തിരുവനന്തപുരം: സിപിഎമ്മിന് ജനങ്ങള്‍ വോട്ട് ചെയ്യാത്ത കാരണം പാര്‍ട്ടി കുടുംബങ്ങളിലെത്തി അന്വേഷിക്കാന്‍ നീക്കം. പോളിറ്റ് ബ്യൂറോ കഴിഞ്ഞശേഷം ചേരുന്ന സംസ്ഥാന സെക്രട്ടേറിയറ്റിലും സംസ്ഥാന സമിതിയിലും ഇത് സംബന്ധിച്ച തീരുമാനം കൈക്കൊള്ളും. ജില്ലാ കമ്മറ്റികള്‍ ഇത് സംബന്ധിച്ച് പദ്ധതി തയ്യാറാക്കണം.
പാര്‍ട്ടി കുടുംബങ്ങള്‍ സിപിഎമ്മിനെ കൈവിട്ടുവെന്നാണ് വിലയിരുത്തല്‍. കണ്ണൂരില്‍ സംഭവിച്ചത് ഉദാഹരണമായി ചൂണ്ടിക്കാട്ടുന്നു. സര്‍ക്കാരിന്റെ വികസന പദ്ധതികള്‍ ഉള്‍ക്കൊള്ളിച്ച് കോടിക്കണക്കിന് നോട്ടീസുകള്‍ പുറത്തിറക്കി. ഇത് പാര്‍ട്ടി കുടുംബങ്ങളില്‍ പോലും എത്തിയില്ല. രണ്ടാം പിണറായി സര്‍ക്കാരിന്റെ പ്രവര്‍ത്തനങ്ങളില്‍ അവമതിപ്പ് ഉണ്ടാക്കിയിരുന്നു. തദ്ദേശ തെരഞ്ഞെടുപ്പില്‍ ഇത് പ്രകടമായി. ഇത് സംബന്ധിച്ച് സംസ്ഥാന സെക്രട്ടറി മുതല്‍ എല്ലാ നേതാക്കളും വീടുകളില്‍ പോയി അഭിപ്രായം ചോദിക്കാന്‍ തീരുമാനിച്ചിരുന്നു. സംസ്ഥാന സെക്രട്ടറി ഏതാനും വീടുകളില്‍ പോയി ഫോട്ടോ എടുത്തതല്ലാതെ കാര്യമായ പ്രവര്‍ത്തനം നടന്നില്ല.
കര്‍ശന നിര്‍ദ്ദേശം നല്‍കിയപ്പോള്‍ ശബരിമലയിലെ സ്വര്‍ണക്കൊള്ളയ്‌ക്ക് മറുപടി നല്‍കാന്‍ സാധിക്കാത്തതിനാല്‍ വീടുകളില്‍ പോകാന്‍ സാധിക്കുന്നില്ലെന്ന് പറഞ്ഞ് ഏരിയാ കമ്മറ്റികള്‍ തടിതപ്പി. മുതിര്‍ന്ന പ്രവര്‍ത്തകര്‍ നേതൃത്വത്തോട് ഇത് ചൂണ്ടിക്കാണിച്ചെങ്കിലും കാര്യമായെടുത്തില്ല. അതിനാല്‍ തോല്‍വിയുടെ കാരണം സംബന്ധിച്ച് കൂടുതല്‍ ആഴത്തില്‍ പഠിക്കാന്‍ തെരഞ്ഞെടുത്ത പാര്‍ട്ടി കുടുംബങ്ങളിലെത്തി വിവരങ്ങള്‍ ശേഖരിക്കണമെന്നാണ് തീരുമാനം.
