കൊല്ക്കത്ത: പുറത്താകാതെയുള്ള അര്ദ്ധ സെഞ്ചുറിയുമായി റിങ്കു സിങ്ങും വിലപ്പെട്ട മൂന്ന് വിക്കറ്റ് നേടിക്കൊണ്ട് വരുണ് ചക്രവര്ത്തിയും ചേര്ന്ന് കൊല്ക്കത്ത നൈറ്റ് റൈഡേഴ്സിന് സീസണിലെ ആദ്യ ജയം സമ്മാനിച്ചു. സീസണില് അത്യുഗ്രന് ഫോമിലുള്ള രാജസ്ഥാന് റോയല്സിനെ നാല് വിക്കറ്റിന് തോല്പ്പിച്ച മത്സരത്തില് റിങ്കു(34 പന്തില് 53) പുറത്താകാതെ നിന്നു. മത്സരത്തില് ആദ്യം ബാറ്റ് ചെയ്ത രാജസ്ഥാന് 20 ഓവറില് ഒമ്പത് വിക്കറ്റ് നഷ്ടത്തില് 155 റണ്സെടുത്തു. ആറ് വിക്കറ്റ് നഷ്ടപ്പെട്ട കൊല്ക്കത്ത 19.4 ഓവറില് 161 റണ്സെടുത്ത് ലക്ഷ്യം മറികടന്നു.
156 റണ്സെന്ന പ്രാപ്യമായ ലക്ഷ്യത്തിലേക്ക് ബാറ്റേന്തിയ കൊല്ക്കത്തയ്ക്ക് ആദ്യ പന്തില് തന്നെ തിരിച്ചടി നേരിട്ടു. വിശ്വസ്തനായ ഓപ്പണര് ടിം സെയ്ഫേര്ട്ട് പുറത്ത്. ജോഫ്ര ആര്ച്ചര് കുറ്റി തെറിപ്പിക്കുകയായിരുന്നു. തൊട്ടടുത്ത ഓവര് എറിയാനെത്തിയ നാന്ദ്രെ ബര്ഗര് മറ്റൊരു ഓപ്പണര് കൂടിയായ ക്യാപ്റ്റന് അജിങ്ക്യ രഹാനയെ പൂജ്യത്തിന് മടക്കിയയച്ചു. തുടക്കത്തിലേറ്റ ഈ തിരിച്ചടി വകവയ്ക്കാതെ ബാറ്റിങ് ആരംഭിച്ച കൊല്ക്കത്ത ബാറ്റര്മാരെ ഇടയ്ക്കിടെ പുറത്താക്കാന് രാജസ്ഥാന് ബൗളിങ് നിരയ്ക്ക് സാധിച്ചു. അക്ഷരാര്ത്ഥത്തില് ആദ്യം ബാറ്റ് ചെയ്ത രാജസ്ഥാന് മേല് കൊല്ക്കത്ത ബൗളര്മാര് ഏര്പ്പെടുത്തിയ കടുത്ത നിയന്ത്രണത്തിനുള്ള തിരിച്ചടിയാകുകയായിരുന്നു. അംങ്ക്രിഷ് രഘുവംശിയും(10), കഴിഞ്ഞ മത്സരത്തിലെ അര്ദ്ധ സെഞ്ചുറിക്കാരന് കാമറോണ് ഗ്രീനും(27) പുറത്തായി. കൊല്ക്കത്ത ഏഴ് ഓവറില് 52 റണ്സിലെത്തുമ്പോള് നാല് വിക്കറ്റ് നഷ്ടപ്പെട്ടതോടെയാണ് റിങ്കു സിങ് ക്രീസിലെത്തുന്നത്. റിങ്കുവിനൊപ്പം പൊരുതാന് ശ്രമിച്ച റോവ്മാന് പവലും(23) രമന്ദീപ് സീങ്ങും(10) ഏറെ നേരം പിടിച്ചുനില്ക്കാനാവാതെ മടങ്ങി. തുടര്ന്ന് ക്രീസിലെത്തിയ അനുകൂല് റോയി(29)യെ കൂട്ടുപിടിച്ച് റിങ്കു ടീമിനെ വിജയത്തിലേക്ക് നയിക്കുകയായിരുന്നു. അഞ്ച് ബൗണ്ടറികളും രണ്ട് സിക്സറും അടങ്ങുന്നതായിരുന്നു റിങ്കുവിന്റെ ഇന്നിങ്സ്.
ടോസ് നേടി മികച്ച തുടക്കമിട്ട രാജസ്ഥാന്റെ അപകടകാരിയായ ഓപ്പണര് വൈഭവ് സൂര്യവംശിയെ(46) പുറത്താക്കി വരുണ് ചക്രവര്ത്തിയാണ് കൊല്ക്കത്തയ്ക്ക് ബ്രേക്ക് ത്രൂ നല്കിയത്. 8.4 ഓവറില് 81 റണ്സെടുത്തു നില്ക്കെയാണ് രാജസ്ഥാന് ആദ്യ വിക്കറ്റ് നഷ്ടപ്പെട്ടത്. തന്റെ അടുത്ത ഓവറില് മറ്റൊരു ഹിറ്റ് ബാറ്റര് ധ്രുവ് ജുറലിനെയും വരുണ് പുറത്താക്കി. പിന്നീട് നന്നായി കളിച്ചുകൊണ്ടിരുന്ന ഓപ്പണര് യശസ്വി ജയ്സ്വാള്(39) സുനില് നരൈന് വിക്കറ്റ് സമ്മാനിച്ച് മടങ്ങിയതോടെ രാജസ്ഥാന് ബാറ്റിങ് നിര കൊല്ക്കത്ത ബൗളിങ് നിയന്ത്രണത്തിലായി. ക്യാപ്റ്റന് റയാന് പരാഗിനെ(12) കൂടി വീഴ്ത്തി വരുണ് രാജസ്ഥാന് ഇന്നിങ്സിന്റെ കടിഞ്ഞാണ് കൈക്കലാക്കി. നാല് ഓവറുകളില് 14 റണ്സ് മാത്രം വിട്ടുകൊടുത്താണ് വരുണിന്റെ മൂന്ന് വിക്കറ്റ് പ്രകടനം. പിന്നീട് രാജസ്ഥാന് നിരയിലെ ആര്ക്കും തന്നെ കാര്യമായ സംഭാവന നല്കാന് സാധിച്ചില്ല. വരുണ് ചക്രവര്ത്തിയാണ് കളിയിലെ താരമായത്.
