തിരുവനന്തപുരം:വിഴിഞ്ഞത്ത് ബാര്‍ ഹോട്ടലിന് മുന്നില്‍ യുവാവിനെ തല്ലിക്കൊന്ന സംഭവത്തില്‍ പോസ്റ്റ്‌മോര്‍ട്ടം റിപ്പോര്‍ട്ടില്‍ ഞെട്ടിക്കുന്ന വിവരങ്ങള്‍.മര്‍ദനമേറ്റ് കൊല്ലപ്പെട്ട വിഴിഞ്ഞം സ്വദേശി സുമന്റെ വാരിയല്ല് ഒടിഞ്ഞ് ആന്തരികാവയവങ്ങളിലേക്ക് തറച്ചുകയറിയതാണ് മരണം കാരണമെന്ന് റിപ്പോര്‍ട്ടില്‍ പറയുന്നു.
സുമന്റെ ശരീരത്തില്‍ ആന്തരികമായി നിരവധി പരിക്കുകളുണ്ട്.നെഞ്ചിലേറ്റ അതിശക്തമായ മര്‍ദ്ദനം രക്തസ്രാവത്തിന് കാരണമായി. വാരിയല്ല് ഒടിഞ്ഞ് ആന്തരികാവയവങ്ങളില്‍ തറച്ചുകയറിയതും നെഞ്ചിലേറ്റ മര്‍ദ്ദനവും രക്തസ്രാവവുമാണ് മരണകാരണമെന്നാണ് പ്രാഥമിക നിഗമനം. വിഴിഞ്ഞം മുക്കോലയിലെ ബാര്‍ ഹോട്ടലിന് മുന്നില്‍ ബുധനാഴ്ച രാത്രി 12 മണിയോടെയാണ് കൊലപാതകം നടന്നത്.
ബാറില്‍ മദ്യപിച്ച് കൊണ്ടിരിക്കെ പ്രതി അച്ചുവും ഷാന്‍ എന്ന ആളും തമ്മില്‍ വാക്കേറ്റമുണ്ടായി. ഇവരുമായി മുന്‍പരിചയമില്ലാത്ത സുമന്‍ തര്‍ക്കത്തില്‍ ഇടപെട്ട് പ്രശ്‌നപരിഹാരത്തിന് ശ്രമിച്ചതോടെ അച്ചുവും സുമനും തമ്മില്‍ കയ്യാങ്കളിയായി.തുടര്‍ന്ന് ബാറിന് പുറത്തിറങ്ങിയ സുമനും അച്ചുവും തല്ല് തുടര്‍ന്നു.ഇതിനിടെ അച്ചു തന്റെ സഹോദരന്‍ അനന്തുവിനെ വിളിച്ചുവരുത്തി. ഇരുവരും ചേര്‍ന്നാണ് സുമനെ അതിക്രൂരമായി തല്ലിച്ചതച്ചത്.
ബാര്‍ ജീവനക്കാരുള്‍പ്പെടെ പത്തോളം പേര്‍ നോക്കിനില്‍ക്കെയാണ് മര്‍ദ്ദനം നടന്നത്. ആരും സുമനെ രക്ഷിക്കാന്‍ ശ്രമിച്ചില്ല. ഹോട്ടല്‍ ജീവനക്കാര്‍ ദൃശ്യങ്ങള്‍ മൊബൈല്‍ ഫോണില്‍ പകര്‍ത്തുന്നത് കണ്ട് സഹോദരങ്ങള്‍ അവര്‍ക്കെതിരെ തിരിഞ്ഞപ്പോള്‍ ബാറിലെ ബൗണ്‍സര്‍മാര്‍ പെപ്പര്‍ സ്േ്രപ പ്രയോഗിച്ചതിനെ തുടര്‍ന്നാണ് അച്ചുവും അനന്തുവും സ്ഥലത്ത് നിന്നും പോയത്. ഇരുവരെയും വിഴിഞ്ഞം പൊലീസ് അറസ്റ്റ് ചെയ്തു.ഇവരുള്‍പ്പെടെ നാലുപേരെയാണ് പൊലീസ് കസ്റ്റഡിയിലെടുത്തത്.
