കണ്ണൂര് : സംസ്ഥാനത്ത് വീടുകളിലും പരിസര പ്രദേശങ്ങളിലുമായി ഇന്നും പാമ്പുകളെ പിടികൂടി. പാമ്പുകടിയേറ്റ് കണ്ണൂര് പരിയാരം മെഡിക്കല് കോളേജ് ആശുപത്രിയില് ചികിത്സയിലുള്ള നാലരവയസുകാരിയുടെയും വയോധികയുടെയും ആരോഗ്യനില ഗുരുതരമായി തുടരുന്നു.ഞായറാഴ്ച പാമ്പുകടിയേറ്റ കണ്ണൂര് പട്ടുവം സ്വദേശി നമ്പ്രോന് നാരായണിയുടെ ആരോഗ്യനില ഗുരുതരമായി തുടരുന്നു.വീട്ടുമുറ്റത്ത് കളിച്ചു കൊണ്ടിരുന്നപ്പോഴാണ് കാസര്ഗോഡ് എളേരിത്തട്ടില് നാലരവയസുകാരി ഋതു ചന്ദ്രയ്ക്ക് മൂര്ഖന് പാമ്പിന്റെ കടിയേറ്റത്.ഇരുവരും കണ്ണൂര് പരിയാരം മെഡിക്കല് കോളേജ് ആശുപത്രിയില് ചികിത്സയിലാണ്. സംസ്ഥാനത്ത് എട്ട് പേര്ക്ക് കൂടി പാമ്പുകടിയേറ്റു.
കഴിഞ്ഞ രാത്രി കോട്ടയം രാമപുരത്ത് വീട്ടമ്മയ്ക്ക് പാമ്പുകടിയേറ്റിരുന്നു. ആരുടെയും ആരോഗ്യനിലയില് ആശങ്കയില്ല. കണ്ണൂരില് പട്ടുവം മാധവനഗറില് വീടിനകത്ത് കണ്ടെത്തിയ മൂര്ഖനെ പിന്നീട് പിടികൂടി. പയ്യന്നൂരിലെ അരവഞ്ചാലില് വീട്ടുവളപ്പിലെ വിറകുപുരയില് നിന്നും മൂര്ഖനെ പിടികൂടി.
കോഴിക്കോട് കാരശേരിയില് വീട്ടു വളപ്പിലെ കിണറ്റിലെ കപ്പിയില് നിന്നും ശംഖുവരയനെ പിടികൂടി. കക്കയത്ത് മരത്തില് കണ്ടെത്തിയ രാജവെമ്പാലയെ വനംവകുപ്പ് ഉദ്യോഗസ്ഥര് പിടികൂടി. തിരുവനന്തപുരം പൊലീസ് ട്രെയിനിംഗ് കോളേജില് പരേഡിനിടെ ചേര പൊലീസുകാര്ക്കിടയിലൂടെ ഇഴഞ്ഞു നീങ്ങിയത് പരിഭ്രാന്തിക്കിടയാക്കി.
കണ്ണൂര് താവക്കര അഹ്മദിയ്യാ പള്ളിയില് ദേഹശുദ്ധി വരുത്തുന്നയിടത്ത് (കൈ, കാല് കഴുകുന്ന സ്ഥലം) മൂര്ഖനെ കണ്ടെത്തി.കഴിഞ്ഞ രാത്രി 7.30നാണ് സംഭവം. പള്ളിയില് എത്തിയ ചിലര് ശബ്ദം കേട്ടു നോക്കിയപ്പോഴാണ് മൂര്ഖനെ കണ്ടെത്തിയത്. പള്ളി ഭാരവാഹികള് വിവരമറിയിച്ചതിനെ തുടര്ന്ന് മാര്ക്ക് പ്രവര്ത്തകനും മൃഗസ്നേഹിയുമായ രഞ്ജിത്ത് നാരായണന് എത്തി മൂര്ഖനെ സാഹസികമായി പിടികൂടി.
