ചെന്നൈ: വോട്ടുകള്‍ തേടിയുള്ള പ്രീണനം മാത്രമായി നടന്‍ വിജയിന്റെ പ്രവര്‍ത്തനങ്ങള്‍ ചുരുങ്ങുന്നു. തെരഞ്ഞെടുപ്പ് ജയത്തിന് മുസ്ലിം വോട്ടുകള്‍ തേടി എല്ലാ കളികളും നടന്‍ വിജയ് പുറത്തെടുക്കുന്നുണ്ട്.. ഇഫ്ത്താര്‍ പാര്‍ട്ടികള്‍ വന്‍തോതില്‍ സംഘടിപ്പിച്ച വിജയ് ഈ വിരുന്നുകളില്‍ മുസ്ലിം തൊപ്പി ധരിച്ചാണ് പങ്കെടുത്തത്.
അതേ സമയം ഭരണഘടന ഉയര്‍ത്തിപ്പിടിക്കുന്നു എന്ന് കാണിക്കാന്‍ ചില ചടങ്ങുകളില്‍ ബി.ആര്‍. അംബേദ്കറുടെ ചിത്രത്തില്‍ ചുവന്ന മാല അര്‍പ്പിയ്‌ക്കുകയും ചെയ്യും. ചിലപ്പോള്‍ മുരുകന്റെ ശൂലമേന്തി ശ്രീലങ്കന്‍ തമിഴരുടെ ഇടയില്‍ നായകനാകും. വേലുപ്പിള്ള പ്രഭാകരനെ വാഴ്‌ത്തും.
മതേതരവും ഭരണഘടനയും പറഞ്ഞ് വോട്ട് പിടിക്കുന്ന വിജയ് എന്തിനാണ് മുസ്ലിം സമുദായത്തിനിടയില്‍ ഇഫ്താര്‍ വിരുന്ന് സംഘടിപ്പിക്കുമ്പോള്‍ തൊപ്പി ധരിക്കുന്നത്? ഇത് വെറും ന്യൂനപക്ഷപ്രീണനത്തിനുള്ള തന്ത്രമാണെന്നാണ് വിമര്‍ശനം.
മാര്‍ച്ച് ഏഴിന് ചെന്നൈയില്‍ സംഘടിപ്പിച്ച ഇഫ്താര്‍ വിരുന്നായിരുന്നു ഇതില്‍ ഏറ്റവും വലുത്. റമദാന്‍ മാസത്തില്‍ റോയപേട്ടയിലെ വൈഎംസിഎ ഗ്രൗണ്ടിലായിരുന്നു ഈ വിരുന്ന്. വെള്ളഷര്‍ട്ടും മുണ്ടും മുസ്ലിം തൊപ്പിയുമായിരുന്നു വിജയിന്റെ വേഷം. സിനിമയിലെ കഥാപാത്രങ്ങളെപ്പോലെ വിജയും വോട്ടിന് വേണ്ടി ഒരു പ്രത്യേകസമുദായത്തെ പ്രീണിപ്പിക്കുകയാണെന്ന് വിമര്‍ശകര്‍ വാദിക്കുന്നു.
