കോഴിക്കോട്: ഭക്ഷ്യവസ്തുക്കളില് വ്യാവസായിക എസന്സ് കലര്ത്തിയ ഭക്ഷ്യനിര്മാണ യൂണിറ്റ് അടപ്പിച്ചു. നല്ലളത്തെ ‘ആസാദ് ഫുഡ് പ്രൊഡക്ട്സ്’ ആണ് കഴിഞ്ഞ ദിവസത്തെ മിന്നല് പരിശോധനയില് ഭക്ഷ്യസുരക്ഷാ വിഭാഗം അടച്ചുപൂട്ടിയത്.
ബിരിയാണിക്കും മറ്റു ഭക്ഷ്യവിഭവങ്ങള്ക്കും സുഗന്ധത്തിനുപയോഗിക്കുന്ന റോസ് വാട്ടറില് വ്യാവസായിക എസന്സ് കലര്ത്തി വിപണിയിലെത്തിച്ചതായി കണ്ടെത്തിയതിനെ തുടര്ന്നാണ് നടപടി. ഭക്ഷ്യവസ്തുക്കളില് ഉപയോഗിക്കാന് പാടില്ലാത്ത ഇന്ഡസ്ട്രിയല് ഗ്രേഡ് എസന്സ് വലിയ അളവില് കടയില് നിന്നു കണ്ടെത്തി. ‘ഇന്ഡസ്ട്രിയല് യൂസ് ഓണ്ലി’ എന്ന ലേബലുള്ള കാനുകളാണ് സ്ഥാപനത്തില് നിന്ന് പിടിച്ചെടുത്തത്.
സോപ്പ്, അഗര്ബത്തി, പെര്ഫ്യൂം, ഡിറ്റര്ജന്റ് തുടങ്ങിയവയുടെ നിര്മാണത്തിന് മാത്രമായി ഉപയോഗിക്കേണ്ട രാസമിശ്രിതമാണ് റോസ് വാട്ടര് തയാറാക്കാനുപയോഗിച്ചതെന്ന് ഉദ്യോഗസ്ഥര് പറഞ്ഞു. റോസ് വാട്ടറിനു പുറമേ അച്ചാര്, സോസ് തുടങ്ങിയവയും ഇവിടെയുണ്ടാക്കിയിരുന്നു.
നിര്മാണശാല ഭക്ഷ്യസുരക്ഷാ മാനദണ്ഡങ്ങള് പൂര്ണമായും ലംഘിക്കപ്പെട്ട നിലയിലായിരുന്നു. ഉത്പാദന മേഖലയില് എലിക്കാഷ്ടം, തകര്ന്ന കുപ്പിച്ചില്ലുകള്, മാലിന്യക്കൂമ്പാരങ്ങള് എന്നിവ കണ്ടെത്തി. ശുചിത്വമില്ലാത്ത സാഹചര്യത്തില് ഭക്ഷ്യവസ്തുക്കളുണ്ടാക്കിയിരുന്നെന്ന കണ്ടെത്തലും റിപ്പോര്ട്ടിലുണ്ട്. സ്ഥാപനത്തില് നിന്ന് ശേഖരിച്ച സാമ്പിളുകള് ലബോറട്ടറിയിലേക്ക് അയച്ചു. പരിശോധനാഫലം ലഭിച്ച ശേഷം നിയമ പ്രകാരമുള്ള നടപടികള് സ്വീകരിക്കുമെന്ന് ഭക്ഷ്യസുരക്ഷാ വകുപ്പ് അറിയിച്ചു.
