കൊൽക്കത്ത : പശ്ചിമ ബംഗാളിൽ ബാബറി മസ്ജിദിന്റെ മാതൃകയിൽ പള്ളി പണിയാൻ ഹുമയൂൺ കബീറിന് തൃണമൂൽ കോൺഗ്രസ് അനുമതി നൽകിയതായി കേന്ദ്ര ആഭ്യന്തര മന്ത്രി അമിത് ഷാ . സംസ്ഥാനത്ത് ഒരു ബിജെപി പാർട്ടി പ്രവർത്തകൻ പോലും ജീവിച്ചിരിക്കുന്നിടത്തോളം കാലം ബിജെപി ബാബറി മസ്ജിദ് നിർമ്മിക്കാൻ അനുവദിക്കില്ലെന്നും അദ്ദേഹം പറഞ്ഞു.
ബംഗാളിൽ ബിജെപി അധികാരത്തിൽ വന്നാൽ, പശുക്കടത്തിലും രാഷ്ട്രീയ അക്രമത്തിലും ഏർപ്പെടുന്നവരെ കർശനമായി നേരിടും. പിന്നീട് അവരുടെ അടുത്ത മൂന്ന് തലമുറകൾ പോലും അങ്ങനെ ചെയ്യാൻ ചിന്തിക്കുക പോലുമില്ലെന്നും ഹൂഗ്ലി ജില്ലയിലെ ഉത്തർപാറയിൽ പൊതുപരിപാടിയിൽ പങ്കെടുക്കവേ അമിത് ഷാ പറഞ്ഞു.
ഭരണം, ക്രമസമാധാനം, തൊഴിൽ മേഖലകളിൽ മമത ബാനർജി സർക്കാർ പരാജയപ്പെട്ടു . വരാനിരിക്കുന്ന നിയമസഭാ തിരഞ്ഞെടുപ്പുകൾ ബംഗാളിനെ തീവ്രവാദത്തിൽ നിന്നും കലാപങ്ങളിൽ നിന്നും നുഴഞ്ഞുകയറ്റക്കാരിൽ നിന്നും മോചിപ്പിക്കാനുള്ള മാർഗമാണെന്നും അമിത് ഷാ പറഞ്ഞു.
