ന്യൂദല്ഹി: മറുനാട്ടിലും സത്യസന്ധതയുടെ പ്രതീകമായി മലയാളി. ദല്ഹി രമേശ് നഗര് ഹെഡ്പോസ്റ്റ് ഓഫീസിലെ പോസ്റ്റുമാന് വൈശാഖ് ശേഖറാണ് വീണുകിട്ടിയ മൂന്ന് ലക്ഷം രൂപ ഉടമയ്ക്ക് തിരിച്ച് നല്കി മാതൃകയായത്.
ദല്ഹിയിലെ സ്വകാര്യ ഇവന്റ് മാനേജ്മെന്റ് കമ്പനിയുടെ സ്ഥാപകനായ അനൂജ് ശര്മ്മയുടെ കയ്യിലുണ്ടായിരുന്ന മൂന്ന് ലക്ഷം രൂപ യാത്രക്കിടെ നഷ്ടപ്പെടുകയായിരുന്നു. ഈ പണം ഡ്യൂട്ടിക്കിടെ വൈശാഖ് ശേഖറിന് വീണുകിട്ടി. പണം കിട്ടിയ വിവരം തൊട്ടടുത്ത കെട്ടിടത്തിലുള്ളവരെ അറിയിച്ച വൈശാഖ് പോലീസ് സ്റ്റേഷനില് ഏല്പ്പിക്കാമെന്നും അറിയിച്ചു. പണം നഷ്ടപ്പെട്ട ആള് തിരക്കി വന്നാല് ബന്ധപ്പെടാനായി ഫോണ് നമ്പറും നല്കി. പണം നഷ്ടപ്പെട്ടത് ശ്രദ്ധയില്പ്പെട്ടതിനെ തുടര്ന്ന് തിരക്കിയെത്തിയ അനൂജ് ശര്മ്മ വൈശാഖ് ശേഖറിന് പണം ലഭിച്ചതറിഞ്ഞ് അദ്ദേഹത്തെ ബന്ധപ്പെട്ടു. ഈ സമയം പോലീസ് സ്റ്റേഷനിലേക്കുള്ള യാത്രയിലായിരുന്നു വൈശാഖ്. തുടര്ന്ന് അനൂജ് ശര്മ്മയ്ക്ക് പണം കൈമാറി. നഷ്ടപ്പെട്ട പണം തിരിച്ചുനല്കിയ വൈശാഖിനെ അനൂജ് ശര്മ്മ നന്ദി അറിയിച്ചു. തപാല് വകുപ്പിലെ ഉന്നത ഉദ്യോഗസ്ഥരടക്കം വൈശാഖിനെ അഭിനന്ദിച്ചു.
ബിജിഡികെഎസ് (ബിഎംഎസ്) കേരള സര്ക്കിള് മുന് അസിസ്റ്റന്റ് സെക്രട്ടറിയായ വൈശാഖ് ഒരു വര്ഷം മുമ്പാണ് സ്ഥലംമാറ്റം ലഭിച്ച് ദല്ഹിയിലെത്തിയത്. പത്തനംതിട്ട കോന്നി എലിയറക്കല് തടത്തില് വീട്ടില് പരേതനായ ടി.ആര്. രാജശേഖരപിള്ളയുടെയും പി.ആര്. രമണിയുടെയും മകനാണ്. സഹോദരന്: വിഷ്ണു ശേഖര്.
