തിരുവനന്തപുരം : വട്ടിയൂര്ക്കാവ് നെട്ടയത്ത് ബിജെപി പ്രവര്ത്തകരെ സിപിഎം പ്രവര്ത്തകര് ആക്രമിച്ചതും പൊലീസ് ഏകപക്ഷീയമായ നടപടി സ്വീകരിച്ചതുമായി ബന്ധപ്പെട്ട് ബിജെപി പ്രതിഷേധം ശക്തമാക്കിയതിന് പിന്നാലെ വട്ടിയൂര്ക്കാവ് എസ് എച്ച് ഒ വിപിന് മെഡിക്കല് ലീവില്. സംഘര്ഷത്തിനിടെ എസ് എച്ച് ഒക്കും പരിക്കേറ്റിരുന്നു. എസ് എച്ച് ഒക്കെതിരെ നടപടി ആവശ്യപ്പെട്ട് ബിജെപി സമരം നടത്തവെയാണ് അവധിയില് പ്രവേശിച്ചത്.
ഒരാള് നഗ്നത പ്രദര്ശനം നടത്തിയെന്ന ബി ജെ പി പ്രവര്ത്തകന്റെ ഭാര്യയുടെ പരാതിയുമായി ബന്ധപ്പെട്ട തര്ക്കമാണ് വലിയ സംഘര്ഷത്തില് കലാശിച്ചത്. നെട്ടയം മലമുകളിലെ ബി ജെ പി പ്രവര്ത്തകന്റെ ഭാര്യ രാത്രിയോടെ വട്ടിയൂര്ക്കാവ് പൊലീസില് പരാതി നല്കിയിരുന്നു. പിന്നാലെ ഇവരുടെ ഭര്ത്താവായ ബി ജെ പി പ്രവര്ത്തകനെ സി പി എം പ്രവര്ത്തകര് തടഞ്ഞുവച്ചു. ബിജെപി പ്രവര്ത്തകര് സംഘടിച്ചതോടെ വട്ടിയൂര്ക്കാവ് പൊലീസ് സ്ഥലത്തെത്തി. എന്നാല് സി പി എമ്മിന് അനുകൂലമായാണ് പൊലീസ് നിലപാടെടുത്തത്.സി പി എം പ്രവര്ത്തകര് കല്ലേറും കമ്പ് എറിയലും നടത്തിയതോടെ സ്ഥിതി നിയന്ത്രണാതീതമായി. കൂടുതല് പൊലീസ് സ്ഥലത്തെത്തി ലാത്തിചാര്ജ്ജ് നടത്തി. ഇതിന്റെ തുടര്ച്ചയായി അടുത്ത ദിവസം ഇടപ്പഴനി ബാലസുബ്രമണ്യ ക്ഷേത്ര വളപ്പില് ക്ഷേത്ര സംരക്ഷണ സമിതിയുടെ യോഗത്തില് കടന്നുകയറിയ പൊലീസ് ദൈവങ്ങളുടെ ചിത്രങ്ങള് ഉള്പ്പെടെ തകര്ക്കുകയും പ്രവര്ത്തകരെ മര്ദ്ദിച്ച് പിടിച്ചു കൊണ്ടുപോവുകയും ചെയ്തിരുന്നു. ബി ജെ പി , സംഘ് പ്രവര്ത്തകര്ക്ക് സാരമായി പരിക്കേല്ക്കുകയും ചെയ്തു.
വട്ടിയൂര്ക്കാവ് പൊലീസ് സ്റ്റേഷനിലേക്ക് ബി ജെ പി പ്രതിഷേധ പ്രകടനം നടത്തുകയും ചെയ്തു.
