കൊല്‍ക്കൊത്ത: താമരചിഹ്നം ടേപ്പൊട്ടിച്ച് മറച്ച് ബിജെപിയ്‌ക്ക് കിട്ടേണ്ട വോട്ടുകള്‍ ഇല്ലാതാക്കാന്‍ മമതയുടെ ഗുണ്ടയും സ്ഥാനാര്‍ത്ഥിയുമായ ജഹാംഗീര്‍ഖാനും അനുയായികളും നടത്തിയ ഗുണ്ടായിസത്തിന് തിരിച്ചടി. ഫാള്‍ട്ട നിയോജകമണ്ഡലത്തിലെ എല്ലാ ബൂത്തുകളിലും മെയ് 21ന് വീണ്ടും വോട്ടെടുപ്പ് നടത്താന്‍ തെരഞ്ഞെടുപ്പ് കമ്മീഷന്‍ ഉത്തരവിട്ടു.
ഇതോടെ ബംഗാളിലെ 294 മണ്ഡലങ്ങളില്‍ 293 മണ്ഡലങ്ങളിലെ ഫലം മാത്രമേ മെയ് നാലിന് അറിയാന്‍ സാധിക്കൂ. ഫാള്‍ട്ടയിലെ നിരവധി ബൂത്തുകളില്‍ വോട്ടിംഗ് യന്ത്രത്തില്‍ താമര ചിഹ്നം ടേപ്പൊട്ടിച്ച് മറയ്‌ക്കുകയായിരുന്നു ജഹാംഗീര്‍ ഖാന്റെ ഗുണ്ടകള്‍. ബിജെപി അനുഭാവികള്‍ ബൂത്തിലെത്തി വോട്ട് ചെയ്യാന്‍ നോക്കുമ്പോള്‍ ചിഹ്നം കാണുന്നില്ല. മറ്റ് ചിഹ്നങ്ങളില്‍ വോട്ട് ചെയ്യാനായിരുന്നു തൃണമൂല്‍ ഗുണ്ടകളുടെ നിര്‍ദേശം. പക്ഷെ ഇതിനെതിരെ വ്യാപകമായി ബിജെപി അനുഭാവികളും പ്രവര്‍ത്തകരും പ്രതിഷേധിച്ചു. വീണ്ടും വോട്ടെടുപ്പ് നടത്തണമെന്നാവശ്യപ്പെട്ടുള്ള ബിജെപി പ്രവര്‍ത്തകരുടെ പ്രതിഷേധത്തിനെതിരെ പൊലീസ് തിരിഞ്ഞതോടെ പലയിടത്തും ഏറ്റുമുട്ടലുണ്ടായി. നിരവധി സംഘര്‍ഷങ്ങള്‍ക്കൊടുവിലാണ് തെരഞ്ഞെടുപ്പ് കമ്മീഷന്‍ ഫാള്‍ട്ടയില്‍ വീണ്ടും വോട്ടെടുപ്പിന് ഉത്തരവിട്ടത്.
പൊതുവേ തൃണമൂല്‍ ഗുണ്ടകളുടെ തെരഞ്ഞെടുപ്പ് അക്രമത്തിന് പേര് കേട്ട ജില്ലയാണ് 24 സൗത്ത് പര്‍ഗാനാസ്. ഇവിടേക്ക് വോട്ടെടുപ്പിന് മുന്‍പേ യുപിയിലെ എന്‍കൗണ്ടര്‍ സ്പെഷ്യലിസ്റ്റായ അജയ് പാല്‍ ശര്‍മ്മയെ ക്രമസമാധാനപാലനത്തിന് കേന്ദ്ര ആഭ്യന്തരവകുപ്പ് അയച്ചിരുന്നു. ഈ നാളുകളില്‍ ഒരു വീഡിയോ വൈറലായിരുന്നു. ജഹാംഗീര്‍ ഖാനുമായി ബന്ധമുള്ള ഒരു വീട്ടില്‍ റെയ്ഡിനെത്തിയ അജയ് പാല്‍ ശര്‍മ്മ വീട്ടുകാര്‍ക്ക് താക്കീത് കൊടുക്കുന്നതാണ് ഈ വീഡിയോ. “ജഹാംഗീര്‍ ഖാന്റെ ഗുണ്ടകള്‍ ദിനംപ്രതി ഇവിടെ അക്രമങ്ങള്‍ നടത്തുന്നതും ഭീഷണിപ്പെടുത്തുന്നതും അറിഞ്ഞു. കരയേണ്ടിവരുന്ന സാഹചര്യം ഉണ്ടാക്കരുതെന്ന് അയാളോട് പറയൂ” എന്നായിരുന്നു അജയ് പാല്‍ ശര്‍മ്മ നല്‍കിയ താക്കീത്.
