കോഴിക്കോട്: സര്വജനങ്ങള്ക്കും സൗഖ്യവും ഹിതവും ലഭ്യമാക്കി ഭാരതത്തെ സശക്തവും സമൃദ്ധവുമാക്കണമെന്ന ലക്ഷ്യമാണ് ബിഎംഎസ് മുന്നോട്ട് വെച്ചതെന്ന് ആര്എസ്എസ് അഖിലഭാരതീയ കാര്യകാരി അംഗം സുരേഷ് ജോഷി. ബിഎംഎസ് കോഴിക്കോട് ജില്ലാ സമിതി നിര്മിച്ച ദത്തോപാന്ത് ഠേംഗ്ഡി ഭവന്റെ ഉദ്ഘാടനം നിര്വഹിച്ച ശേഷം സംസാരിക്കുകയായിരുന്നു അദ്ദേഹം.
ബിഎംഎസ് തൊഴില് രംഗത്തെ മുതലാളിയെന്നും തൊഴിലാളിയെന്നും വേര്തിരിച്ചുകാണാതെ ഒരു കുടുംബമായി പരിഗണിച്ചു. തൊഴിലുടമയെ ശത്രുവായി കണ്ട് സംഘര്ഷത്തിന്റെ പാതയിലേക്കല്ല ബിഎംഎസ് നയിച്ചത്. തൊഴിലാളി സമൂഹത്തില് രാജ്യസ്നേഹവും രാജ്യ പുരോഗതിക്ക് വേണ്ടിയുള്ള ആശയവും ബിഎംഎസ് മുന്നോട്ട് വെച്ചു. അടിത്തട്ടില് കിടക്കുന്നവരുടെ നന്മയും ഉയര്ച്ചയും ലക്ഷ്യമാക്കിയാണ് ബിഎംഎസ് പ്രവര്ത്തിച്ചത്. ലോകം മുഴുവന് ഒരു കുടുംബമാണെന്ന ശ്രേഷ്ഠ വിചാരത്തിന്റെ അടിസ്ഥാനത്തിലാണ് അത് ഊന്നി നിന്നത്. അവകാശത്തിന്റെ ഭാഷ മാത്രമല്ല കര്ത്തവ്യ നിര്വഹണത്തിന്റെ പ്രാധാന്യത്തെയും ബിഎംഎസ് മുന്നോട്ട് വെച്ചു. ഈ ആശയത്തിന് ഇന്ന് സര്വ സ്വീകാര്യത കിട്ടിയിരിക്കുന്നു. സമന്വയത്തിന്റെ ദര്ശനത്തിന് ആദരവും പരിഗണനയും ലഭിക്കുന്നു. കമ്യൂണിസ്റ്റ് തൊഴിലാളി സംഘടനയും ബിഎംഎസും ഒരേ കാലത്താണ് ആരംഭിച്ചതെങ്കിലും തൊഴിലാളി സമൂഹത്തില് പടര്ന്ന് പന്തലിക്കാന് ബിഎംഎസിന് കഴിഞ്ഞിരിക്കുന്നു. കമ്യൂണിസ്റ്റ് പ്രസ്ഥാനവും ആശയവും അസ്തമിച്ചിരിക്കുന്നു. അദ്ദേഹം പറഞ്ഞു.
കാര്യാലയനിര്മാണ സമിതി ചെയര്മാനും ആദ്ധ്യാത്മിക പ്രഭാഷകനുമായ എ.കെ.ബി. നായര് ആമുഖ പ്രഭാഷണം നടത്തി. ബിഎംഎസ് ദേശീയ അദ്ധ്യക്ഷന് എസ്. മല്ലേശം മുഖ്യപ്രഭാഷണം നടത്തി. തൊഴിലാളികളുടെ വിയര്പ്പില് നിന്നും വരുമാനത്തില് നിന്നുമുള്ള പണം ഉപയോഗിച്ചാണ് ഠേംഗ്ഡി ഭവന് പണിതത് എന്നത് അഭിമാനകരമായ കാര്യമാണെന്ന് അദ്ദേഹം പറഞ്ഞു. ലോകത്തിലെ ഏറ്റവും വലിയ തൊഴിലാളി പ്രസ്ഥാനമായി ഭാരതീയ മസ്ദൂര് സംഘം മാറിയിരിക്കുന്നു. ബിഎംഎസിന്റെ എഴുപത് വര്ഷത്തെ സംഘടനാ യാത്ര അഭിമാനകരമാണ്. എഐടിയുസി, ഐഎന്ടിയുസി, സിഐടിയു, എച്ച്എംഎസ് മുതലായ തൊഴിലാളി സംഘടനകള് തൊഴിലാളികളുടെ താത്പര്യത്തിന് വിരുദ്ധമായി പ്രവര്ത്തിച്ച് വിഭജിക്കപ്പെട്ടുപോയിരിക്കുന്നു. സര്വരാജ്യ തൊഴിലാളികളെ സംഘടിക്കുവിന് എന്ന ആശയം അപ്രായോഗികമാണെന്ന് തെളിഞ്ഞിരിക്കുന്നു. ”തൊഴിലാളികളെ സര്വലോകത്തെയും സംഘടിപ്പിക്കുവിന്” എന്ന ആശയത്തിനാണ് ശാശ്വത നിലനില്പ്പ്. വസുധൈവ കുടുംബകം എന്ന ദര്ശനത്തെ മുന്നിര്ത്തി തൊഴിലാളികളെ സര്വലോകത്തെയും സംഘടിപ്പിക്കുവിന് എന്ന ആശയത്തിനാണ് ഇന്ന് അംഗീകാരം ലഭിക്കുന്നത്.
ഭാരതം തൊഴിലാളികളുടെ നാടാണ്. രാജ്യതാത്പര്യം മുന്നിര്ത്തി തൊഴിലാളി സമൂഹം പ്രവര്ത്തിക്കണം. പാശ്ചാത്യ പ്രത്യയശാസ്ത്രങ്ങള് സംഘര്ഷത്തിന്റെ ആശയമാണ് മുന്നോട്ട് വെയ്ക്കുന്നത്. ആ വീക്ഷണങ്ങള്ക്ക് ഇന്ന് നിലനില്പ്പ് ഇല്ലാതായിരിക്കുന്നു. ദേശീയ ബോധമുള്ള തൊഴിലാളി, തൊഴിലാളിവത്കൃത വ്യവസായം, വ്യവസായവത്കൃത രാഷ്ട്രം എന്ന ആശയത്തിലൂന്നി നിന്നുകൊണ്ട് ബിഎംഎസ് മുന്നേറുന്നു. അദ്ദേഹം പറഞ്ഞു. ബിഎംഎസ്ജില്ലാ പ്രസിഡന്റ് സി.പി. രാജേഷ് അധ്യക്ഷനായി. ആര്എസ്എസ് ഉത്തരകേരളം പ്രാന്ത സംഘചാലക് അഡ്വ. കെ.കെ. ബാലറാം, ബിഎംഎസ് മുന് ദേശീയ അധ്യക്ഷന് അഡ്വ. സി.കെ. സജിനാരായണന്, മുന് സംസ്ഥാന സംഘടനാ സെക്രട്ടറി കെ. ഗംഗാധരന്, ബിഎംഎസ് സംസ്ഥാന അധ്യക്ഷന് ശിവജി സുദര്ശന്, ദക്ഷിണ ക്ഷേത്രീയ സംഘടനാ സെക്രട്ടറി എം.പി. രാജീവന്, ടി.എം.പ്രശാന്ത്, എ. ശശീന്ദ്രന് തുടങ്ങിയവര് പങ്കെടുത്തു.
