ആലപ്പുഴ: മുന്‍ സിപിഎം നേതാവും അമ്പലപ്പുഴ നിയോജക മണ്ഡലത്തിലെ യുഡിഎഫ് സ്ഥാനാര്‍ത്ഥിയുമായ ജി. സുധാകരനും, സിപിഎം, ഡിവൈഎഫ്ഐ നേതാക്കളുമായി സ്വത്ത് വിവരം സംബന്ധിച്ച് സമൂഹമാധ്യമങ്ങളിലുടെ പോര് രൂക്ഷമായി. നേരത്തെ നാമനിര്‍ദേശപത്രികയില്‍ ജി. സുധാകരന്‍ ബോധിപ്പിച്ച സ്വത്തുവകകള്‍ വ്യാജമാണെന്ന പരാതിയുമായി ഡിവൈഎഫ്ഐ ജില്ലാ പ്രസിഡന്റ് എസ്. സുരേഷ് കുമാര്‍ തെരഞ്ഞെടുപ്പ് ഓഫീസര്‍ക്ക് പരാതി നല്‍കിയിരുന്നു. ഇതിന് പിന്നാലെ മന്ത്രി സജി ചെറിയാനും, എംഎല്‍എ എച്ച്. സലാമും പരാതിയെ ന്യായീകരിച്ചിരുന്നു.
ഇതിന് മറുപടിയായി ജി. സുധാകരനും സമൂഹ മാധ്യമ കുറിപ്പുമായി രംഗത്തെത്തി. മന്ത്രി സജി ചെറിയാന്റെയും എച്ച്. സലാം എംഎല്‍എയുടെയും സ്വത്ത് വിവരങ്ങള്‍ അന്വേഷിക്കണമെന്നും, കൂട്ടത്തില്‍ തന്റെ കുടുംബത്തിന്റെ സ്വത്ത് വിവരങ്ങളും അന്വേഷിക്കാമെന്നും അദ്ദേഹം ഫേസ്ബുക്ക് കുറിപ്പില്‍ വ്യക്തമാക്കി.
”എനിക്ക് എന്റെ എംഎല്‍എ പെന്‍ഷനും 10 വര്‍ഷ മന്ത്രി ശമ്പളവും ആണ് ചെലവ് കഴിച്ചുള്ള സമ്പാദ്യം. എന്റെ ഭാര്യക്ക് 31 വര്‍ഷം കോളജ് അദ്ധ്യാപിക എന്ന നിലയ്‌ക്ക് സര്‍വീസില്‍ യുജിസി ശമ്പളവും പെന്‍ഷനും ഒപ്പം അവര്‍ക്ക് ലഭിച്ച ഗ്രാറ്റിവിറ്റി, പ്രൊവിഡന്റ് ഫണ്ട് എന്നിവയാണ് സമ്പാദ്യം. ഞങ്ങളുടെ സമ്പാദ്യങ്ങള്‍ മകന്റെ പേരില്‍ നക്ഷേപിക്കുകയോ മാറ്റിക്കൊടുക്കുകയോ ചെയ്യുന്നത് ഞങ്ങളുടെ മൗലിക അവകാശമാണ്. ഏക മകന്‍ 19 വര്‍ഷമായി പ്രവാസിയാണ്. അതിലുള്ള സമ്പാദ്യം അവനും ഭാര്യക്കും ഉണ്ട്. മേല്‍പ്പറഞ്ഞ രണ്ടു ചങ്ങാതികളുടെ സ്വത്തുക്കളെ പറ്റിയും ഞങ്ങളുടെ സ്വത്തുക്കളെ പറ്റിയും അന്വേഷണ ഏജന്‍സികള്‍ക്ക് അന്വേഷിക്കാവുന്നതാണ്. എന്നാല്‍ മണിക്കൂറുകള്‍ക്കകം സുധാകരന്‍ ഈ പോസ്റ്റ് ഫോസ്ബുക്കില്‍ നിന്ന് നീക്കം ചെയ്തു.
ഇതെ തുടര്‍ന്ന് സ്വത്ത് വിവരങ്ങള്‍ വെളിപ്പെടുത്താന്‍ സുധാകരനെ വെല്ലുവിളിച്ച് ഡിവൈഎഫ്ഐ ജില്ലാ പ്രസിഡന്റ് എസ്. സുരേഷ് കുമാര്‍ വീണ്ടും രംഗത്തെത്തി. സ്വത്ത് വകകള്‍ സുതാര്യമാണെങ്കില്‍ സുധാകരനും ഭാര്യയും മകനും മരുമകളും എന്‍ആര്‍ഐ ഉള്‍പ്പെടെയുള്ള മുഴുവന്‍ ബാങ്ക് രേഖകളും ഹാജരാക്കാന്‍ തയാറുണ്ടോയെന്ന് സുരേഷ് ഫേസ്ബുക്ക് പോസ്റ്റിലൂടെ ചോദിക്കുന്നു. ഭാര്യയുടെ പേരിലുള്ള അക്കൗണ്ടില്‍ നിന്നും 50 ലക്ഷം മാറ്റിയത് എന്തിന് വേണ്ടിയാണെന്നും നോമിനേഷനില്‍ പണം കുറച്ച് കാണിക്കാനായിരുന്നില്ലേ ഇതെന്നുമാണ് അദ്ദേഹത്തിന്റെ ചോദ്യം. അഫിഡവിറ്റില്‍ മകന്റെ സ്വത്തുക്കള്‍ മറച്ചുവെച്ചത് തെറ്റല്ലേ എന്നും സുരേഷ് കുമാര്‍ ചോദിച്ചു.
സുരേഷ്‌കുമാന്റെ ഫേസ്ബുക്ക് കുറിപ്പിന്റെ പൂര്‍ണരൂപം: മിസ്റ്റര്‍ ജി. സുധാകരന്‍, താങ്കള്‍ക്ക് എതിരെ ഞാന്‍ നല്‍കിയ പരാതിയില്‍ സൂചിപ്പിച്ചിട്ടുള്ള കാര്യങ്ങളോട് വളച്ചുകെട്ടില്ലാതെ നേരെ ഉത്തരം പറയുമോ? ഞാന്‍ പരാതിയില്‍ ഉറച്ച് നില്‍ക്കുന്നു. താങ്കള്‍ തെരഞ്ഞെടുപ്പിന്റെ ഒരാഴ്‌ച്ച മുന്‍പ് 50 ലക്ഷം ഭാര്യയുടെ പേരില്‍ നിന്ന് മാറ്റിയത് നോമിനേഷനില്‍ പണം കുറച്ച് കാണിക്കാന്‍ ആയിരുന്നില്ലേ? ഇത് ജനങ്ങളെ കബളിപ്പിക്കാന്‍ അല്ലെ? ഒരേ മേല്‍വിലാസത്തില്‍ താമസിക്കുന്ന മകന്റെ സ്വത്ത് വിവരങ്ങള്‍ താങ്കള്‍ മറച്ചുവെച്ചത് തെറ്റായ കാര്യം അല്ലെ? സ്വത്തുക്കള്‍ സുതാര്യമാണെങ്കില്‍ താങ്കളുടെയും ഭാര്യയുടെയും മകന്റെയും മരുമകളുടെയും എന്‍ആര്‍ഐ ഉള്‍പ്പെടെയുള്ള മുഴുവന്‍ ബാങ്ക് രേഖകളും വെളിപ്പെടുത്താന്‍ തയാറാണോ?
