തിരുവനന്തപുരം: സംസ്ഥാനത്ത് ഉഷ്ണതരംഗ സമാന സാഹചര്യവും ശക്തമായ ചൂടും തുടരുന്ന പശ്ചാത്തലത്തില് പൊതുജനങ്ങള്ക്ക് ജാഗ്രതാ നിര്ദേശം നല്കി ആരോഗ്യവകുപ്പ്. ചൂട് കാരണമുണ്ടാകുന്ന അടിയന്തര ആരോഗ്യ പ്രശ്നങ്ങള് നേരിടാന് സംസ്ഥാനത്തെ എല്ലാ പ്രധാന ആശുപത്രികളിലും ‘ഹീറ്റ് സ്ട്രോക്ക് ക്ലിനിക്കുകള്’ ആരംഭിച്ചു. പ്രത്യേക ഹീറ്റ് ഹെല്ത്ത് ആക്ഷന് പ്ലാന് പ്രകാരമാണ് ഇവ പ്രവര്ത്തിക്കുന്നത്. ഈ ക്ലിനിക്കുകളില് കൂളിംഗ് ഉപകരണങ്ങള്, ആവശ്യമായ മരുന്നുകള് എന്നിവ ഉറപ്പാക്കി.
പാലക്കാട് ഉള്പ്പെടെ ജില്ലകളില് താപനില 40 ഡിഗ്രിക്ക് മുകളില് ആയതോടെയാണ് ആരോഗ്യവകുപ്പ് പ്രതിരോധ നടപടികള് ശക്തമാക്കിയത്.രാവിലെ 11 മണി മുതല് ഉച്ച തിരിഞ്ഞ് മൂന്ന് മണി വരെ സൂര്യപ്രകാശം നേരിട്ട് ഏല്ക്കുന്നത് പരമാവധി ഒഴിവാക്കണം.
അള്ട്രാവയലറ്റ് രശ്മികളുടെ സാന്നിധ്യം ഈ സമയത്ത് കൂടുതലായതിനാല് വെയിലത്ത് ജോലി ചെയ്യുന്നവര് ജോലി സമയം പ്രഭാതങ്ങളിലും വൈകുന്നേരങ്ങളിലുമായി ക്രമീകരിക്കണം. കുഞ്ഞുങ്ങള്, പ്രായമായവര്, ഗര്ഭിണികള്, ഗുരുതര രോഗങ്ങളുള്ളവര് എന്നിവര് കടുത്ത വെയില് ഏല്ക്കാതിരിക്കാന് പ്രത്യേകം ശ്രദ്ധിക്കണം. സൂര്യാഘാതം, സൂര്യാതപം എന്നിവ ഉണ്ടാകാന് സാധ്യതയുള്ളതിനാല് എന്തെങ്കിലും അസ്വസ്ഥതകള് അനുഭവപ്പെട്ടാല് ഉടന് ചികിത്സ തേടണം.
