വാഷിങ്ടണ്‍: ഇറാനുമായുള്ള യുദ്ധത്തില്‍ യുഎസിന്റെ ആയുധശേഖരത്തിലും ഖജനാവിലും വലിയ നഷ്ടങ്ങള്‍ വരുത്തിയെന്ന് റിപ്പോര്‍ട്ട്. യുഎസ് പ്രതിരോധ വകുപ്പിന്റെ ആസ്ഥാനമായ പെന്റഗണ്‍ പുറത്തുവിട്ട റിപ്പോര്‍ട്ട് പ്രകാരം 35 ബില്യണ്‍ ഡോളറാണ് (ഏകദേശം 3.3 ലക്ഷം കോടി രൂപ) ഇറാനെതിരെ യുഎസ് ചെലവഴിച്ചത്. ഒരോ ദിവസവും ഒരു ബില്യണ്‍ ഡോളര്‍ (9,000 കോടിയിലധികം രൂപ) ആണ് ആയുധങ്ങള്‍ക്ക് മാത്രമായി ചെലഴിച്ചത്.
മാത്രമല്ല യുഎസിന്റെ പക്കലുണ്ടായിരുന്ന അത്യാധുനിക മിസൈലുകളുടെ നല്ലൊരു ഭാഗവും ഇറാനെതിരെ പ്രയോഗിച്ചതായി റിപ്പോര്‍ട്ടില്‍ പറയുന്നു. ഇത് യുഎസിന്റെ പ്രതിരോധമേഖലയെ പ്രതിസന്ധിയിലാക്കിയിട്ടുണ്ട്.
യുദ്ധത്തിനായി ഇത്രയധികം ആയുധവും പണവും ചെലവഴിച്ചത് യുഎസിന്റെ ഭാവി സുരക്ഷയെ ബാധിക്കുമെന്ന ആശങ്ക ഉയര്‍ന്നിട്ടുണ്ട്. ഭാവിയില്‍ മറ്റേതെങ്കിലും രാജ്യങ്ങളില്‍ നിന്നുണ്ടാകുന്ന ഭീഷണിയെ നേരിടാന്‍ യുഎസിന് കഴിയില്ലെന്നാണ് പ്രതിരോധ വിദഗ്ധര്‍ വ്യക്തമാക്കുന്നത്.
അതേസമയം ഇറാനുമായുള്ള സംഘര്‍ഷത്തില്‍ ആണവായുധം ഉപയോഗിക്കാന്‍ താത്പര്യപ്പെടുന്നില്ലെന്നും അല്ലാതെ തന്നെ അവരെ തകര്‍ക്കാന്‍ കഴിയുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ് വീണ്ടും അവകാശവാദം ഉന്നയിച്ചിട്ടുണ്ട്. പരമ്പരാഗത ആയുധങ്ങള്‍ ഉപയോഗിച്ചുള്ള ആക്രമണം ഇറാനെ ഇതിനോടകം തകര്‍ത്തിട്ടുണ്ടെന്നാണ് ട്രംപിന്റെ വാദം. യുഎസിന്റെ മൂന്നാമത്തെ വിമാനവാഹിനിക്കപ്പല്‍ യുഎസ്എസ് ജോര്‍ജ് എച്ച്ഡബ്ല്യൂ ബുഷ് പശ്ചിമേഷ്യയില്‍ വിന്യസിച്ചതിന് പിന്നലെയാണ് ട്രംപിന്റെ പരാമര്‍ശം.
