തിരുവനന്തപുരം: വേനല്‍ച്ചൂട് ക്രമാതീതമായി വര്‍ധിച്ചതോടെ സണ്‍സ്‌ക്രീനില്‍ അഭയം തേടിയിരിക്കുകയാണ് മലയാളികള്‍. വെയില്‍ ഏല്‍ക്കാന്‍ സാധ്യതയുള്ള സമയങ്ങളില്‍ സണ്‍സ്‌ക്രീന്‍ നിര്‍ബന്ധമായും ഉപയോഗിക്കണമെന്നാണ് ഡെര്‍മറ്റോളജിസ്റ്റുകള്‍ നല്‍കിയിരിക്കുന്ന മുന്നറിയിപ്പ്. എന്നാല്‍ എല്ലാ സണ്‍സ്‌ക്രീനുകളും സുരക്ഷിതമല്ലെന്നാണ് പുറത്തുവരുന്ന റിപ്പോര്‍ട്ടുകള്‍ നല്‍കുന്ന സൂചന.
ആരോഗ്യത്തിന് ഗുരുതര ഹാനിവരുത്തുന്ന ചേരുവകള്‍ ചേര്‍ന്ന ക്രീമുകളും വിപണിയില്‍ സുലഭമാണ്. ഇവ മനുഷ്യശരീരത്തിലെ ചെറു സുഷിരങ്ങള്‍ വഴി ഉള്ളിക്കടന്ന് ആന്തരികാവയവങ്ങള്‍ ഹാനിവരുത്താനുള്ള സാധ്യത കൂടുതലാണ്.
എന്നാല്‍ സണ്‍സ്‌ക്രീന്‍ ഉപയോഗിക്കുന്നത് അള്‍ഡ്രാവയലറ്റ് രശ്മികളില്‍ നിന്ന് ചര്‍മ്മത്തിന് കവചമൊരുക്കുയും ചര്‍മ്മ കാന്‍സറില്‍ നിന്നും അകാല വാര്‍ദ്ധക്യത്തില്‍ നിന്നും തടയുകയും ചെയ്യുന്നു. ചില സാഹചര്യങ്ങളില്‍ സണ്‍സ്‌ക്രീനുകള്‍ ചര്‍മ്മത്തിലെ സുഷിരങ്ങള്‍ അടയാന്‍ കാരണമായേക്കാം. എന്നാല്‍ എല്ലാ സണ്‍സ്‌ക്രീനുകളും ഇങ്ങനെ ചെയ്യണമെന്നില്ല. എണ്ണമയമുള്ളതോ കട്ടിയുള്ളതോ ആയ ചില സണ്‍സ്‌ക്രീനുകള്‍ സുഷിരങ്ങളില്‍ അടിഞ്ഞുകൂടുകയും അവയെ തടസ്സപ്പെടുത്തുകയും ചെയ്യാറുണ്ട്.
സുഷിരങ്ങള്‍ തടസപ്പെടുന്നത് സെബം (ചര്‍മ്മത്തിലെ സ്വാഭാവിക എണ്ണ) സുഗമമായി പുറത്തുപോകുന്നത് തടയുകയും മുഖക്കുരു ഉണ്ടാകാന്‍ കാരണമാവുകയും ചെയ്യുന്നു. ചിലര്‍ക്ക് ചര്‍മ്മത്തില്‍ ചെറിയ കുരുക്കളും പാടുകളും പ്രത്യക്ഷപ്പെടാം. ചില രാസഘടകങ്ങള്‍ അടങ്ങിയ സണ്‍സ്‌ക്രീനുകള്‍ ചര്‍മ്മത്തില്‍ ചുവപ്പ്, ചൊറിച്ചില്‍, അല്ലെങ്കില്‍ തിണര്‍പ്പ് എന്നിവയുമുണ്ടാക്കാം. സുഷിരങ്ങള്‍ അടയ്‌ക്കുന്ന ഘടകങ്ങളുള്ള സണ്‍സ്‌ക്രീനുകളെ കോമഡോജെനിക് എന്ന് വിളിക്കുന്നു. ചില സണ്‍സ്‌ക്രീനുകളില്‍ അടങ്ങിയിരിക്കുന്ന രാസഘടകങ്ങള്‍ ഹോര്‍മോണ്‍ വ്യതിയാനങ്ങള്‍ക്കോ ചര്‍മ്മത്തിലെ വിവിധതരം അസ്വസ്ഥതകള്‍ക്കോ കാരണമായേക്കാം.
ഉല്പന്നങ്ങളില്‍ ജാഗ്രത പുലര്‍ത്തണം
ഉല്പന്നങ്ങളില്‍ വാങ്ങുമ്പോള്‍ ലേബലില്‍ നോണ്‍ കോമഡോജെനിക് (ചീിരീാലറീഴലിശര) എന്ന് രേഖപ്പെടുത്തിയവ തെരഞ്ഞെടുക്കുക. ഇവ സുഷിരങ്ങള്‍ അടയ്‌ക്കില്ല. എണ്ണമയമുള്ള ചര്‍മ്മമുള്ളവര്‍ ജെല്‍ ബേസ്ഡ് സണ്‍സ്‌ക്രീനുകളും, വരണ്ട ചര്‍മ്മമുള്ളവര്‍ ലോഷനുകളും തെരഞ്ഞെടുക്കുന്നതാണ് നല്ലത്. രാത്രിയില്‍ ഉറങ്ങുന്നതിന് മുമ്പ് സണ്‍സ്‌ക്രീന്‍ പൂര്‍ണമായും കഴുകിക്കളയാന്‍ നല്ലൊരു ഫേസ് വാഷ് അല്ലെങ്കില്‍ ക്ലെന്‍സര്‍ ഉപയോഗിക്കണം. കേരളത്തിലെ കാലാവസ്ഥയ്‌ക്ക് അനുയോജ്യമായതും ചര്‍മ്മരോഗ വിദഗ്ധര്‍ നിര്‍ദ്ദേശിക്കുന്നതുമായ ഗുണമേന്മയുള്ള ബ്രാന്‍ഡുകള്‍ നോക്കി വാങ്ങാന്‍ ശ്രദ്ധിക്കണം. സണ്‍ പ്രൊട്ടക്ഷന്‍ ഫാക്ടര്‍ 30 എങ്കിലും ഉള്ളതും പ്രൊട്ടക്ഷന്‍ ഗ്രേഡ് ഓഫ് യുവിഎ പിഎ+++ അല്ലെങ്കില്‍ പിഎ++++ ഉള്ളതുമായ ഉല്പന്നങ്ങള്‍ വേണം വാങ്ങേണ്ടത്.
സൂര്യപ്രകാശം ഏല്‍ക്കാന്‍ സാധ്യതയുള്ള സാഹചര്യങ്ങളില്‍ പുറത്തിറങ്ങുന്നതിന് 15-20 മിനിറ്റ് മുന്‍പ് വേണം സണ്‍സ്‌ക്രീന്‍ പുരട്ടാന്‍. വെയിലത്ത് അധികസമയം ചെലവഴിക്കുന്നുണ്ടെങ്കില്‍ ഓരോ 3 മണിക്കൂര്‍ കൂടുമ്പോഴും സണ്‍സ്‌ക്രീന്‍ വീണ്ടും പുരട്ടേണ്ടതുണ്ട്.
സൂര്യപ്രകാശം പൂര്‍ണമായി ഒഴിവാക്കരുത്
സൂര്യപ്രകാശം അല്പം പോലും ഏല്‍ക്കാതിരിക്കുന്നതും വിവിധ ആരോഗ്യപ്രശ്‌നങ്ങള്‍ക്ക് കാരണമാകും. ശരീരം വിറ്റാമിന്‍ ഡി നിര്‍മ്മിക്കുന്നത് സൂര്യപ്രകാശം ചര്‍മ്മത്തില്‍ ഏല്‍ക്കുമ്പോഴാണ്. കാല്‍സ്യം ആഗിരണം ചെയ്യാന്‍ വിറ്റാമിന്‍ ഡി അത്യാവശ്യമാണ്. ഇതിന്റെ കുറവ് എല്ലുകള്‍ പൊട്ടാനും തേയ്‌മാനത്തിനും കാരണമാകും. പ്രതിരോധ ശേഷി കുറയാനും സൂര്യപ്രകാശത്തിന്റെ അഭാവം കാരണമാകും.
സൂര്യപ്രകാശം കുറയുമ്പോള്‍ തലച്ചോറിലെ സെറോടോണിന്‍ എന്ന ഹോര്‍മോണിന്റെ അളവ് കുറയും. ഇത് വിഷാദം, ഉത്കണ്ഠ, മൂഡ് മാറ്റങ്ങള്‍ എന്നിവയ്‌ക്ക് കാരണമാകാറുണ്ട്. ശൈത്യകാലത്ത് പലര്‍ക്കും അനുഭവപ്പെടുന്ന ‘സീസണല്‍ ഡിപ്രഷന്‍’ ഇതിന് ഉദാഹരണമാണ്. ശരീരത്തിന് പകലും രാത്രിയും തിരിച്ചറിയാനുള്ള ‘സിര്‍കാഡിയന്‍ റിഥം’ കൃത്യമാകാന്‍ രാവിലെ സൂര്യപ്രകാശം ഏല്‍ക്കുന്നത് നല്ലതാണ്. വെളിച്ചം കുറയുമ്പോള്‍ ഉറക്കത്തിന് സഹായിക്കുന്ന മെലാടോണിന്‍ ഹോര്‍മോണിന്റെ ഉത്പാദനം താളംതെറ്റുകയും ഉറക്കക്കുറവ് അനുഭവപ്പെടുകയും ചെയ്യാം.
തീക്ഷ്ണത കുറഞ്ഞ സമയങ്ങളില്‍ രാവിലത്തെയും വൈകിട്ടത്തെയും വെയില്‍ ഏല്‍ക്കുന്നത് ചര്‍മ്മത്തിനും ആരോഗ്യത്തിനും വളരെ നല്ലതാണ്. താപം കുറഞ്ഞ സമയത്തെ വെയില്‍ ഏല്‍ക്കുന്നത് മനസ്സിനും ശരീരത്തിനും ഉന്മേഷം നല്‍കും.
ജന്മഭൂമി ഓണ്‍ലൈന്‍