സൂറിച്ച്: ഫിഫ ലോകകപ്പ് ഫുട്‌ബോള്‍ 2026ല്‍ യോഗ്യത നേടി മത്സരത്തിനൊരുങ്ങുന്ന ഇറാന് ടീമിനെ നീക്കി പകരം യോഗ്യത നേടാനാകാതെ പോയി ഇറ്റലിയെ കളിപ്പിക്കാനുള്ള ഒരു വിധ പദ്ധതികളും ആലോചനകളും ഫിഫയ്‌ക്കില്ലെന്ന് അധികൃതര്‍ വ്യക്തമാക്കി. ഇറാന്-അമേരിക്ക യുദ്ധ പശ്ചാത്തലത്തില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ദൂതന്‍ മുഖേന ഇത്തരം ഒരു ആവശ്യം ഫിഫയ്‌ക്ക് മുന്നില്‍ വച്ചിരുന്നതായി മാധ്യമ റിപ്പോര്‍ട്ടുകളുണ്ടായിരുന്നു. ഈ സാഹചര്യത്തിലാണ് ഫിഫ ഔദ്യോഗികമായി വ്യക്തത വരുത്തിയിരിക്കുന്നത്.
ഒരാഴ്‌ച്ച മുമ്പ് ഫിഫ അധ്യക്ഷന്‍ ജിയാനി ഇന്‍ഫാന്റിനോ ഇറാന് ലോകകപ്പ് കളിക്കാന്‍ എത്തിയിരിക്കും സംശയം വേണ്ടെന്ന് പ്രസ്താവിക്കുകയും ചെയ്തിരുന്നു. കഴിഞ്ഞ ദിവസം പ്രമുഖ അന്താരാഷ്ടര മാധ്യമമായ ഫിനാന്‍ഷ്യല്‍ ടൈംസിലാണ് അമേരിക്കന്‍ നയതന്ത്ര പ്രതിനിധി പാവോളോ സാംപോളി ഫിഫയ്‌ക്ക് മുന്നില്‍ ഇറാന് പകരം ഇറ്റലിയെ ലോകകപ്പ് കളിപ്പിക്കാന്‍ അവസരം നല്‍കണമെന്ന ആവശ്യം മുന്നോട്ട് വച്ചതായി റിപ്പോര്‍ട്ട് ചെയ്തത്.
