അലഹബാദ്: സ്ത്രീകള്ക്കുള്ള പ്രസവാവധി അവരുടെ നിയമപരമായ അവകാശമാണെന്ന് അലഹബാദ് ഹൈക്കോടതി. രണ്ട് വര്ഷത്തിന് മുമ്പ് രണ്ടാമത്തെ പ്രസവാവധി അനുവദിക്കാം, നിയമവിരുദ്ധമല്ലെന്നും കോടതി അറിയിച്ചു. മനീഷ യാദവ് എന്ന ഗവണ്മെന്റ് പോളിടെക്നിക് ഉദ്യോഗസ്ഥയുടെ പ്രസവാവധി നിരസിച്ചതിനെ തുടര്ന്ന് നല്കിയ ഹര്ജി പരിഗണിക്കവേ ഹൈക്കോടതി ലഖ്നൗ ബെഞ്ച് ജസ്റ്റിസ് ജസ്റ്റിസ് കരുണേഷ് സിങ് പവാറിന്റേതാണ് ഈ ഉത്തരവ്.
2026 ഏപ്രില് 4നാണ് മനീഷ 180 ദിവസത്തെ പ്രസവാവധിക്ക് അപേക്ഷിക്കുന്നത്. എന്നാല് സാമ്പത്തിക മാര്ഗരേഖ 153(1) പ്രകാരം രണ്ട് വര്ഷം തികയാതെ പ്രസവാവധി അനുവദിക്കാന് പറ്റില്ലെന്ന് ചൂണ്ടിക്കാട്ടി അധികൃതര് ഈ അപേക്ഷ തള്ളി. ഇതിനെതിരെ മനീഷ കോടതിയെ സമീപിക്കുകയായിരുന്നു. എന്നാല് പ്രസവാവധി നിയമപരമായതും ക്ഷേമാധിഷ്ഠിതവുമായ ഒരു അവകാശമാണ്. കേന്ദ്ര നിയമവുമായി പൊരുത്തപ്പെടാത്ത സംസ്ഥാന ചട്ടങ്ങള്ക്ക് നിയമസാധുതയില്ലെന്ന് കോടതി വ്യക്തമാക്കി. ഹര്ജിക്കാരിയുടെ അവധി അപേക്ഷ നിരസിച്ച പഴയ ഉത്തരവ് റദ്ദാക്കിയ കോടതി, ഈ മാസം ആറ് മുതല് ഒക്ടോബര് രണ്ട് വരെ അവര്ക്ക് പ്രസവാവധി അനുവദിക്കാന് ബന്ധപ്പെട്ട അധികാരികള്ക്ക് നിര്ദേശം നല്കി.
