കാസര്കോട്: കേരളത്തില് ഇടത് മുന്നണി ദനീയ തോല്വി ഏറ്റുവാങ്ങിയപ്പോള് കാസര്കോട് ജില്ലയില് ഡീല് സമവാക്യത്തില് മുന്നണിയിയിലെ സിപിഎം ജില്ലയില് ഔട്ടായി. അഞ്ച് മണ്ഡലങ്ങളിലെ തെരെഞ്ഞെടുപ്പ് ഫലം വന്നപ്പോള് കുത്തകയായി അടക്കിവെച്ചിരുന്ന ഉദുമയും തൃക്കരിപ്പൂരിലും തോല്വി ഏറ്റുവാങ്ങി വട്ടപൂജ്യമായി. മഞ്ചേശ്വരത്തും ഉദുമയിലും സിപിഎമ്മില് വന് വോട്ട് ചോര്ച്ച.
മുസ്ലീംലീഗുമായുള്ള ഡീല് സമവാക്യത്തിന്റെ ഭാഗമായി മഞ്ചേശ്വരത്ത് 19427 വോട്ടുകളാണ് 2021ലെ നിയസഭ തെരെഞ്ഞെടുപ്പ് കണക്ക് വിലയിരുത്തുമ്പോള് സിപിഎമ്മിന് നഷ്ടമായത്. 2016ല് 4256 വോട്ട് നേടിയ സിപിമ്മിന് 2021ല് 40639 ആയി കുറഞ്ഞു. ഇത്തവണ ലഭിച്ചതാകട്ടെ 21212 വോട്ടുകള് മാത്രം. ഉദുമയില് കഴിഞ്ഞ തവണത്തെക്കാള് 4601 വോട്ട് കുറവാണ്.
കഴിഞ്ഞ 39 വര്ഷം തുടര്ച്ചയായി സിപിഎം സ്ഥാനാര്ത്ഥി ജയിച്ചിരുന്ന ഉദുമയില് രണ്ടാം അങ്കത്തിനിറങ്ങിയ സി.എച്ച്. കുഞ്ഞമ്പു കോണ്ഗ്രസ് സ്ഥാനാര്ത്ഥി കെ.നീലകണ്ഠനോട് 4847 വോട്ടിന് അടിയറവ് പറഞ്ഞു. തൃക്കരിപ്പൂരിലാവട്ടെ സിപിഎമ്മിന്റെ സമുന്നതനായ നേതാവ് വി.പി.പി.മുസ്തഫ 4431 വോട്ടിനാണ് കോണ്ഗ്രസിലെ സന്ദീപ് വാര്യറില് നിന്ന് തോല്വി ഏറ്റുവാങ്ങിയത്.
1977ല് മണ്ഡലം നിലവില് വന്ന ശേഷം നടത്തിയ 10 തിരഞ്ഞെടുപ്പുകളിലും വിജയക്കൊടി നാട്ടിയത് ഇടതുപക്ഷമാണ്. ഇ.കെ. നായനാര് മത്സരിക്കുന്നതിന് തൃക്കരിപ്പൂര് തെരഞ്ഞെടുത്തത് ചുവപ്പിന്റെ കരുത്തിലാണ്. മണ്ഡലം പിറന്നത് മുതല് ഇടതുമുന്നണിയില് സിപിഎം മാത്രമാണ് ഇവിടെ മത്സരിക്കുന്നത്.അതിനാല് തന്നെ ഇത്തവണയും വിജയത്തില് കുറഞ്ഞതൊന്നും ഇടതുപക്ഷവും സിപിഎമ്മും പ്രതീക്ഷിച്ചിരുന്നില്ല.
കഴിഞ്ഞ നിയമസഭാ തെരഞ്ഞെടുപ്പില് സിപിഎമ്മിലെ എം.രാജഗോപാലന് 79286 വോട്ട് നേടി. യുഡിഎഫിലെ കെ.പി.കുഞ്ഞിക്കണ്ണന് നേടാനായത് 62327 വോട്ടുകളാണ്. 16959 വോട്ടുകളുടെ ഭൂരിപക്ഷത്തില് ഇടതുമുന്നണി പാരമ്പര്യം തുടര്ന്നു.കാഞ്ഞങ്ങാട് മണ്ഡലത്തില് സിപിഐയുടെ ഗോവിന്ദന് പള്ളിക്കാപ്പില് സീറ്റ് നിലനിര്ത്തിയത് മാത്രമാണ് ഇടത് മുന്നണിക്ക് ജില്ലയില് ഏക ആശ്വാസം. കഴിഞ്ഞ നിരവധി വര്ഷം കാസര്കോട് ലോകസഭ സീറ്റും സിപിഎമ്മിനായിരുന്നുവെങ്കിലും രാജ്മോഹന് ഉണ്ണിത്താന്റെ വരവോടെ അതും നഷ്ടമായ സിപിഎമ്മിനെ ജനങ്ങള് പൂര്ണമായും കൈയ്യൊഴിഞ്ഞതിലൂടെ നേതൃത്വം തന്നെ പ്രതിരോധത്തിലായിരിക്കുകയാണ്.
ജില്ലയില് സിപിഎം ശക്തി കേന്ദ്രങ്ങളെന്നവകാശപ്പെടുന്ന ഓരോ പ്രദേശവും കൈവിട്ട് പോകുമ്പോള് ബിജെപി അടിവെച്ച് വോട്ട് വര്ദ്ധിപ്പിച്ച് മുന്നോട്ട് കുതിക്കുകയാണ്. മഞ്ചേശ്വരത്ത് കെ.സുരേന്ദ്രന് 65013 വോട്ട് നേടിയപ്പോള് ഇത്തവണ 65174 വോട്ട് നേടി നിലമെച്ചപ്പെടുത്തി. കാസര്കോട് മണ്ഡലത്തില് 2021ല് ബിജെപി 50395 വോട്ട് നേടിയപ്പോള് ജില്ലാ പ്രസിഡന്റുകൂടിയായ എം.എല്.അശ്വിനി 53698 വോട്ട് നേടി വര്ദ്ധിപ്പിച്ചു. ഉദുമയില് 39 വര്ഷത്തിന് ശേഷമാണ് യുഡിഎഫ് മണ്ഡലം തിരിച്ച് പിടിക്കുന്നത്. ഉദുമയില് ജില്ലാ ജനറല് സെക്രട്ടറിയായ മനുലാല് മേലത്ത് 20360 വോട്ടിലെ 26899 വോട്ടായി വര്ദ്ധിപ്പിച്ചു.
കാഞ്ഞങ്ങാട് മണ്ഡലത്തില് എം.ബല്രാജ് തന്നെയാണ് ഇത്തവണ ജനവിധി തേടിയത്. കഴിഞ്ഞ തവണ ലഭിച്ച 21570 വോട്ട് 27063 ആയി വര്ദ്ധിപ്പിച്ചു. മഞ്ചേശ്വരത്തും കാസര്കോട് ന്യൂനപക്ഷ ഏകീകരണമാണ് ഇത്തവണത്തെ തെരെഞ്ഞെടുപ്പില് പ്രതിഫലിച്ചതെന്നാണ് രാഷ്ട്രീയ നിരീക്ഷകര് വിലയിരുത്തുന്നത്. 1987ന് ശേഷം യുഡിഎഫിന് 4 എംഎല്എമാര് എന്നതും ചരിത്രമായി മാറിയിരിക്കുകയാണ്.
