷന്, വയോജന കമ്മിഷന് അധ്യക്ഷസ്ഥാനങ്ങള് ലീഗ് ആവശ്യപ്പെടും.
