തിരുവനന്തപുരം: ബിജെപി പ്രവര്ത്തകരെ ആക്രമിച്ച പൊലീസുദ്യോഗസ്ഥര്ക്കെതിരെ നിയമനടപടി സ്വീകരിക്കുമെന്ന് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര്. നെട്ടയത്ത് പൊലിസ് മര്ദ്ദനത്തില് പരിക്കേറ്റ് വീട്ടില് വിശ്രമിക്കുന്ന ബിനുവിനെ സന്ദര്ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
തെരഞ്ഞെടുപ്പ് കഴിഞ്ഞതോടെ സിപിഎമ്മിന് ചില പ്രയാസങ്ങള് ഉണ്ടായി തുടങ്ങിയിട്ടുണ്ട്. മേയ് 4ന് ശേഷം കേരളത്തില് മാറ്റം വരാന് പോകുന്നു എന്ന നിരാശയാണ് സിപിഎമ്മിന്. അതിന്റെ ഫലമായാണ് ചില പൊലീസുദ്യോഗസ്ഥരുടെ സഹായത്തോടെ ബിജെപി പ്രവര്ത്തകരെ ആക്രമിക്കുന്നതെന്നും അദ്ദേഹം പറഞ്ഞു. ഭരണ സംവിധാനം ഉപയോഗിച്ച് ബിജെപി പ്രവര്ത്തകരെ ആക്രമിക്കുന്ന സിപിഎം രീതി തെറ്റാണ്. ആ രീതി തുടരാന് ബിജെപി അനുവദിക്കില്ല. നിയമപരമായ നടപടികള് സ്വീകരിക്കും. സിഐ ആയാലും എസ്ഐ ആയാലും ബിജെപി പ്രവര്ത്തകരെ ആക്രമിക്കാന് ശ്രമിച്ചാല് തടയുമെന്നും അദ്ദേഹം പറഞ്ഞു.
ബിജെപി സംസ്ഥാന വൈസ് പ്രസിഡന്റ് ശ്രീലേഖയ്ക്കെതിരെയും സെക്രട്ടറി അഞ്ജനയ്ക്കെതിരെയും ഡെപ്യൂട്ടി മേയര് ആശാനാഥിനെതിരെയും കേസെടുത്ത് ഭീഷണിപ്പെടുത്താമെന്ന് വ്യാമോഹിക്കേണ്ട. ഇത് റഷ്യയും ചൈനയുമല്ല ഇന്ത്യയാണെന്ന് ഓര്ക്കണമെന്നും ഇത് സിപിഎമ്മിന് മനസിലായില്ലെങ്കില് ബിജെപി മനസിലാക്കികൊടുക്കുമെന്നും രാജീന് ചന്ദ്രശേഖര് പറഞ്ഞു. ബിജെപി സംസ്ഥാന സെക്രട്ടറി അഡ്വ.എസ് സുരേഷ്, സംസ്ഥാന വൈസ് പ്രസിഡന്റ് കെ.സോമന്
സിറ്റി ജില്ല പ്രസിഡന്റ് കരമന ജയന് തുടങ്ങിയവര് രാജീവ് ചന്ദ്രശേഖറിനൊപ്പം ഉണ്ടായിരുന്നു
