തിരുവനന്തപുരം: കേന്ദ്രസര്ക്കാര് കൊണ്ടുവന്ന സോളാര് പദ്ധതിയ്ക്ക് വേണ്ടത്ര പ്രോത്സാഹനം നല്കിയിരുന്നെങ്കില് കേരളത്തില് വൈദ്യുതി ഉപഭോഗത്തില് ഇരുപത് ശതമാനം പരിഹാരിക്കാന് സാധിക്കുമായിരുന്നു. പിഎം സൂര്യഘര് മുഫ്ത് ബിജ്ലി യോജന സോളാര് പദ്ധതി വഴി പാനലുകള് സ്ഥാപിക്കുന്നതിനുള്ള ചിലവിന്റെ ഒരു വലിയ ഭാഗം സര്ക്കാര് സബ്സിഡിയായി നല്കുന്നുണ്ട്. മൂന്ന് കിലോവാട്ട് വരെയുള്ള സിസ്റ്റങ്ങള്ക്ക് നിലവില് 78,000 വരെ സബ്സിഡി ലഭിക്കും.
പ്രതി മാസം 300 യൂണിറ്റ് വരെ വൈദ്യുതി സൗജന്യമായി ലഭിക്കും. വീട്ടിലെ ആവശ്യത്തിന് ശേഷം ബാക്കി വരുന്ന വൈദ്യുതി ഗ്രിഡിലേക്ക് നല്കാന് സാധിക്കും. ബാക്കി വരുന്ന വൈദ്യുതി ഗ്രിഡിലേക്ക് നല്കുന്ന തുക കെഎസ്ഇബി ഉപഭോക്താവിന് നല്കണം. ഉതാണ് കെഎസ്ഇബി സോളാര് പദ്ധതിയെ പ്രോത്സാഹിപ്പിക്കാത്തത്. കൂടാതെ സ്വകാര്യ കമ്പനികളില് നിന്ന് വൈദ്യുതി വാങ്ങുന്നതോടെ നേതാക്കള്ക്ക് കിട്ടേണ്ടത് കിട്ടുകയും ചെയ്യും.
പവര് കട്ടിനുള്ള സാധ്യത തള്ളാതെ മന്ത്രി
സംസ്ഥാനത്ത് പവര്കട്ടിനോ ലോഡ് ഷെഡിങ്ങിനോ ഉള്ള സാഹചര്യമുണ്ടെന്നും ഇതൊഴിവാക്കാന് ശ്രമം തുടങ്ങിയതായും വൈദ്യുതി മന്ത്രി കെ. കൃഷ്ണന്കുട്ടി.
പവര് എക്സ്ചേഞ്ചില് നിന്ന് കൂടിയ അളവില് വൈദ്യുതി ലഭ്യമാക്കുന്നത് ബുദ്ധിമുട്ട് ആണ്. 22ന് വൈദ്യുതി റെഗുലേറ്ററി കമ്മിഷന്റെ പൊതുതെളിവെടുപ്പിന് ശേഷം വൈദ്യുതി നിരക്ക് വര്ദ്ധിപ്പിക്കുന്നതിനുള്ള അനുമതി ലഭ്യമാക്കുമെന്ന് പ്രതീക്ഷിക്കുന്നതായി മന്ത്രി പറഞ്ഞു.
നിരക്ക് കൂട്ടേണ്ടി വരും
വൈദ്യുതി പുറത്ത് നിന്ന് കൂടിയ നിരക്കില് വാങ്ങിയ്ക്കുന്നതിനാല് വൈദ്യുതി നിരക്ക് വര്ദ്ധിപ്പിക്കേണ്ടി വരും. കെഎസ്ഇബിയുടെ ബാധ്യത നികത്താന് ഇന്ധന സര്ചാര്ജ് എന്ന പേരിലോ യൂണിറ്റ് നിരക്ക് കൂട്ടിയോ ഉപഭോക്താക്കളില് നിന്ന് പണം ഈടാക്കാന് ബോര്ഡ് നീക്കം തുടങ്ങിക്കഴിഞ്ഞു. തെരഞ്ഞെടുപ്പ് കാലമായതിനാല് സര്ക്കാര് തലത്തില് കടുത്ത തീരുമാനങ്ങള് എടുക്കാന് സാധിച്ചില്ല. ലോഡ്ഷെഡിങ് പോലുള്ള നടപടികള് മാറ്റി വെയ്ക്കേണ്ടതായും വന്നു.
