കോട്ടയം: സംസ്ഥാനത്ത് വേനല്‍ മഴക്കാലം രണ്ടുമാസം പൂര്‍ത്തിയാക്കിയപ്പോള്‍ ലഭിച്ചത് 44 ശതമാനം കുറവു മഴ. മാര്‍ച്ച് 1 മുതല്‍ ഏപ്രില്‍ 30 വരെയുള്ള കണക്കനുസരിച്ച് 140 മില്ലിമീറ്റര്‍ മഴ ലഭിക്കേണ്ടസ്ഥാനത്തു ഇത്തവണ ലഭിച്ചത് 78.4 മില്ലിമീറ്റര്‍ മാത്രം.
കഴിഞ്ഞ വര്‍ഷം ഇതേ കാലയളവില്‍ ലഭിച്ചത് 192 മില്ലിമീറ്ററാണ്. ലഭിക്കേണ്ടതിലും 37 ശതമാനം കൂടുതലായിരുന്നു ഇത്. 2024-ല്‍ 63 ശതമാനം മഴക്കുറവുണ്ടായി. 53 മില്ലിമീറ്ററാണ് പെയ്തത്.
ഇക്കുറി പത്തനംതിട്ട ജില്ലയില്‍ മാത്രമാണ് സാധാരണയില്‍ കൂടുതല്‍ മഴ ലഭിച്ചത്. 11 ശതമാനം അധിക മഴ (280 മില്ലിമീറ്റര്‍) കിട്ടി. കോട്ടയം, ആലപ്പുഴ ജില്ലകളില്‍ 100 മില്ലീമീറ്ററിലധികം മഴപ്പെയ്‌ത്തുണ്ടായി. ഏറ്റവും കുറവ് മഴ ലഭിച്ചത് പാലക്കാട് (27 മില്ലിമീറ്റര്‍), മലപ്പുറം (31 മില്ലി മീറ്റര്‍), കാസര്‍കോട് (35.6 മില്ലിമീറ്റര്‍) ജില്ലകളിലാണ്.
പാലക്കാട്, മലപ്പുറം, തൃശൂര്‍, ഇടുക്കി, കൊല്ലം, വയനാട് ജില്ലകളില്‍ സാധാരണ ലഭിക്കേണ്ടതിന്റെ പകുതി മഴ പോലും പെയ്തില്ല. ഈ ജില്ലകളില്‍ യഥാക്രമം 74, 72, 59, 58, 55, 52 ശതമാനം വീതമാണ് മഴക്കുറവ്.
ഏപ്രിലില്‍ മാത്രം 63 ശതമാനം മഴക്കുറവ്
ഏപ്രില്‍ മാസത്തില്‍ സാധാരണ 105.6 മില്ലി മീറ്റര്‍ മഴ ലഭിക്കേണ്ടണ്ടസ്ഥാനത്ത് ഇത്തവണ ലഭിച്ചത് 38.6 മില്ലിമീറ്റര്‍ മാത്രം. 63 ശതമാനമാണ് മഴക്കുറവ്. മാര്‍ച്ച് മാസത്തില്‍ 15 ശതമാനം അധിക മഴ ലഭിച്ചെങ്കിലും കൂടുതല്‍ വേനല്‍ മഴ ലഭിക്കേണ്ടണ്ടഏപ്രില്‍ മാസത്തില്‍ 63 ശതമാനം കുറവ് ലഭിച്ചതാണ് മൊത്തത്തിലുള്ള മഴക്കുറവിനു കാരണം. 2025 ഏപ്രിലില്‍ 126 മില്ലിമീറ്ററും 2024-ല്‍ 41 മില്ലിമീറ്ററും മഴകിട്ടി.
ഇക്കുറി ഏപ്രില്‍ മാസത്തില്‍ എല്ലാ ജില്ലകളിലും കുറവ് മഴയാണ് രേഖപ്പെടുത്തിയത്. കൂടുതല്‍ മഴ ലഭിച്ച പത്തനംതിട്ട (149 മില്ലിമീറ്റര്‍) ജില്ലയില്‍പ്പോലും 19 ശതമാനം കുറവാണ്. പത്തനംതിട്ട ഒഴികെയുള്ള ജില്ലകളില്‍ വേനല്‍ മഴ പകുതി പോലും ലഭിച്ചില്ല.
പാലക്കാട്, മലപ്പുറം ജില്ലകളില്‍ സാധാരണ ലഭിക്കേണ്ടണ്ടവേനല്‍ മഴയുടെ 10 ശതമാനവും തൃശൂര്‍ ജില്ലയില്‍ 20 ശതമാനവുമാണ് കിട്ടിയത്. കാസര്‍കോട്ട് 79ഉം കോട്ടയത്ത് 73 ശതമാനവുമാണ് ഏപ്രിലിലെ മഴക്കുറവ്.
സംസ്ഥാനത്ത് മെയ് മാസത്തിന്റെ തുടക്കത്തില്‍ കുറച്ചുകൂടി മെച്ചപ്പെട്ട വേനല്‍ മഴ പ്രതീക്ഷിക്കുന്നതായി കാലാവസ്ഥാ നിരീക്ഷകന്‍ രാജീവന്‍ ഏരിക്കുളം പറഞ്ഞു. ഈ മാസം പകുതിക്കു ശേഷം അറബിക്കടലില്‍ കാറ്റിന്റെ ദിശയില്‍ മാറ്റ (പടിഞ്ഞാറന്‍ കാറ്റ്) മുണ്ടാകും. മെയ് അവസാനത്തോടെ കാലവര്‍ഷക്കാറ്റ് കേരളത്തില്‍ എത്തുമെന്നാണ് പ്രാഥമിക സൂചനയെന്നും അദ്ദേഹം പറഞ്ഞു.
ജന്മഭൂമി ഓണ്‍ലൈന്‍