കളമശേരി: പഹല്ഗാമില് ഭീകരരുടെ വെടിയേറ്റ് വീരമൃത്യു വരിച്ച എന്. രാമചന്ദ്രന്റെ ഭാര്യ ഷീലയുടെയും മകള് ആരതിയുടെയും കണ്ണുകള് പരമ പവിത്രമതാമി മണ്ണില് ഭാരതാംബയെ പൂജിക്കാന് എന്ന ഗണഗീതം ഉയര്ന്നപ്പോള് ഈറനണിഞ്ഞു. രാമചന്ദ്രന് ഏറെ ഇഷ്ടപ്പെട്ട ഗണഗീതമായിരുന്നു ഇത്. ഇടപ്പള്ളി മങ്ങാട്ട് നീരാഞ്ജനം വീടിനടുത്തുള്ള ദേവന്കുളങ്ങര കവലയിലാണ് രാമചന്ദ്രന് അനുസ്മരണ സമിതി ഒന്നാം ശ്രദ്ധാഞ്ജലി ചടങ്ങ് സംഘടിപ്പിച്ചത്.
രാമചന്ദ്രന്റ ഛായാചിത്രത്തിന് മുന്പില് പുഷ്പങ്ങള് അര്പ്പിക്കുന്ന ചടങ്ങിലായിരുന്നു ഗണഗീതം ഉയര്ന്നത്. മകള് ആരതിയെ കെട്ടിപ്പിടിച്ച് അല്പനേരം നിന്ന ഷീല പെട്ടെന്ന് തന്നെ ശാന്തയായി. തുടര്ന്ന് മകളും പേരക്കുട്ടികളും മറ്റുള്ളവരും പുഷ്പങ്ങള് അര്പ്പിച്ചു.
രാജ്യത്ത് ഭീകരത ഉയര്ത്തിയവര്ക്കെതിരെ രാജ്യം കനത്ത തിരിച്ചടി നല്കി അഭിമാനം കാത്തു. അച്ഛനെ നഷ്ടമായെങ്കിലും ഭാരതാംബയോട് ഒപ്പം നില്ക്കുന്നതായി ആരതി പറഞ്ഞു. ഇത്തരത്തിലുള്ള പ്രവൃത്തി ഇനി ഉണ്ടാവരുതെന്നാണ് ആഗ്രഹിക്കുന്നതെന്നും ആരതി പറഞ്ഞു.
