പഞ്ചാബിലെ മൊഹാലി അന്താരാഷ്ട്ര വിമാനത്താവളത്തിൽ വിമാനം ലാൻഡ് ചെയ്തതിന് പിന്നാലെ യാത്രക്കാരന്റെ കൈവശമുണ്ടായിരുന്ന പവർ ബാങ്കിന് തീപിടിച്ചത് കഴിഞ്ഞ ദിവസമാണ്. വിമാനം റൺവേയിലൂടെ നീങ്ങിക്കൊണ്ടിരിക്കെയാണ് പവർ ബാങ്ക് പൊട്ടിത്തെറിച്ചതും വിമാനത്തിന്റെ കാബിനുള്ളിൽ കടുത്ത പുക നിറഞ്ഞതും.
പവർബാങ്കുകളിൽ ഉപയോഗിക്കുന്ന ലിഥിയം-അയൺ ബാറ്ററികൾക്ക് ഉള്ളിൽ സംഭവിക്കുന്ന തെർമൽ റൺവേ എന്ന പ്രക്രിയയാണ് ഇത്തരം തീപിടുത്തങ്ങൾക്ക് പിന്നിൽ. ബാറ്ററിക്കുള്ളിലെ കെമിക്കൽ സെല്ലുകൾക്ക് കേടുപാടുകൾ സംഭവിക്കുമ്പോൾ അവ അമിതമായി ചൂടാകുകയും, ആ ചൂട് തൊട്ടടുത്ത സെല്ലുകളിലേക്ക് പടർന്ന് നിമിഷങ്ങൾക്കുള്ളിൽ തീപിടുത്തമോ പൊട്ടിത്തെറിയോ ഉണ്ടാവുകയും ചെയ്യുന്നു.
പവർബാങ്കുകൾ സീറ്റ് പോക്കറ്റിൽ വെക്കുമ്പോൾ സീറ്റിലിരിക്കുന്ന യാത്രക്കാരന്റെ സമ്മർദ്ദം മൂലം ബാറ്ററിക്കുള്ളിലെ സെപ്പറേറ്ററുകൾക്ക് തകരാർ സംഭവിക്കാം.വില കുറഞ്ഞ പവർബാങ്കുകളിൽ ഓവർചാർജിങ് തടയാനുള്ള സുരക്ഷാ സംവിധാനങ്ങൾ (BMS – Battery Management System) കാര്യക്ഷമമാകില്ല.ലിഥിയം ബാറ്ററികൾ കത്തുമ്പോൾ പുറത്തുവിടുന്നത് സാധാരണ പുകയല്ല. ഇതിൽ അടങ്ങിയിരിക്കുന്ന ഹൈഡ്രജൻ ഫ്ലൂറൈഡ് (Hydrogen Fluoride) പോലുള്ള വാതകങ്ങൾ ശ്വസിക്കുന്നത് ആരോഗ്യത്തിന് അതീവ ഹാനികരമാണ്. വിമാനം പോലെ അടച്ചിട്ട ഇടങ്ങളിൽ ഇത് പെട്ടെന്ന് പടരുന്നത് യാത്രക്കാർക്ക് ശ്വാസംമുട്ടലിനും കാഴ്ച മങ്ങുന്നതിനും കാരണമാകും.
