ചെന്നൈ: തമിഴ്‌നാട് നിയമസഭാ തിരഞ്ഞെടുപ്പില്‍ ടി വി കെയ്‌ക്ക് അമ്പരപ്പിക്കുന്ന വിജയം നേടിക്കൊടുത്ത് മുഖ്യമന്ത്രി കസേരയുറപ്പിച്ചിരിക്കുകയാണ് സൂപ്പര്‍ താരം വിജയ്.കന്നിയങ്കത്തില്‍ മത്സരിച്ച രണ്ട് സീറ്റുകളിലും വിജയിച്ച വിജയ് ഒരു സീറ്റ് രാജി വക്കും.പെരമ്പൂരിലും ട്രിച്ചി ഈസ്റ്റിലും ജയിച്ച വിജയ് ട്രിച്ചി സീറ്റ് രാജിവെക്കുമെന്നാണ് വിവരം.
അങ്ങനെയെങ്കില്‍ ട്രിച്ചി സീറ്റില്‍ നടി തൃഷ കൃഷ്ണ മത്സരിച്ചേക്കുമെന്നാണ് വിവരം. എന്നാല്‍ ഇതിന് ഔദ്യോഗികമായ സ്ഥിരീകരണങ്ങളൊന്നുമില്ല. വിജയ്യുമായി ചേര്‍ത്ത് തൃഷയുടെ പേര് രാഷ്‌ട്രീയ ചര്‍ച്ചകളില്‍ സജീവമാണ്.
തിരുച്ചിറപ്പള്ളി ജില്ലയിലാണ് ട്രിച്ചി ഈസ്റ്റ് നിയമസഭാ മണ്ഡലം.നഗരപ്രദേശങ്ങള്‍ കൂടുതലുള്ള ന്യൂനപക്ഷ ജനസംഖ്യ നിര്‍ണയകമായ മണ്ഡലം. വെള്ളാളര്‍ സമുദായത്തില്‍ നിന്നുള്ള ക്രിസ്ത്യന്‍ വോട്ടാണ് മണ്ഡലത്തില്‍ കൂടുതലുളളത്. ന്യൂനപക്ഷ വോട്ട് അനുകൂലമാകുമെന്ന ടിവികെ പ്രതീക്ഷ ശരിയായിരുന്നു.2700ത്തിലേറെ വോട്ടിന്റെ ഭൂരിപക്ഷത്തില്‍ വിജയ് വിജയിച്ച ഈ സീറ്റിലാകും തൃഷ കൃഷ്ണ മത്സരിക്കുകയെന്നാണ് അഭ്യൂഹം.ടി വി കെ മിന്നും പ്രകടനം കാഴ്ചവച്ചതിന് പിന്നാലെ തൃഷ വീട്ടിലെത്തി വിജയെ കണ്ടിരുന്നു.
തൃഷയുടെ പിറന്നാള്‍ ദിനത്തില്‍ ടിവികെയുടെ പതാകയുടെ നിറത്തിലുള്ള ഷാള്‍ പുതച്ച് ക്ഷേത്ര ദര്‍ശനം നടത്തിയതും വലിയ മാധ്യമ ശ്രദ്ധ നേടിയിരുന്നു. തൃഷയുടെ പിറന്നാള്‍ ദിനത്തിലായിരുന്നു വോട്ടെണ്ണല്‍ എന്നത് മറ്റൊരു യാദൃശ്ചികതയായി.തെരഞ്ഞെടുപ്പിന് തൊട്ടു മുമ്പാണ് വിജയ്‌ക്കെതിരെ ഭാര്യ വിവാഹമോചന കേസ് ഫയല്‍ ചെയ്തത്. ഇതോടെ വിജയ് തൃഷ ബന്ധം തിരഞ്ഞെടുപ്പിലും വലിയ ചര്‍ച്ചയായി.
സര്‍ക്കാര്‍ രൂപീകരിക്കാന്‍ 108 എംഎല്‍എമാരുള്ള ടിവികെയ്‌ക്ക് ഇനി 10 പേരുടെ പിന്തുണ കൂടി വേണം.അതിനുളള നീക്കങ്ങളും സജീവമാണ്.
