കണ്ണൂര്: മാരാര്ജിയുടെ അനുകരണീയമായ പൊതുജീവിതം പുതുതലമുറ പാഠമാക്കണമെന്ന് ബിജെപി മുന് സംസ്ഥാന അധ്യക്ഷനും ദേശീയ സമിതിയംഗവുമായ സി.കെ. പത്മനാഭന്. കണ്ണൂര് പയ്യാമ്പലത്ത് മാരാര്ജി അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
കേരളത്തിന്റെ രാഷ്ട്രീയചരിത്രം പഠിക്കുന്നവര്ക്ക് വിശാലമായ വീക്ഷണത്തിലുള്ള പാഠപുസ്തകമാണ് അദ്ദേഹത്തിന്റെ ജീവിതം. നാം ഇന്ന് കാണുന്ന ഭാരതീയ ജനതാ പാര്ട്ടിയുടെ പ്രവര്ത്തനത്തിന് അടിത്തറ പാകിയ മഹത്വ്യക്തികളിലൊരാളാണ് അദ്ദേഹം. വളരെ ലളിതമായ ജീവിതമാണ് അദ്ദേഹം നയിച്ചത്. ഒറ്റ മുണ്ടും ധരിച്ച് അദ്ദേഹം കേരളത്തിലങ്ങോളമിങ്ങോളം പാര്ട്ടി കെട്ടിപ്പടുക്കാന് അക്ഷീണം യാത്ര ചെയ്തു.
ദുഷ്കരമായിരുന്നു അന്നത്തെ സംഘടനാ പ്രവര്ത്തനം. ഇന്നത്തെ പോലെ പ്രവര്ത്തനത്തിനാവശ്യമായ പണമുണ്ടായിരുന്നില്ലെങ്കിലും അതൊന്നും അദ്ദേഹത്തിന് തടസമായിരുന്നില്ല. പല പ്രദേശത്തുമെത്തുമ്പോഴും അനുകൂലിക്കാന് ഒരുപാട് പേരൊന്നുമുണ്ടായിരുന്നില്ല. എന്നാല് ഓരോ പ്രദേശത്തെയും പ്രവര്ത്തകര്ക്ക് ആശയപരമായ അടിത്തറ നല്കി അദ്ദേഹം സംഘടന കെട്ടിപ്പടുത്തു. വാക്ചാതുര്യവും എളിമയും അദ്ദേഹത്തെ ഓരോ കുടുംബത്തിലെയും അംഗമാക്കി മാറ്റി. അദ്ദേഹത്തിന്റെ പ്രസംഗത്തിലെ നര്മവും മുന്നോട്ട് വെച്ച ധര്മവും പൊതുസമൂഹത്തില് വലിയ ചലനമുണ്ടാക്കിയെന്നും ഇന്ന് നാം കാണുന്ന നമ്മുടെ സംഘടനാ ശക്തി അദ്ദേഹത്തിന്റെ വിശ്രമമില്ലാത്ത പ്രവര്ത്തനത്തിന്റെ ഫലമാണെന്നും സി.കെ. പത്മനാഭന് പറഞ്ഞു.
പയ്യാമ്പലത്തെ സ്മൃതികുടീരത്തില് പുഷ്പാര്ച്ചനയും തുടര്ന്ന് അനുസ്മരണ സമ്മേളനവും നടന്നു. കണ്ണൂര് നോര്ത്ത് ജില്ലാ അധ്യക്ഷന് കെ.കെ. വിനോദ്കുമാര് അധ്യക്ഷത വഹിച്ചു. ആര്എസ്എസ് ഉത്തരകേരള പ്രാന്തസംഘചാലക് അഡ്വ. കെ.കെ. ബാലറാം സംസാരിച്ചു. കോര്പ്പറേഷന് കൗണ്സിലര്മാരായ പി. മഹേഷ്, ദീപ്തി വിനോദ്, ബിജെപി നാഷണല് കൗണ്സില് അംഗം സി. രഘുനാഥ്, സംസ്ഥാന സമിതിയംഗം സി. നാരായണന്, മുന് ജില്ലാ പ്രസിഡന്റ് എ. ദാമോദരന്, ജില്ലാ ജനറല് സെക്രട്ടറി അജികുമാര് കരിയില്, യു.ടി. ജയന്തന് തുടങ്ങിയവര് പങ്കെടുത്തു. ജില്ലാ ജനറല് സെക്രട്ടറിമാരായ ടി.സി. മനോജ് സ്വാഗതവും എ.പി. ഗംഗാധരന് നന്ദിയും പറഞ്ഞു.
