പെരിന്തല്‍മണ്ണ: രാഷ്‌ട്ര പുരോഗതിക്ക് നിസ്വാര്‍ത്ഥമതികളായ വ്യക്തികളെ സൃഷ്ടിക്കേണ്ടതുണ്ടെന്ന് ആര്‍എസ്എസ് ഉത്തര പ്രാന്ത സംഘചാലക് അഡ്വ. കെ.കെ. ബാലറാം പറഞ്ഞു. പെരിന്തല്‍മണ്ണ വള്ളുവനാട് വിദ്യാഭവനില്‍ നടക്കുന്ന ആര്‍എസ്എസ് ഉത്തര കേരള പ്രാന്ത സംഘ ശിക്ഷാവര്‍ഗ് ഉദ്ഘാടനം ചെയ്യുകയായിരുന്നു അദ്ദേഹം.
രാഷ്‌ട്രത്തിന്റെ സര്‍വ്വതോമുഖമായ ഉന്നതി അഥവാ പരമവൈഭവമാണ് ആര്‍എസ്എസ് ലക്ഷ്യം വെക്കുന്നത്. നിസ്വാര്‍ത്ഥ മനോഭാവത്തോടെ പ്രവര്‍ത്തിക്കാനുള്ള വ്യക്തികളെ വാര്‍ത്തെടുക്കുകയാണ് ശാഖകളിലൂടെ സംഘം ചെയ്യുന്നത്. അവര്‍ക്ക് അത്തരം പരിശീലനം നല്‍കുകയാണ് സംഘശിക്ഷാവര്‍ഗ് പോലുള്ള പരിശീലന ശിബിരങ്ങള്‍ ചെയ്യുന്നത്. സമാജത്തില്‍ സംഘടിത മനോഭാവം ഉണ്ടാകണം. വേര്‍തിരിവുകള്‍ക്ക് അതീതമായി നാം ഒന്നാണെന്ന ബോധം സൃഷ്ടിക്കണം. അതിനു വേണ്ടിയാണ് സംഘം പ്രവര്‍ത്തിക്കുന്നത്, അദ്ദേഹം പറഞ്ഞു. വര്‍ഗ് സര്‍വ്വാധികാരി അഡ്വ. കെ.എസ്. റോഷ് അധ്യക്ഷത വഹിച്ചു. വര്‍ഗ് കാര്യവാഹ് സി.കെ. സുനില്‍, ആര്‍എസ്എസ് ക്ഷേത്രീയ ശാരീരിക് ശിക്ഷണ്‍ പ്രമുഖ് ഡി. ശങ്കര്‍, പ്രാന്തപ്രചാരക് ആ. വിനോദ് തുടങ്ങിയവര്‍ സംബന്ധിച്ചു.
കാസര്‍കോട് മുതല്‍ തൃശൂര്‍ വരെയുള്ള ജില്ലകളില്‍ നിന്ന് 310 ശിക്ഷാര്‍ത്ഥികളാണ് ശിബിരത്തില്‍ പങ്കെടുക്കുന്നത്. മെയ് 6ന് സമാപിക്കും. 40 വയസിന് മുകളിലുള്ളവരുടെ വിശേഷ സംഘശിക്ഷാവര്‍ഗ് ചാലക്കുടിയില്‍ 24ന് ആരംഭിക്കും.
