കോട്ടയം: ശാന്തസമുദ്രത്തിലെ താപനില ഉയരുന്ന പ്രതിഭാസമായ എല് നിനോ അതിവേഗം ശക്തിപ്പെടുന്നതിനാല് ഇക്കുറി കേരളം നേരിടേണ്ടിവരിക ചൂടുള്ള തണുപ്പ് കാലത്തെയും പൊള്ളുന്ന വേനല്ക്കാലത്തെയും. മണ്സൂണിനെ തകിടംമറിക്കാന് തക്ക അളവില് എല് നിനോ ശക്തമായി. ശാന്തസമുദ്രത്തിലെ ഭൂമധ്യരേഖാ പ്രദേശത്ത് താപനില ഇനിയും കൂടുമെന്നാണ് വിവിധ കാലാവസ്ഥാ പ്രവചന മാതൃകകള് സൂചിപ്പിക്കുന്നതെന്ന് കാലാവസ്ഥാ നിരീക്ഷകരായ മെറ്റ്ബീറ്റ് വെതര് പറയുന്നു.
1997-98ലുണ്ടായ എല് നിനോയുടേതിന് തുല്യമായ ശക്തിയോടെയാണ് ഇത്തവണത്തെ എല് നിനോയും. ഇത് മൂര്ധന്യത്തിലെത്തുക ഒക്ടോബര്, നവംബര്, ഡിസംബര് മാസങ്ങളിലാകാം. 2027ലെ വേനല്ക്കാലത്തെ ഇത് ബാധിക്കും. കേരളത്തിലെ തുലാവര്ഷക്കാലത്താണ് എല് നിനോ ഏറ്റവും ശക്തിപ്പെടുകയെന്നതിനാല് കാലവര്ഷം പോലെതന്നെ തുലാമഴയും സംസ്ഥാനത്ത് കുറയാം.
അടുത്ത ഏതാനും മാസങ്ങളിലാണ് എല് നിനോയുടെ രൂക്ഷമായ സാഹചര്യം സംസ്ഥാനം നേരിടേണ്ടി വരിക. നിലവില് മണ്സൂണ് കാറ്റിന്റെ ശക്തി ദുര്ബലപ്പെട്ടിട്ടുണ്ട്. എല് നിനോ, വാണിജ്യവാതങ്ങളെ പ്രതികൂലമായി ബാധിക്കും. ഇതാണ് കര്ക്കടകത്തിലും മഴ കുറയാന് ഇടയാക്കിയത്. അറബിക്കടലിലും ബംഗാള് ഉള്ക്കടലിലും ശക്തമായ ന്യൂനമര്ദങ്ങള് രൂപപ്പെട്ടാലേ കേരളത്തില് ഏതാനും ദിവസം തുടരുന്ന രീതിയിലുള്ള ശക്തമായ മഴയ്ക്ക് സാധ്യതയുള്ളൂ എന്നും മെറ്റ്ബീറ്റ് വെതര് പറയുന്നു.
കഴിഞ്ഞദിവസം ബംഗാള് ഉള്ക്കടലില് രൂപപ്പെട്ട ന്യൂനമര്ദം വടക്കന് ഒഡിഷ, ബംഗാള് ഭാഗത്തേക്ക് നീങ്ങിയതോടെ കേരളത്തിന് ലഭിക്കേണ്ട മഴ ഇല്ലാതായി. ഈ ന്യൂനമര്ദം കാരണം പടിഞ്ഞാറന് കാറ്റുകള് മധ്യഭാരതത്തിലേക്ക് ആകര്ഷിക്കപ്പെടുകയാണ്. കര്ക്കടക മാസം തുടങ്ങുമ്പോള് കേരളത്തില് ശക്തമായ കാലവര്ഷം ലഭിക്കേണ്ടതാണെങ്കിലും എല് നിനോ മൂലം ദുര്ബലമായ പടിഞ്ഞാറന് കാറ്റ് ഈ സീസണില് പ്രതീക്ഷിച്ചതിലേറെ ശക്തി കുറഞ്ഞ നിലയിലുമാണ്.
വരുന്ന ആഴ്ചകളിലും ശക്തമായ മഴ ലഭിക്കുമെന്ന അന്തരീക്ഷ സൂചനകളില്ല. മഴ മാറി നില്ക്കുന്നതിനാല് സംസ്ഥാനത്തെ താപനിലയിലും വര്ധനയുണ്ട്. സാധാരണയിലും മൂന്ന് മുതല് നാല് വരെ ഡിഗ്രി സെല്ഷ്യസ് കൂടുതല് താപനിലയാണ് കഴിഞ്ഞ ദിവസങ്ങളില് സംസ്ഥാനത്ത് രേഖപ്പെടുത്തിയത്. കാലവര്ഷം ദുര്ബലമാകുന്നത് അറബിക്കടലിനെ ചൂടാക്കി നിര്ത്തുമെന്ന സാഹചര്യമാണ്. ഇത് ഇടിമിന്നലിന് കാരണമാകുന്ന മേഘങ്ങളെ രൂപപ്പെടുത്തുകയും മിന്നല്പ്രളയത്തിനിടയാക്കുന്ന ഒറ്റപ്പെട്ട കനത്ത മഴ പെയ്യിക്കുകയും ചെയ്യുമെന്നും പ്രവചിക്കുന്നുണ്ട്.
