ബംഗാളില്‍ സ്വാതന്ത്ര്യാനന്തരമുള്ള ഏറ്റവും ഉയര്‍ന്ന പോളിംഗ് ശതമാനം ബിജെപി തൂത്തുവാരുമെന്നതിന്റെ സൂചന; സീറ്റ് മാത്രമല്ല, വോട്ട് ശതമാനവും കൂടും

ന്യൂദല്‍ഹി: പശ്ചിമ ബംഗാള്‍ നിയമസഭാ തിരഞ്ഞെടുപ്പില്‍ സ്വാതന്ത്ര്യാനന്തര ഇന്ത്യയിലെ ഏറ്റവും ഉയര്‍ന്ന പോളിംഗ് ശതമാനം തിരഞ്ഞെടുപ്പ് കമ്മീഷന്‍.രേഖപ്പെടുത്തിയത് ബിജെപി വിജയത്തിന്റെ വ്യക്തമായ സൂചനയാണെന്ന് എക്സി പോള്‍ ഫലങ്ങള്‍ സൂചിപ്പിക്കുന്നു. സീറ്റുകളുടെ എണ്ണത്തില്‍ മാത്രമല്ല, വോട്ടിംഗ് ശതമാനത്തിലും ഇക്കുറി ബിജെപി റെക്കോഡ് ഭേദിക്കുമെന്നും എക്സിറ്റ് പോളുകള്‍ പറയുന്നു. രണ്ട് ഘട്ടങ്ങളിലായി നടന്ന വോട്ടെടുപ്പ് കണക്കാക്കിയാല്‍ മൊത്തത്തില്‍ 92.47 ശതമാനം വരുമെന്ന അന്തിമ കണക്ക് വ്യാഴാഴ്ച രാവിലെയാണ് പുറത്തുവന്നത്.

ബംഗാളിന്റെ ചരിത്രത്തിലെ തന്നെ ഏറ്റവും വലിയ പോളിംഗാണിത്. ബുധനാഴ്ച രണ്ടാം ഘട്ട വോട്ടെടുപ്പ് പൂര്‍ത്തിയായതോടെയാണ് തിരഞ്ഞെടുപ്പ് കമ്മീഷന്‍ ഈ കണക്കുകള്‍ പുറത്തുവിട്ടത്. 2011-ല്‍ രേഖപ്പെടുത്തിയ 84.72 ശതമാനമായിരുന്നു ഇതിനുമുമ്പ് ബംഗാളിലെ ഉയര്‍ന്ന പോളിംഗ്. അന്ന് 34 വര്‍ഷത്തെ സിപിഎം ദുര്‍ഭരണത്തെ തൂത്തെറിഞ്ഞാണ് മമതയുടെ തൃണമൂല്‍ കോണ്‍ഗ്രസ് വന്‍ഭൂരിപക്ഷത്തോടെ അധികാരം പിടിച്ചത്. ബംഗാളിലെ വോട്ടിംഗ് പാറ്റേണ്‍ പരിശോധിച്ചാല്‍ അസാധാരണമായ കുതിപ്പ് പോളിംഗിലുണ്ടായാല്‍ അത് ഭരണവിരുദ്ധവികാരമായി തന്നെയാണ് വിലയിരുത്തപ്പെടുന്നത്.

മമത ബാനര്‍ജിയുടെ നേതൃത്വത്തിലുള്ള തൃണമൂല്‍ കോണ്‍ഗ്രസ് ഭരണത്തിന് അന്ത്യം കുറിച്ച്‌ ബിജെപി ചരിത്രത്തിലാദ്യമായി ബംഗാളില്‍ അധികാരമുറപ്പിക്കുമെന്നാണ് ഭൂരിഭാഗം സര്‍വ്വേകളും പ്രവചിക്കുന്നത്. . ഭൂരിപക്ഷത്തിന് വേണ്ട 148 സീറ്റുകള്‍ ബിജെപി സഖ്യം അനായാസം മറികടക്കുമെന്നാണ് പ്രമുഖ ഏജന്‍സികളുടെ കണ്ടെത്തല്‍.

റിപ്പോര്‍ട്ടുകള്‍ പ്രകാരം, പ്രജ പോള്‍ (Praja Poll) ബിജെപിക്ക് 178 മുതല്‍ 208 സീറ്റുകള്‍ വരെയാണ് പ്രവചിക്കുന്നത്. പി-മാര്‍ക്ക് (P-Marq) 150 മുതല്‍ 175 സീറ്റുകള്‍ വരെയും, മാട്രിസ് (Matrize) 146 മുതല്‍ 161 സീറ്റുകള്‍ വരെയും ബിജെപിക്ക് അനുകൂലമായ ഫലം പ്രവചിക്കുന്നു. തൃണമൂല്‍ കോണ്‍ഗ്രസിന്റെ സീറ്റ് നില 100 മുതല്‍ 140 വരെയായി ചുരുങ്ങുമെന്നാണ് ഈ ഏജന്‍സികളെല്ലാം ഒരുപോലെ പറയുന്നത്. ഇത് മമത ബാനര്‍ജിക്ക് വലിയ തിരിച്ചടിയുണ്ടാക്കുമെന്നാണ് രാഷ്‌ട്രീയ നിരീക്ഷകരുടെ വിലയിരുത്തല്‍.

വോട്ട് വിഹിതത്തിലും ബിജെപി വലിയ മുന്നേറ്റം നടത്തിയതായാണ് കണക്കുകള്‍ സൂചിപ്പിക്കുന്നത്. പോള്‍ ഡയറി (Poll Diary) യുടെ കണക്കനുസരിച്ച്‌ ബിജെപി 45.87% വോട്ട് വിഹിതം നേടുമ്പോള്‍ തൃണമൂലിന് 40.32% വോട്ട് മാത്രമേ ലഭിക്കാന്‍ സാധ്യതയുള്ളൂ. അതേസമയം, ഒരുകാലത്ത് ബംഗാള്‍ ഭരിച്ചിരുന്ന ഇടതുമുന്നണിയും കോണ്‍ഗ്രസും ഇത്തവണയും ചിത്രത്തിലില്ലാത്ത അവസ്ഥയിലാണ്. ഇടതുപക്ഷത്തിന് പരമാവധി മൂന്ന് സീറ്റുകള്‍ വരെ മാത്രമേ സര്‍വ്വേകള്‍ കല്‍പ്പിക്കുന്നുള്ളൂ.

ഇക്കൂട്ടത്തില്‍ താരതമ്യേന അപ്രസക്തമായ പീപ്പിള്‍സ് പള്‍സ് (Peoples Pulse) നടത്തിയ സര്‍വ്വേ മാത്രമാണ് മമത ബാനര്‍ജി അധികാരം നിലനിര്‍ത്തുമെന്ന് പ്രവചിക്കുന്നത്.

ഇന്ത്യന്‍ തിരഞ്ഞെടുപ്പ് ചരിത്രത്തില്‍ ഒരു നിയമസഭാ തിരഞ്ഞെടുപ്പില്‍ രേഖപ്പെടുത്തിയ ഏറ്റവും ഉയര്‍ന്ന പോളിംഗ് 2013-ല്‍ ത്രിപുരയിലായിരുന്നു (93.61%). ഇതിന് തൊട്ടുപിന്നിലെത്തിയിരിക്കുകയാണ് ഇപ്പോള്‍ പശ്ചിമ ബംഗാള്‍.

വോട്ടെണ്ണല്‍ മെയ് 4-ന് നടക്കും. 6.81 കോടി വോട്ടര്‍മാരുള്ള ബംഗാളില്‍ ഭരണമാറ്റമുണ്ടാകുമോ അതോ തൃണമൂല്‍ കോണ്‍ഗ്രസ് അധികാരം നിലനിര്‍ത്തുമോ എന്ന ആകാംക്ഷയിലാണ് രാജ്യം.