തൊടുപുഴ: വിലപിടിപ്പുള്ള പശുക്കളെ മോഷ്ടിച്ച് വില്‍പന നടത്തി വന്ന മുസ്ലിം ലീഗ് നേതാവ് അറസ്റ്റില്‍. വണ്ണപ്പുറം വെള്ളിക്കുളത്തില്‍ വി.എച്ച്. നിയാസ് (40)നെയാണ് തൊടുപുഴ പോലീസ് അറസ്റ്റ് ചെയ്തത്. പശുക്കളില്‍ പലതിനെയും കശാപ്പുകാര്‍ക്ക് നല്‍കിയതായും ആക്ഷേപമുണ്ട്.
വണ്ണപ്പുറം, കരിമണ്ണൂര്‍, കോടിക്കുളം, കലൂര്‍ ഭാഗങ്ങളില്‍ നിന്ന് മാസങ്ങളായി പശുക്കള്‍ മോഷണം പോയിരുന്നു. കഴിഞ്ഞ ദിവസം തൊടുപുഴ പോലീസ് സ്റ്റേഷന്‍ പരിധിയിലുള്ള ഈസ്റ്റ് കലൂര്‍ പ്രദേശത്തുള്ള ആനിമൂട്ടില്‍ കുര്യന്‍, തട്ടാംകുടിയില്‍ ടി.പി. ശശിധരന്‍ എന്നിവരുടെ പശുക്കളെ നിയാസ് മോഷ്ടിച്ചു. ഇവരുടെ പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് ചൊവ്വാഴ്ച രാത്രി വണ്ണപ്പുറത്തെ വീട്ടില്‍ നിന്ന് നിയാസിനെ തൊടുപുഴ പോലീസ് പിടികൂടിയത്.
ഇയാളുടെ ഭാര്യ നസിയ വണ്ണപ്പുറം ഗ്രാമപഞ്ചായത്ത് അംഗമാണ്. എച്ച്എഫ് ഇനം പശുക്കളെയാണ് ഇയാള്‍ മോഷ്ടിച്ചിരുന്നത്. മോഷ്ടിക്കുന്ന പശുക്കളെ പാലക്കാട് പ്രദേശത്താണ് കൂടുതലായും വിറ്റിരുന്നത്. ഇയാളുടെ മൂത്തസഹോദരന്‍ കശാപ്പുകാരനാണ്. വില്‍ക്കാന്‍ കഴിയാത്ത പശുക്കളെ കശാപ്പ് ചെയ്ത് വിറ്റതായും നാട്ടുകാര്‍ ആരോപിക്കുന്നു.
ലീഗ് നേതാവായ പഞ്ചായത്തംഗത്തിന്റെ ഭര്‍ത്താവിനെ മോഷണകേസില്‍ അറസ്റ്റ് ചെയ്തതോടെ ലീഗ് നേതാക്കള്‍ പോലീസ് സ്റ്റേഷനിലെത്തി പ്രതിയെ രക്ഷിക്കാനുള്ള ഇടപെടല്‍ നടത്തിയിരുന്നുവെന്നും ആരോപണമുണ്ട്. പോലീസ് വഴങ്ങാതെ വന്നതോടെ പശു നഷ്ടപ്പെട്ടവര്‍ക്ക് പണം നല്‍കി പ്രശ്നം ഒത്തുതീര്‍പ്പാക്കാനും ലീഗ് നേതൃത്വം ശ്രമിച്ചെങ്കിലും വിജയം കണ്ടില്ല. പോലീസ് പ്രതി നിയാസുമായി മോഷണം നടന്ന സ്ഥലത്തെത്തി തെളിവെടുപ്പുനടത്തി.
