മുംബൈ: രാമായണകഥ ആസ്പദമാക്കി രണ്ട് സിനിമകള്‍ ഇറങ്ങാനിരിക്കുകയാണ്. രണ്ടും ശതകോടികളുടെ ബ്രഹ്മാണ്ഡ സിനിമകളാണ്. ഈ രണ്ട് സിനിമകളില്‍ സംഗീതം ചെയ്യുന്നത് ഇന്ത്യന്‍ ചലച്ചിത്രരംഗത്തെ ലെജന്‍റുകളായ രണ്ട് സംഗീതസംവിധായകരാണ്. രണ്ട് തലമുറയില്‍പെട്ട സംഗീത സംവിധായകര്‍. നിതേഷ് തിവാരി സംവിധാന ചെയ്യുന്ന രാമായണ എന്ന സിനിമയ്‌ക്ക് സംഗീതം ചെയ്യുന്നത് എ.ആര്. റഹ്മാനാണ്. ഭാവ്ന തൽവാർ സംവിധാനം ചെയ്യുന്ന വാല്മീകി രാമയണം എന്ന സിനിമയ്‌ക്ക് സംഗീതം ചെയ്യുന്നത് ഇളയരാജയും. .
തന്റെ ജീവിതത്തിലെ ഒരു വലിയ സംഗീത പദ്ധതിയായിത്തന്നെയാണ് എ.ആര്. റഹ്മാന്‍ രാമായണത്തെ എടുത്തിരിക്കുന്നത്. ഓസ്കാര്‍ അവാര്‍ഡ് നേടിയ ഹാന്‍സ് സിമ്മറുമായി സഹകരിച്ചാണ് റഹ്മാന്‍ ഇതിലെ സംഗീതം ഒരുക്കുന്നത്. മറ്റൊരു ഓസ്കാര്‍ തന്നെ ലക്ഷ്യമിട്ടാണ് റഹ്മാന്‍ ഈ സിനിമയ്‌ക്കായി ഒരുങ്ങുന്നത്. സംഗീതസംവിധാനത്തിന് വേണ്ടി മാത്രം റഹ്മാന്‍ വാങ്ങുന്നത് 30 കോടി രൂപയാണ്. ഇന്ത്യന്‍ സിനീമാചരിത്രത്തില്‍ ഇത്രയും വലിയ തുക ഒരു സംഗീതസംവിധായകന് നല്കുന്നത് റെക്കോഡാണ്. ഈ സിനിമയില്‍ രാമനായി വേഷമിടുന്നത് രണ്‍ബീര്‍ കപൂറാണെങ്കില്‍ സീതയായി സായി പല്ലവിയാണ്. രാവണനായി വില്ലന്‍ വേഷത്തില്‍ യാഷ് എത്തുന്നു. ഈ സിനിമയുടെ ട്രെയിലര്‍ മൂന്ന് മാസം മുന്‍പ് പുറത്തിറങ്ങി. ലോകം കുഴപ്പത്തിലേക്ക് വീഴുമ്പോള്‍ അവന്‍ എത്തുന്നു എന്ന വാചകമാണ് ട്രെയിലറിന്റെ ഹൈലൈറ്റ്. യൂട്യൂബില്‍ മൂന്ന് മില്യണ്‍ വ്യൂസ് ആണ് ഈ ട്രെയിലര്‍ നേടിയത്.
“വാല്മീകി രാമായണം” എന്ന സംസ്കൃതത്തില്‍ എഴുതപ്പെട്ട ഇതിഹാസത്തിന്റെ ഹിന്ദി സിനിമാപതിപ്പാണ് വാല്മീകി രാമായണ എന്ന പേരില്‍ പുറത്തിറങ്ങാന്‍ പോകുന്ന ഭാവ്ന തൽവാർ സംവിധാനം ചെയ്യുന്ന സിനിമ. ഇതില്‍ ഇളയരാജയാണ് സംഗീതം. ഒരു ആത്മീയ വിന്യാസം… എന്നാണ് .’വാല്മീകി രാമായണ” സിനിമയ്‌ക്ക് സംഗീതം ചെയ്യാന്‍ ഇളയരാജ എത്തിയതിനെ സിനിമാവ്യവസായ അനലിസ്റ്റായ തരുണ്‍ ആദര്‍ശ് വിശേഷിപ്പിച്ചത്. ഒറിജിനല്‍ സംഗീതത്തിന് പേരുകേട്ട സംഗീത സംവിധായകനാണ് ഇളയരാജ. ഒരുൂ സംഗീത ആവാഹനം എന്നാണ് ഈ പദ്ധതിയെ ഇളയരാജ വിശേഷിപ്പിക്കുന്നത്. പണം വാങ്ങിച്ചെയ്യുന്ന ഒരു സംഗീത വര്‍ക്ക് എന്നതിനേക്കാള്‍ ഒരു ആത്മീയ വഴിപാടായാണ് ഇളയരാജ ഈ പദ്ധതിയെ കാണുന്നത്. ഇതുവരെ ഈ സിനിമയുടെ ഒരു പോസ്റ്റര്‍ മാത്രമാണ് പുറത്തുവിട്ടിരിക്കുന്നത്. ശ്രീരാമ പാദങ്ങളുടെ ചിത്രമാണ് നിര്‍മ്മാതാക്കള്‍ പുറത്തുവിട്ടത്. ലോകത്ത് പര്‍വ്വതങ്ങള്‍ നില്‍ക്കുന്നിടത്തോളം നദികള്‍ ഒഴുകുന്നിടത്തോലം രാമായണം നിലനില്‍ക്കുമെന്നും ഈ പോസ്റ്ററിനൊപ്പം നിര്‍മ്മാതാക്കള്‍ കുറിക്കുന്നു.
ഭാവനാതല്‍വാറിന്റെ വാല്മീകി രാമായണ 2026 ഒക്ടോബർ 2 ന് തിയേറ്ററുകളിൽ റിലീസ് ചെയ്യാൻ ഒരുങ്ങുകയാണ്.തൊട്ടടുത്ത മാസം നവമ്പറില്‍ തന്നെ റഹ്മാന്‍ സംഗീത സംവിധാനം നിര്‍വ്വഹിക്കുന്ന രാമായണ തീയറ്ററുകളിലെത്തും.
രണ്ട് സംഗീത ലെജന്‍റുകള്‍ ഏറ്റുമുട്ടുമ്പോള്‍ ആരുടെ സംഗീതമാണ് ജനപ്രിയമാവുക? ആരുടെ സംഗീതത്തിനാണ് ആഗോള അംഗീകാരം ലഭിയ്‌ക്കുക? സംഗീതപ്രേമികള്‍ ആകാംക്ഷയോടെ കാത്തിരിക്കുന്നു.
