തൊടുപുഴ: മംഗളാദേവി ചിത്രാപൗര്ണമി ഉത്സവത്തിനായി ഒരുങ്ങി. ഈ വര്ഷത്തെ ഉത്സവം നാളെയാണ് നടക്കുക. വര്ഷത്തിലൊരിക്കല് നടക്കുന്ന ഈ ഉത്സവത്തില് പങ്കെടുക്കുന്നതിനായി കേരളം, തമിഴ്നാട് എന്നിവിടങ്ങളില് നിന്നായി ആയിരക്കണക്കിന് ഭക്തമരാണ് നാളെ മംഗളാദേവി ക്ഷേത്രത്തില് എത്തിച്ചേരുക.
കേരളത്തില് നിന്നുള്ള ഉത്സവത്തിന് തിരുവിതാംകൂര് ദേവസ്വം ബോര്ഡാണ് നേതൃത്വം നല്കുക. തന്ത്രി സൂര്യകാലടിമന സൂര്യന് സുബ്രഹ്മണ്യന് ഭട്ടതിരിപ്പാടാകും താന്ത്രിക ചടങ്ങുകള് നിര്വ്വഹിക്കുക. തമിഴ്നാട് ദേവസ്വം അധികൃതരുടെ നേതൃത്വത്തിലും പൂജാ ചടങ്ങുകള് നടക്കും. തീര്ത്ഥാടകരായ ഭക്തര് കാലാവസ്ഥാ മുന്നറിയിപ്പുകള് പാലിക്കണമെന്ന് ഇടുക്കി ജില്ലാ കളക്ടര് ഡോ. ദിനേശന് ചെറുവാട്ട് അറിയിച്ചു. ജില്ലയില് കനത്ത മഴയ്ക്ക് സാധ്യതയുണ്ടെന്ന് കാലാവസ്ഥാവകുപ്പ് മുന്നറിയിപ്പ് നല്കിയിട്ടുണ്ട്.
വൈകുന്നേരങ്ങളില് കനത്ത മഴയും ഇടിമിന്നലും ഉണ്ടാവാനിടയുള്ളതിനാല് ഉച്ചയോടെ തിരിച്ചുള്ള യാത്ര ഉറപ്പാക്കണം. കനത്ത മഴ ക്ഷേത്രത്തിലേക്കുള്ള വഴികളില് വാഹനയാത്ര അസാധ്യമാക്കുന്ന സാഹചര്യമുണ്ടാക്കും. കാലാവസ്ഥാ മുന്നിറിയിപ്പുകള് പ്രതികൂലമാണെങ്കില് ജില്ലാഭരണകൂടം നിര്ദ്ദേശിക്കുന്ന സമയത്ത് ഭക്തര് തിരിച്ചിറങ്ങാന് തയ്യാറാകണമെന്നും കളക്ടര് അറിയിച്ചു.
ക്ഷേത്രത്തിലേക്ക് സ്വകാര്യ വാഹനങ്ങള്ക്ക് പ്രവേശനം അനുവദിക്കില്ല. സര്ക്കാര് വാഹനങ്ങള് മുന്കൂട്ടി അനുമതി വാങ്ങണം. കുമളി ബസ് സ്റ്റാന്ഡില് നിന്ന് ഭക്തരെ കൊണ്ടുപോകുന്ന ട്രിപ്പ് ജീപ്പുകള്ക്ക് രാവിലെ 5.30 മുതല് പ്രവേശനം അനുവദിക്കും. ഇരുചക്ര വാഹനങ്ങള്ക്കും ട്രാക്ടറുകള്ക്കും കര്ശന നിരോധനമുണ്ട്. നിശ്ചിത സമയത്തിനുള്ളില് വാഹനങ്ങള് പ്രവേശിക്കണം. ട്രിപ്പ് ജീപ്പുകള്ക്ക് പാസ് അനുവദിക്കുന്നതിനും ഫിറ്റ്നസ് സര്ട്ടിഫിക്കറ്റ് പരിശോധനക്കും കുമളി ബസ് സ്റ്റാന്ഡില് നാല് കൗണ്ടറുകള് ഇന്ന് കൂടി പ്രവര്ത്തിക്കും.
ഒരു വശത്തേക്കുള്ള യാത്രയ്ക്ക് 200 രൂപയാണ് ട്രിപ്പ് ജിപ്പുകള്ക്ക് വാടക നിശ്ചയിച്ചിരിക്കുന്നത്. ഉത്സവദിവസം സത്രം, ഒട്ടകതല തുടങ്ങിയ വിനോദ സഞ്ചാരകേന്ദ്രങ്ങളില് ജീപ്പ് സഫാരി അനുവദിക്കില്ല.
