തിരുവനന്തപുരം: വിദ്യാഭ്യാസ സ്ഥാപനങ്ങളില് നിര്ബന്ധമായും മാനസികാരോഗ്യ സ്ക്രീനിങ്ങും കാലാനുസൃതമായ കൗണ്സലിങ്ങും നടപ്പാക്കണമെന്ന് ഇന്ത്യന് മെഡിക്കല് അസോസിയേഷന് (ഐഎംഎ). കണ്ണൂര് അഞ്ചരക്കണ്ടി ദന്തല് കോളജില് ബിഡിഎസ് വിദ്യാര്ത്ഥി നിതിന് രാജിന്റെ ആത്മഹത്യയെ തുടര്ന്നാണ് ഐഎംഎ ആവശ്യം ഉന്നയിച്ചത്. പോലീസ് അന്വേഷണം അതിവേഗം പൂര്ത്തിയാക്കി സത്യാവസ്ഥ പുറത്തുകൊണ്ടുവരണമെന്നും ഐഎംഎ സംസ്ഥാന പ്രസിഡന്റ് ഡോ. എം.എന്. മേനോനും സംസ്ഥാന സെക്രട്ടറി ഡോ. റോയ് ആര്. ചന്ദ്രനും വാര്ത്താക്കുറിപ്പില് ആവശ്യപ്പെട്ടു.
ഓരോ സ്ഥാപനത്തിലും സ്വതന്ത്രവും വിശ്വാസ്യതയുള്ളതുമായ വിദ്യാര്ത്ഥി പരാതി പരിഹാര സമിതികളും ആന്റിഹരാസ്മെന്റ് സെല്ലുകളും സജീവമായി പ്രവര്ത്തിക്കണം. അദ്ധ്യാപകര്ക്ക് വിദ്യാര്ത്ഥികളോടുള്ള മാനസിക സമീപനവും ആശയവിനിമയ രീതികളും മെച്ചപ്പെടുത്തുന്നതിനായി സ്ഥിരമായ സെന്സിറ്റൈസേഷന് പരിശീലനങ്ങള് നല്കേണ്ടതാണ്. പേര് വെളിപ്പെടുത്താതെ പരാതികള് നല്കാനുള്ള സംവിധാനവും അതിന് വേഗത്തിലുള്ള പ്രതികരണവും ഉറപ്പാക്കണം. കൂടാതെ, ഓരോ വിദ്യാര്ത്ഥിക്കും ഒരു മെന്റര് സംവിധാനം ഏര്പ്പെടുത്തി അവരുടെ അക്കാദമിക്, മാനസിക പ്രശ്നങ്ങള് നേരത്തെ തിരിച്ചറിയുകയും പരിഹരിക്കുകയും ചെയ്യണം. രക്ഷിതാക്കളുമായി സമയബന്ധിതമായ ആശയവിനിമയം ഉറപ്പാക്കുകയും, ഗുരുതര സാഹചര്യങ്ങളില് ത്വരിത ഇടപെടലിനുള്ള ക്രൈസിസ് മാനേജ്മെന്റ് പ്രോട്ടോക്കോളുകളും എല്ലാ സ്ഥാപനങ്ങളിലും നടപ്പിലാക്കേണ്ടതാണ്.
വിദ്യാര്ത്ഥികളുടെ ജീവിതത്തില് അദ്ധ്യാപകര് മാതാപിതാക്കളെപ്പോലെ കരുതലും മാര്ഗനിര്ദേശവും നല്കേണ്ടവരാണ്. അക്കാദമിക് വളര്ച്ചക്കൊപ്പം അവരുടെ മാനസികാരോഗ്യവും ആത്മവിശ്വാസവും സംരക്ഷിക്കുക എന്നത് വിദ്യാഭ്യാസ സ്ഥാപനങ്ങളുടെ പ്രധാന ഉത്തരവാദിത്വമാണ്. വിദ്യാര്ത്ഥികളോട് ഏതുതരത്തിലുള്ള മാനസിക പീഡനമോ അപമാനകരമായ പെരുമാറ്റമോ ഉണ്ടായാലും അത് ഒരിക്കലും അംഗീകരിക്കാനാവില്ലെന്നും ഇത്തരത്തിലുള്ള സംഭവങ്ങള് ആവര്ത്തിക്കാതിരിക്കാന് ബന്ധപ്പെട്ട അധികാരികള് അടിയന്തരമായി ഇടപെടണമെന്നും ഐഎംഎ ആവശ്യപ്പെട്ടു.
