1. മെക്‌സിക്കോയിലെ കിക്കോഫ് വേദി
നൂറ്റാണ്ടിന്റെ ഗോളും നൂറ്റാണ്ടിന്റെ മത്സരവും കണ്ട അസ്റ്റേക്ക
മെക്സിക്കോ തലസ്ഥാനം മെക്സിക്കോ സിറ്റിയിലെ വിഖ്യാതമായ അസ്റ്റേക്ക സ്റ്റേഡിയത്തിലാണ് ഇത്തവണത്തെ ഫുട്‌ബോള്‍ ലോക പൂരത്തിന്റെ കിക്കോഫ്. ജൂണ്‍ 11ന് ഭാരത സമയം രാത്രി 12.30ന് ആതിഥേയരായ മെക്‌സിക്കോയും ദക്ഷിണാഫ്രിക്കയും തമ്മിലാണ് ഉദ്ഘാടന മത്സരം. ഇതടക്കം 2026 ലോകകപ്പില്‍ അഞ്ച് മത്സരങ്ങളാണ് ഇവിടെ ഷെഡ്യൂള്‍ ചെയ്തിട്ടുള്ളത്. ഇതിന് മുമ്പ് രണ്ട് ലോകകപ്പുകളാണ് ഈ വേദിയില്‍ നടന്നിട്ടുള്ളത്. രണ്ട് തവണയും ലോക കിരീടം നേടിയത് ലോകം ഏറ്റവും അധികം ആഘോഷിച്ച രണ്ട് ഇതിഹാസ താരങ്ങള്‍- 1970ല്‍ പെലെയും 1986ല്‍ ഡീഗോ മറഡോണയും. 70ല്‍ പെലെയും ബ്രസീലും മെക്‌സിക്കോയില്‍ നേടിയത് അവരുടെ മൂന്നാം ലോകകപ്പായിരുന്നു. പക്ഷെ അത്തവണത്തെ ലോകകപ്പ് ഏറെ ശ്രദ്ധിക്കപ്പെട്ടത് സെമി ഫൈനല്‍ മത്സരത്തിലെ ഇറ്റലി-ജര്‍മനി പോരാട്ടത്തിലൂടെയാണ്. നിശ്ചിത സമയ മത്സരം മൂന്ന് ഗോള്‍ സമനിലയില്‍ പിരിഞ്ഞതിനെ തുടര്‍ന്ന് അധിക സമയത്താണ് ജേതാക്കള്‍ നിര്‍ണയിക്കപ്പെട്ടത്. 4-3ന്. ഇറ്റലി ജയിച്ച ഈ മത്സരം നൂറ്റാണ്ടിന്റെ മത്സരമായാണ് വിലയിരുത്തപ്പെടുന്നത്. 1986 ലോകകപ്പിലേക്ക് അസ്റ്റേക്കെ സ്റ്റേഡിയം എത്തുമ്പോള്‍ നിറഞ്ഞാടി കിരീടം കൈയ്യിലേന്തിയ ഡീഗോ മറഡോണയുടെ ചരിത്രകഥയെക്കാള്‍ അസ്റ്റേക്കയ്‌ക്ക് പറയാനുള്ളത് മറ്റൊരു കളിയെ കുറിച്ചാണ്. അക്കൊല്ലത്തെ ക്വാര്‍ട്ടര്‍ പോരാട്ടത്തിലെ അര്‍ജന്റീന-ഇംഗ്ലണ്ട് മത്സരം. മറഡോണ കൈകൊണ്ട് തട്ടി പന്ത് വലയ്‌ക്കകത്താക്കിയ ഗോള്‍ പിറന്ന മത്സരം. വിവാദത്തിനൊപ്പം ഇംഗ്ലണ്ട്-അര്‍ജന്റീന ഫുട്‌ബോള്‍ കുടിപ്പകയ്‌ക്ക് തുടക്കമിട്ട ഗോള്‍. ആ ഗോളിന് നാല് മിനിറ്റ് ശേഷം സ്വന്തം പാതിയില്‍ നിന്ന് തുടങ്ങി ആറ് ജര്‍മന്‍ താരങ്ങളെയും ഒടുവില്‍ ഗോളിയെയും വെട്ടിയൊഴിഞ്ഞ് മറഡോണ നേടിയ നൂറ്റാണ്ടിന്റെ ഗോള്‍ പിറന്നതും ഇതേ വേദിയിലാണ്.
അസ്റ്റേക്കയിലെ മത്സരക്രമം
ജൂണ്‍ 11: മെക്സിക്കോ-ദക്ഷിണാഫ്രിക്ക(ഗ്രൂപ്പ് എ)
ജൂണ്‍ 17: ഉസ്‌ബെക്കിസ്ഥാന്‍-കൊളംബിയ(ഗ്രൂപ്പ് കെ)
ജൂണ്‍ 24: ചെക്ക് റിപ്പബ്ലിക്-മെക്സിക്കോ(ഗ്രൂപ്പ് എ)
ജൂണ്‍ 30: റൗണ്ട് ഓഫ് 32 മത്സരം
ജൂലൈ 05: റൗണ്ട് ഓഫ് 16 മത്സരം
