കണ്ണൂര്: നിയമസഭാ തെരഞ്ഞെടുപ്പിലെ കനത്ത തിരിച്ചടിക്ക് പിന്നാലെ സി.പി.എം സംസ്ഥാന സെക്രട്ടറി എം.വി ഗോവിന്ദനും ജില്ലാ സെക്രട്ടറി കെ.കെ രാഗേഷിനുമെതിരെ കണ്ണൂരിന്റെ വിവിധ ഭാഗങ്ങളില് പോസ്റ്ററുകള് . ‘മോറാഴ സഖാക്കള്’ എന്ന പേരിലാണ് ധര്മ്മശാലയിലും ആന്തൂരിലും പാര്ട്ടി നേതൃത്വത്തെ വെല്ലുവിളിച്ചുള്ള പോസ്റ്ററുകള് പതിച്ചിരിക്കുന്നത്.
‘പൊതുമണ്ഡലങ്ങളില് പാര്ട്ടിക്ക് അവമതിപ്പുണ്ടാക്കുന്ന പാര്ട്ടി സംസ്ഥാന സെക്രട്ടറിയെയും ജില്ലാ സെക്രട്ടറിയെയും മാറ്റുക’ എന്നതാണ് പോസ്റ്ററുകളിലെ പ്രധാന ആവശ്യം.എം.വി ഗോവിന്ദന്റെയും കെ.കെ രാഗേഷിന്റെയും പേരെടുത്ത് പറഞ്ഞാണ് വിമര്ശനം.പാര്ട്ടിക്ക് വലിയ സ്വാധീനമുള്ള ധര്മ്മശാലയിലും ആന്തൂരിലും ഇത്തരമൊരു പരസ്യ പ്രതിഷേധം ഉയര്ന്നത് സി.പി.എം നേതൃത്വത്തെ ഞെട്ടിച്ചു.
പയ്യന്നൂരിലെ ഫണ്ട് വിവാദം, തുടര്ന്നുളള അച്ചടക്ക നടപടി എന്നിവ പാര്ട്ടി പ്രവര്ത്തകര്ക്കിടയില് വലിയ അതൃപ്തി ഉണ്ടാക്കിയിരുന്നു. പയ്യന്നൂരിലെ പ്രമുഖ നേതാവ് വി. കുഞ്ഞികൃഷ്ണനെതിരെയുള്ള അച്ചടക്ക നടപടിയും കെ.കെ രാഗേഷിന്റെ നിലപാടുകളുമാണ് ഒരു വിഭാഗം പ്രവര്ത്തകരെ ചൊടിപ്പിച്ചത്.
പോസ്റ്ററുകള് ശ്രദ്ധയില്പ്പെട്ട ഉടന് തന്നെ പാര്ട്ടി പ്രവര്ത്തകര് എത്തി കീറിക്കളഞ്ഞു.എന്നാല്, പോസ്റ്ററുകളുടെ ചിത്രങ്ങള് സോഷ്യല് മീഡിയയില് വ്യാപകമായി പ്രചരിക്കുന്നുണ്ട്. വിഷയത്തില് സി.പി.എം ജില്ലാ നേതൃത്വം ഔദ്യോഗികമായി പ്രതികരിച്ചിട്ടില്ല.
