കൊല്ക്കത്ത: ഭാരതത്തിന്റെ വികസനത്തിന് ബംഗാളിന്റെ പുരോഗതി അനിവാര്യമാണെന്ന് പ്രധാനമന്ത്രി നരേന്ദ്ര മോദി. നോര്ത്ത് 24 പര്ഗാനാസ് ജില്ലയിലെ ബാരക്പൂരില് നടന്ന തെരഞ്ഞെടുപ്പ് റാലിയെ അഭിസംബോധന ചെയ്യുകയായിരുന്നു അദ്ദേഹം.
കിഴക്കന് മേഖലയുടെ ഉയര്ച്ച രാജ്യത്തിന്റെ ഭാവിക്കായി നിര്ണായകമാണ്. അതിനാല് ബംഗാളില് ബിജെപി സര്ക്കാര് വരേണ്ടത് അത്യാവശ്യമാണ്. ബംഗാളിന്റെ മാനസികാവസ്ഥ ബിജെപിക്ക് വിജയ സൂചന നല്കുന്നു. എന്റെ ഉത്തരവാദിത്തം ബംഗാളിനെ സേവിക്കുക, സംരക്ഷിക്കുക, രക്ഷിക്കുക എന്നതാണ്. ഒഡീഷയ്ക്കും ബിഹാറിനും ശേഷം ഇത്തവണ ബംഗാളിലും താമര വിരിയും. മെയ് 4ന് ശേഷം ബിജെപി സര്ക്കാരിന്റെ സത്യപ്രതിജ്ഞ ചടങ്ങില് പങ്കെടുക്കാന് തിരികെ വരുമെന്നും മോദി പറഞ്ഞു.
ബംഗാളിലെ ജനങ്ങളെ തൃണമൂല് വഞ്ചിച്ചു. സംസ്ഥാനത്തിന്റെ വികസനത്തിന് അവര്ക്ക് ഒരു കാഴ്ചപ്പാടുമില്ല. ഒരു വശത്ത്, മില്ലുകള് അടച്ചുപൂട്ടുകയാണ്, മറുവശത്ത്, ക്രൂഡ് ബോംബ് ഫാക്ടറികള് ഉയര്ന്നു വരികയാണ്, ഗുണ്ടകളെ ജോലിക്ക് പ്രവേശിപ്പിക്കുന്നു. ടിഎംസിയുടെ സിന്ഡിക്കേറ്റ് വികസിക്കുന്നു. തൃണമൂല് എന്നെയും ഭരണഘടനാ സ്ഥാപനങ്ങളെയും സൈന്യത്തെയുംപോലും നിന്ദ്യമായ രീതിയില് നേരിട്ടു, പ്രധാനമന്ത്രി പറഞ്ഞു.
അതേസമയം, തൃണമൂല് കോണ്ഗ്രസിന്റെ മഹാ ജംഗിള് രാജില്നിന്ന് സ്വാതന്ത്ര്യം നേടിത്തരാമെന്ന് മതുവ മേഖലയില് വോട്ടഭ്യര്ത്ഥിക്കുന്നതിനിടെ പ്രധാനമന്ത്രി ജനങ്ങളോട് പറഞ്ഞു.
നിങ്ങള് എനിക്ക് രക്തം തരൂ, ഞാന് നിങ്ങള്ക്ക് സ്വാതന്ത്ര്യം തരാമെന്ന് നേതാജി സുഭാഷ് ചന്ദ്രബോസ് പറഞ്ഞു, നേതാജിയുടെ ആഹ്വാനം കേട്ട് രാജ്യം എല്ലാം നല്കി. ഇന്ന് ബംഗാളിനോട് എനിക്ക് പറയാനുള്ളത് നിങ്ങളുടെ വോട്ട് ഞങ്ങള്ക്ക് ആവശ്യമുണ്ട്. നിങ്ങള് ഞങ്ങള്ക്ക് വോട്ട് ചെയ്യുക, ഞങ്ങള് നിങ്ങളെ തൃണമൂല് കോണ്ഗ്രസില് നിന്ന് മോചിപ്പിക്കും, മോദി പറഞ്ഞു.
