കോട്ടയം: വികസിത രാജ്യങ്ങളിലേതിന് തുല്യമായ സംവിധാനങ്ങളോടുകൂടിയ ആശുപത്രികളും ആരോഗ്യ രംഗത്ത് വന് കുതിച്ചു ചാട്ടവും സംസ്ഥാന സര്ക്കാര് അവകാശപ്പെടുമ്പോഴും കേരളത്തില് ഇപ്പോഴും വീടുകളില് പ്രസവം വലിയതോതില് നടക്കുന്നുണ്ടെന്ന് സര്ക്കാര് രേഖ.
സംസ്ഥാനത്ത് ഏറ്റവും കൂടുതല് വീട്ടു പ്രസവം നടക്കുന്നത് മലപ്പുറം ജില്ലയിലാണെന്ന് കണക്കുകള് വെളിവാക്കുന്നു. 2019 മുതല് 2026 ജനുവരിവരെയുള്ള ഏഴ് വര്ഷത്തെ കണക്കനുസരിച്ച് 1481 വീട്ടുപ്രസവങ്ങളാണ് മലപ്പുറം ജില്ലയില് നടന്നത്. വയനാട്ടില് 313ഉം ഇടുക്കിയില് 256ഉം വീട്ടുപ്രസവങ്ങള് ഇക്കാലയളവില് നടന്നിട്ടുണ്ട്. തലസ്ഥാന ജില്ലയായ തിരുവനന്തപുരത്തും 168 എണ്ണം റിപ്പോര്ട്ട് ചെയ്യുന്നു. ഇക്കാലയളവില് സംസ്ഥാനത്താകെ 3369 വീട്ടുപ്രസവങ്ങളാണ് നടന്നത്.
2019-20 വര്ഷത്തില് സംസ്ഥാനത്താകെ വീട്ടില് നടന്ന പ്രസവം 467 ആണ്. 2020-21ല് 576, 2021-22ല് 586, 2022-23ല് 584, 2023-24ല് 526, 2024-25ല് 428, 2025 ഡിസംബര് വരെ 188, 2026 ജനുവരിയില് 14ഉം വീട്ടുപ്രസവങ്ങളുണ്ടായി. ഇത്തരം പ്രസവങ്ങളില് 2021-22 മുതല് 2026 ജനുവരി വരെയുള്ള കാലയളവില് സംസ്ഥാനത്താകെ 30 നവജാത ശിശുക്കളാണ് മരിച്ചത്. 2025-26 ജനുവരി കാലയളവില് രണ്ട് മാതൃമരണങ്ങളും ഉണ്ടായി. ഹൈക്കോടതിയിലെ അഭിഭാഷകനും പൊതുപ്രവര്ത്തകനുമായ കുളത്തൂര് ജെയ്സിങ്ങിന് ആരോഗ്യവകുപ്പ് ഡയറക്ടറേറ്റ് നല്കിയ വിവരാവകാശ മറുപടി രേഖയിലാണ് ഞെട്ടിക്കുന്ന ഈ കണക്കുകളുള്ളത്.
