മുംബൈ: മഹാരാഷ്ട്ര മീര റോഡിലേത് പഹല്ഗാമിന് സമാനമായ ആക്രമണം. പള്ളി എവിടെയെന്ന് ചോദിച്ചു, കലിമ ചൊല്ലാന് ആവശ്യപ്പെട്ടശേഷം, മതത്തിന്റെ അടിസ്ഥാനത്തിലാണ് പ്രതി സെയ്ബ് സുബൈര് അന്സാരി ആക്രമണം നടത്തിയത്. ഐഎസ് അടക്കമുള്ള ഭീകര സംഘടനകളില് ആകൃഷ്ടനായാണ് പ്രതി ആക്രമണം നടത്തിയതെന്ന് ഭീകരവിരുദ്ധ സേന (എടിഎസ്) അറിയിച്ചു. അന്സാരിക്ക് ഐഎസുമായി നേരിട്ട് ബന്ധമുണ്ടോയെന്നും അന്വേഷണം ആരംഭിച്ചിട്ടുണ്ട്. എന്ഐഎയും കേസന്വേഷിക്കുന്നുണ്ട്.
തിങ്കളാഴ്ച പുലര്ച്ചെയാണ് മീര റോഡിലെ നയാ നഗറില് ആക്രമണമുണ്ടാകുന്നത്. സംഭവം നടന്ന് 90 മിനിട്ടിനുള്ളില് പ്രതിയെ അറസ്റ്റ് ചെയ്തു. കോടതിയില് ഹാജരാക്കി മെയ് 4 വരെ എടിഎസിന്റെ കസ്റ്റഡിയില് വിട്ടു. അന്സാരിയുടെ വീട്ടില് നടത്തിയ പരിശോധനയില് ലോണ് വുള്ഫ് ആക്രമണങ്ങളെക്കുറിച്ചുള്ള കുറിപ്പുകളും ഐഎസ്എസ് ബന്ധം സൂചിപ്പിക്കുന്ന രേഖകളും കണ്ടെത്തിയിട്ടുണ്ട്. ഐഎസ്, ജിഹാദ്, ഗാസ തുടങ്ങിയ വാക്കുകള് അടങ്ങിയ ഒരു കുറിപ്പും അന്വേഷണ സംഘത്തിന് ലഭിച്ചിട്ടുണ്ട്. ഓണ്ലൈന് വഴിയാണ് ഭീകരരുടെ ആശയങ്ങളില് ആകൃഷ്ടനാകുന്നത്. അന്സാരിയുടെ ലാപ്ടോപ്പും മറ്റ് ഇലക്ട്രോണിക് ഉപകരണങ്ങളും പരിശോധിച്ച് വരികയാണ്. ഭീകരപ്രവര്ത്തനങ്ങളുമായി അന്സാരിക്കുള്ള ബന്ധം ഇതില് നിന്ന് കണ്ടെത്താനാകുമെന്നാണ് പ്രതീക്ഷിക്കുന്നത്. അന്സാരി ആരുടേയും പ്രേരണയില്ലാതെ സ്വയം നടപ്പിലാക്കിയ ആക്രമണമാണെന്നാണ് പ്രാഥമിക നിഗമനം.
2019ല് യുഎസില് നിന്ന് ഉപരിപഠനം കഴിഞ്ഞ് മടങ്ങിയെത്തിയ അന്സാരി മീര റോഡില് തനിച്ചാണ് താമസം. കുറെ കാലം ഇയാള് ഓണ്ലൈന് കെമിസ്ട്രി അദ്ധ്യാപകനായി ജോലി ചെയ്തിട്ടുണ്ട്. അഫ്ഗാന് വംശജയായ ഭാര്യ ഇയാളെ ഉപേക്ഷിച്ച് നിലവില് യുഎസിലാണ്.
