തിരുവനന്തപുരം: കായിക രംഗത്തുള്ളവരുടെ പരിക്കുകള്‍ക്ക് കൃത്യതയേറിയ നിര്‍ണ്ണയവും ചികിത്സയും നല്‍കുന്ന അത്യാധുനിക ആര്‍ത്രോസ്‌കോപ്പിക് ശസ്ത്രക്രിയാ രീതികള്‍ ചര്‍ച്ച ചെയ്തു കൊണ്ട് അന്താരാഷ്ട്ര കായിക ശസ്ത്രക്രിയ സമ്മേളനം ‘ ട്രിവാന്‍ഡ്രം ആര്‍ത്രോസ്‌കോപ്പി കോഴ്സ് ‘ (ടി.എ.സി 2026). കോവളത്ത് നടന്ന സമ്മേളനം തിരുവനന്തപുരം അല്‍ അരിഫ് ആശുപത്രിയും ആര്‍ത്രോലേണ്‍ എന്ന സംഘടനയും ചേര്‍ന്നാണ് സമ്മേളനം സംഘടിപ്പിച്ചത്. കോഴ്സ് ചെയര്‍മാന്‍ ഡോ. ഷമ്മാസ് ബി. എം. നേതൃത്വം നല്‍കി.
കായിക പരിക്കുകളുടെ ചികിത്സയില്‍ ആര്‍ത്രോസ്‌കോപ്പി വലിയ മാറ്റം കൊണ്ടുവന്നതായി ഇന്ത്യന്‍ ആര്‍ത്രോസ്‌കോപ്പി സൊസൈറ്റി സെക്രട്ടറി ഡോ. രാജീവ് രാമന്‍ സമ്മേളനം ഉദ്ഘാടനം ചെയ്തുകൊണ്ട് പറഞ്ഞു. ഈ വിധത്തിലൂള്ള ചികിത്സയിലൂടെ താരങ്ങള്‍ക്ക് വേഗത്തില്‍ സുഖം പ്രാപിച്ച് കളിക്കളത്തിലേക്ക് മടങ്ങാനാകുമെന്ന് അദ്ദേഹം പറഞ്ഞു.
രാജ്യത്തെയും വിദേശത്തെയും പ്രമുഖ അസ്ഥിരോഗ വിദഗ്ധര്‍ സമ്മേളനത്തില്‍ പങ്കെടുത്തു. റഷ്യയിലെ ഇലിസറോവ് ഇന്‍സ്റ്റിറ്റ്യൂട്ടിലെ ഡോ. നിക്കോളായ് ചിറോകോവ്, ജോണ്‍സ് ഹോപ്കിന്‍സ് സര്‍വകലാശാലയിലെ പ്രൊഫ. ഡോ. ബഷീര്‍ സകരിയ എന്നിവര്‍ സംസാരിച്ചു. അമേരിക്ക, ബ്രിട്ടന്‍, ജര്‍മ്മനി, ഫ്രാന്‍സ്, സ്‌പെയിന്‍, ഖത്തര്‍, യു.എ.ഇ, സിംഗപ്പൂര്‍ തുടങ്ങിയ രാജ്യങ്ങളില്‍നിന്നുള്ള വിദഗ്ധരും സമ്മേളനത്തില്‍ പങ്കെടുത്തു. സമ്മേളനത്തിന് മുന്നോടിയായി നടന്ന ശില്‍പശാലകള്‍ മുട്ടും തോളും ഉള്‍പ്പെടുന്ന വിവിധ താക്കോല്‍ ദ്വാര ശസ്ത്രക്രിയകളില്‍ വിദഗ്‌ദ്ധ പരിശീലനം നല്‍കി. ടെന്നീസ് എല്‍ബോ മുതല്‍ ഹാംസ്ട്രിങ് ഇന്‍ജുറി വരെയുള്ള ശരീരത്തിലെ വിവിധ ഭാഗങ്ങളിലുണ്ടാകാവുന്ന പരിക്കുകളെ കുറിച്ച് സമ്മേളനത്തില്‍ ചര്‍ച്ച ചെയ്തു.
