കാലടി: ആദിശങ്കര കുലദേവ ക്ഷേത്രമായ കാലടി ശ്രീകൃഷ്ണസ്വാമി ക്ഷേത്രത്തിലെ അക്ഷയ തൃതീയ കനകധാരായജ്ഞത്തിന് തിരിതെളിഞ്ഞു. 21 വരെയാണ് യജ്ഞം. തന്ത്രി കിടങ്ങശ്ശേരി രാമന് നമ്പൂതിരിപ്പാടിന്റെയും യജ്ഞാചാര്യന് ആവണപ്പറമ്പ് പ്രദീപ് നമ്പൂതിരിപ്പാടിന്റെയും മേല്ശാന്തി വെമ്പിളിയത്ത് സൂരജ് നമ്പൂതിരിപ്പാടിന്റെയും മുഖ്യ കാര്മികത്വത്തിലാണ് നടക്കുന്നത്. ഉപനയന സമയത്ത് ഭിക്ഷക്കായി ദരിദ്രമായ ഒരു ഇല്ലത്ത് എത്തിയ ശ്രീശങ്കരന് ഉണക്ക നെല്ലിക്കകള് നല്കിയ അന്തര്ജനത്തിന്റെ ദാരിദ്ര്യവും ദുഃഖവും മാറണമെന്ന് ലക്ഷ്മിദേവിയെ സ്തുതിച്ചുകൊണ്ട് ശ്രീശങ്കരന് 21 ശ്ലോകങ്ങള് ചൊല്ലുകയും ഇല്ലത്ത് സ്വര്ണ നെല്ലിക്കകള് മഴയായി പെയ്തു എന്നുമാണ് ഐതിഹ്യം. ഈ ഐതിഹ്യത്തിന്റെ അടിസ്ഥാനത്തിലാണ് യജ്ഞം സംഘടിപ്പിച്ചിരിക്കുന്നത്.
യന്ത്രവിധികള്ക്ക് അനുസരിച്ച് തയ്യാറാക്കുന്ന കനകധാര മഹാലക്ഷ്മി യന്ത്രങ്ങളും മഹാലക്ഷ്മിയുടെ പ്രാണപ്രതിഷ്ഠ നടത്തിയ സ്ഫടികം അടക്കം ചെയ്ത സ്വര്ണം, വെള്ളി പഞ്ചലോഹ നെല്ലിക്കകളും ശുദ്ധിക്രിയകളായ നാല്പ്പാമര കഷായ അധിവാസം പുറ്റുമണ് ശുദ്ധി പുണ്യാഹം എന്നിവയ്ക്ക് ശേഷം യജ്ഞ മണ്ഡപത്തില് പ്രതിഷ്ഠിച്ചു. 32 ബ്രാഹ്മണ ശ്രേഷ്ഠര് 10,008 ഉരു കനകധാര സ്തോത്ര ജപം പൂര്ത്തിയാക്കുന്ന അക്ഷയതൃതീയ ദിനമായ 21ന് രാവിലെ കനകധാര ഹോമത്തിന് ശേഷം സ്വര്ണം, വെള്ളി, പഞ്ചലോഹ നെല്ലിക്കകള് കൊണ്ട് ലക്ഷ്മി ദേവിക്ക് കനകാഭിഷേകം നടത്തും. എല്ലാ ദിവസവും രാവിലെ 6 മുതല് 12 വരെയും വൈകിട്ട് നാലു മുതല് 6 വരെയുമാണ് കനകധാര സ്തോത്രം ജപം നടക്കുന്നത്. ഇതിനുശേഷം മുതലക്കടവില് ലക്ഷ്മി നാരായണ അഭിഷേകവും നടക്കും. എല്ലാ ദിവസവും രാവിലെ 7 മുതല് 11 വരെ യജ്ഞമണ്ഡപത്തിന് സമീപമുള്ള ഹോമകുണ്ഡത്തില് 96000 ഉരു സുകൃത ഹോമവും നടക്കും
ശ്രീശങ്കരജയന്തി വേല്ഘോഷയാത്രയും മഹാശക്തിവേല്പൂജയും നാളെ
കാലടി: ശ്രീശങ്കരജയന്തിയോടനുബന്ധിച്ച് നാളെ കാലടിയില് വേല് ഘോഷയാത്രയും മഹാശക്തിവേല് പൂജയും നടക്കും. തമിഴ്നാട്ടിലെ തിരിച്ചെന്തൂര് വെച്ച് മുരുകനെ പ്രാര്ത്ഥിച്ച് ശ്രീശങ്ക രാചാര്യര് ശ്രീ സുബ്രഹ്മണ്യ ഭുജംഗം രചിച്ചിരുന്നു. ശ്രീശങ്കരനും സുബ്രഹ്മണ്യസ്വാമിയുമായുള്ള ഐതിഹ്യം ഓര്മപ്പെടുത്തി കാര്ത്തിക നാളായ നാളെ വൈകിട്ട് 4ന് കാഞ്ചി ശങ്കര സ്തൂപത്തിന് മുന്പില്നിന്ന് വേല്ഘോഷയാത്ര ആരംഭിക്കും.
ആലപ്പുഴയില് നിന്നുള്ള വേല്കുത്ത് സംഘങ്ങളുടെ നേതൃത്വത്തില് വേല്കുത്ത് ശിങ്കാരിമേളം, നിശ്ചല ദൃശ്യങ്ങള് എന്നിവ ഉള്പ്പെടെ നടക്കുന്ന ഘോഷയാത്ര കാലടി ടൗണ്, ശ്രീരാമകൃഷ്ണ ആശ്രമം എന്നിവ ചുറ്റി ശൃംഗേരി ജന്മഭൂമി ക്ഷേത്രത്തില് സമാപിക്കും. തുടര്ന്ന് മുതലക്കടവ് സ്നാന ഘട്ടത്തിന് സമീപമുള്ള യജ്ഞശാലയില് മഹാശക്തി വേല് പൂജ നടക്കും. മഹാശക്തിവേല് പൂജയില് പങ്കെടുക്കുന്നവര്ക്ക് ശ്രീമുരുകന്റെ പ്രസാദമായി വെള്ളി വേലുകള്, ചരട്, വിഭൂതി നല്കും. ചെറുപയര്, മഞ്ഞള്, നെല്ല്, ഉപ്പ,് പറകള് നിറക്കാന് സൗകര്യമുണ്ട്. എല്ലാം തികച്ചും സൗജന്യമാണ്. പങ്കെടുക്കാന് ആഗ്രഹിക്കുന്നവര് മുന്കൂട്ടി പാസുകള് എടുക്കണം. വൈശാഖം ശ്രീമുരുക ഭക്തജന സംഘത്തിന്റെ ആഭിമുഖ്യത്തിലാണ് പരിപാടികള് സംഘടിപ്പിച്ചിട്ടുള്ളത്. മുഖ്യ സംയോജകന് ജയകൃഷ്ണന് വൈശാഖ് പരിപാടികള്ക്ക് നേതൃത്വം നല്കും. സൂര്യഗായത്രി മഠം അരുണ് സുബ്രഹ്മണ്യം മുഖ്യകാര്മികത്വം വഹിക്കും.
