കൊല്‍ക്കത്ത: തന്റെ പിഎ ചന്ദ്രനാഥ് രഥിന്റെ കൊലപാതകത്തില്‍ പ്രതിഷേധിച്ച് ബംഗാളില്‍ ഒരു 5000 തൃണമൂല്‍ പ്രവര്‍ത്തകരെങ്കിലും കൊല്ലപ്പെടാവുന്ന സാഹചര്യം തന്റെ ഇടപെടലിലൂടെ ഒഴിവാക്കിയ ബിജെപി മുഖ്യമന്ത്രി സുവേന്ദു അധികാരിയെ പ്രശംസിച്ച് തൃണമൂല്‍ നേതാവ് റിജു ദത്ത. സുവേന്ദു അധികാരിയുടെ ഇടപെടല്‍ കാരണമാണ് വലിയൊരു കലാപവും കൂട്ടക്കൊലയും ഒഴിവായത്.- റിജു ദത്ത പറഞ്ഞു.
തെരഞ്ഞെടുപ്പ് കാലത്തും അതിന് മുന്‍പും ബിജെപിയെ അതിരൂക്ഷമായി വിമര്‍ശിക്കുകയും തൃണമൂല്‍ കോണ്‍ഗ്രസിന്റെ നയങ്ങള്‍ പൂര്‍ണ്ണമായും ന്യായകരിക്കുകയും ചെയ്ത നേതാവായിരുന്നു റിജു ദത്ത. പക്ഷെ തെരഞ്ഞെടുപ്പില്‍ തൃണമൂല്‍ തുടച്ചുനീക്കപ്പെട്ടതോടെ പൊടുന്നനെ സ്വരം മാറ്റുകയാണ് റിജു ദത്ത.
ഈ ബംഗാള്‍ നിയമസഭാ തെരഞ്ഞെടുപ്പ് കാലത്ത് തൃണമൂലിന് വേണ്ടി ബിജെപിയ്‌ക്കെതിരെ ആഞ്ഞടിച്ച നേതാവായ റിജു ദത്ത തൃണമൂലിന്റെ തോല്‍വിയോടെ മമതയെയും അഭിഷേക് ബനാര്‍ജിയെയും തെരഞ്ഞെടുപ്പ് പ്രചാരണത്തിന് ചുക്കാന‍് പിടിച്ച ഐ പാക് കമ്പനിയെയും തള്ളിപ്പറഞ്ഞിരുന്നു. ഇതോടെ കഴിഞ്ഞ ദിവസം തൃണമൂല്‍ റിജു ദത്തയെ സസ്പെന്‍റ് ചെയ്തിരിക്കുകയാണ്. ദീര്‍ഘകാലമായി തന്റെ സഹായിയായി പ്രവര്‍ത്തിച്ച യുവാവിനെ കൊലപ്പെടുത്തിയ സംഭവത്തില്‍ അങ്ങേയറ്റം സംയമനത്തോടെയാണ് സുവേന്ദു അധികാരി പ്രവര്‍ത്തിച്ചത്. അക്രമം കത്തിപ്പടരാതിരിക്കാന‍് അദ്ദേഹം പ്രത്യേകം ശ്രദ്ധിച്ചു. അതല്ലെങ്കില്‍ ഒരു 5000 തൃണമൂല്‍ പ്രവര്‍ത്തകരെങ്കിലും കൊല്ലപ്പെടേണ്ടതായിരുന്നു. – റിജു ദത്ത പറയുന്നു.
മെയ് ആറിനാണ് സുവേന്ദു അധികാരിയുടെ പിഎ ചന്ദ്രനാഥ് രഥ് വെടിയേറ്റ് കൊല്ലപ്പെട്ടത്. ഇതിന് പ്രതികാരം ചെയ്യാന്‍ സുവേന്ദു അധികാരി ആഹ്വാനം ചെയ്തിരുന്നെങ്കില്‍ 5000 തൃണമൂ്‍ല്‍ പ്രവര്‍ത്തകര്‍ കൊല്ലപ്പെടുമായിരുന്നു. ആ സാഹചര്യം സുവേന്ദു ഒഴിവാക്കി. – റിജു ദത്ത അഭിപ്രായപ്പെട്ടു.
സമാനതകളില്ലാത്തതാണ് സുവേന്ദു അധികാരിയുടെ രാഷ്‌ട്രീയ പാതയെന്നും മുഖ്യമന്ത്രി പദത്തിന് യോജിച്ചയാളാണ് സുവേന്ദു അധികാരിയെന്നും റിജു ദത്ത അവകാശപ്പെട്ടു. ഇന്ത്യയിലെ മികച്ച 10 രാഷട്രീയ നേതാക്കളെ എടുത്താല്‍ അതില്‍ മമത ഉണ്ടായിരിക്കും. പക്ഷെ സുവേന്ദു അധികാരിയുടെ ജീവിതം വ്യത്യസ്തമാണ്. അദ്ദേഹം എംപി ആയിരുന്നു. കാബിനറ്റ് മന്ത്രിയായിരുന്നു. നന്ദിഗ്രാമിലും ഭവാനിപൂരിലെ മമതയെ തോല്‍പിച്ച വ്യക്തിയാണ്. ബംഗാളിന്റെ മുഖ്യമന്ത്രിക്കസേരയില്‍ ഇരിക്കാന്‍ എന്തുകൊണ്ടും യോഗ്യനാണ് സുവേന്ദു അധികാരി.- റിജു ദത്ത പറഞ്ഞു.
